ബീഹാർ തിരഞ്ഞെടുപ്പ് അന്തരിച്ച ബോളിവുഡ് തരാം സുശാന്ത് സിങ് രാജ്പുത്തിന്റെ സഹോദരി ദിവ്യ ഗൗതം സ്ഥാനാർത്ഥി

 പട്‌ന: ബീഹാർ നിയമസഭാ തിരഞ്ഞെടുപ്പിനുള്ള സീറ്റ് വിഭജന ക്രമീകരണങ്ങൾ എൻഡിഎ പ്രഖ്യാപിച്ചതിന് പിന്നാലെ, മഹാസഖ്യത്തിലെ പാർട്ടികൾ തങ്ങളുടെ സ്ഥാനാർത്ഥികളെ പ്രഖ്യാപിച്ചു തുടങ്ങി. ഔദ്യോഗിക സീറ്റ് വിഭജന പ്രഖ്യാപനം വൈകുന്നുണ്ടെങ്കിലും, അന്തരിച്ച ബോളിവുഡ് നടൻ സുശാന്ത് സിംഗ് രാജ്പുത്തിന്റെ സഹോദരി ദിവ്യ ഗൗതമിന്റെ സ്ഥാനാർത്ഥിത്വം ഇത്തവണത്തെ തിരഞ്ഞെടുപ്പിനെ കൂടുതൽ ശ്രദ്ധേയമാക്കുകയാണ്.

പട്‌നയിലെ അതിപ്രധാനമായ ദിഘ നിയമസഭാ മണ്ഡലത്തിൽ നിന്നാണ് സിപിഐ (എംഎൽ) ദിവ്യ ഗൗതമിനെ സ്ഥാനാർത്ഥിയായി പ്രഖ്യാപിച്ചത്.

കമ്മ്യൂണിസ്റ്റ് പാർട്ടി ഓഫ് ഇന്ത്യ (മാർക്സിസ്റ്റ്-ലെനിനിസ്റ്റ്) അഞ്ച് നിയമസഭാ മണ്ഡലങ്ങളിലേക്കുള്ള സ്ഥാനാർത്ഥികളെയാണ് ആദ്യഘട്ടത്തിൽ പ്രഖ്യാപിച്ചത്. ദിവ്യ ഗൗതം ഒക്ടോബർ 15-ന് നാമനിർദ്ദേശ പത്രിക സമർപ്പിക്കും.

ദിഘ: ശക്തമായ ത്രികോണ മത്സരം ഉറപ്പ്

സുശാന്ത് സിംഗ് രാജ്പുത്തിന്റെ ബന്ധു കൂടിയായ ദിവ്യയുടെ രംഗപ്രവേശം ദിഘ സീറ്റിലെ മത്സരചൂട് വർദ്ധിപ്പിച്ചു. നിലവിൽ ബിജെപിയുടെ കൈവശമുള്ള ഈ സീറ്റിൽ മഹാസഖ്യവും എൻഡിഎയും തമ്മിൽ ഇഞ്ചോടിഞ്ച് പോരാട്ടമാണ് പ്രതീക്ഷിക്കുന്നത്. കഴിഞ്ഞ 2020-ലെ നിയമസഭാ തിരഞ്ഞെടുപ്പിൽ, ബിജെപിയുടെ സഞ്ജീവ് ചൗരസ്യ 97,044 വോട്ടുകൾ നേടി വിജയിച്ചപ്പോൾ, സിപിഐ (എംഎൽ) സ്ഥാനാർത്ഥിയായ ശശി യാദവ് 50,971 വോട്ടുകൾ നേടി രണ്ടാം സ്ഥാനത്തെത്തിയിരുന്നു.

സുശാന്ത് സിങ് രാജ്പുത് 

സുശാന്ത് സിംഗ് രാജ്പുത്തിന്റെ കുടുംബം ദിഘ മണ്ഡലത്തിൽ ഉൾപ്പെടുന്ന പ്രദേശത്താണ് താമസിച്ചിരുന്നത്. സുശാന്തിന്റെ പിതാവ് കെ.കെ. സിംഗും മറ്റ് കുടുംബാംഗങ്ങളും പട്‌നയിലെ രാജീവ് നഗറിലാണ് താമസിക്കുന്നത്. ഈ പ്രാദേശിക ബന്ധങ്ങൾ ദിവ്യക്ക് അനുകൂലമാകുമെന്നാണ് വിലയിരുത്തൽ.

ആരാണ് ദിവ്യ ഗൗതം?

സിപിഐ (എംഎൽ) ടിക്കറ്റ് നൽകിയ ദിവ്യ ഗൗതം വിദ്യാഭ്യാസം, സിവിൽ സർവീസ്, സാമൂഹിക പ്രവർത്തനം എന്നീ മേഖലകളിൽ വ്യക്തിമുദ്ര പതിപ്പിച്ച വ്യക്തിയാണ്.

വിദ്യാഭ്യാസം & ഔദ്യോഗിക ജീവിതം: പട്‌ന വനിതാ കോളേജിലെ പൂർവ്വ വിദ്യാർത്ഥിനിയായ ദിവ്യ, പട്‌ന സർവകലാശാലയിൽ നിന്ന് മാസ് കമ്മ്യൂണിക്കേഷനിൽ ബിരുദം നേടി. ബിഹാർ പബ്ലിക് സർവീസ് കമ്മീഷൻ (ബിപിഎസ്‌സി) വഴി ആദ്യ ശ്രമത്തിൽ തന്നെ 64-ാമത് പരീക്ഷ പാസായി സപ്ലൈ ഇൻസ്പെക്ടർ തസ്തികയിൽ തിരഞ്ഞെടുക്കപ്പെടുന്നതിന് മുൻപ് അതേ സ്ഥാപനത്തിൽ അസിസ്റ്റന്റ് പ്രൊഫസറായും അവർ ജോലി ചെയ്തിട്ടുണ്ട്. എന്നാൽ, പിന്നീട് സർക്കാർ ജോലി രാജിവെച്ച് സാമൂഹിക പ്രവർത്തനങ്ങളിൽ സജീവമാവുകയായിരുന്നു.

രാഷ്ട്രീയം: വിദ്യാർത്ഥി രാഷ്ട്രീയത്തിൽ സജീവമായിരുന്ന ദിവ്യ ഗൗതം, ഐസയുടെ (ഓൾ ഇന്ത്യ സ്റ്റുഡന്റ്സ് അസോസിയേഷൻ) സജീവ അംഗമായിരുന്നു. 2012-ൽ, പട്‌ന യൂണിവേഴ്സിറ്റി സ്റ്റുഡന്റ്സ് യൂണിയൻ (പി.യു.എസ്.യു) പ്രസിഡന്റ് തിരഞ്ഞെടുപ്പിൽ മത്സരിച്ച് രണ്ടാം സ്ഥാനത്തെത്തി. ദിഘയിലെ പൗര-സാമൂഹിക വിഷയങ്ങളിലുള്ള അവരുടെ പ്രാദേശിക ഇടപെടലുകളും വിദ്യാർത്ഥി രാഷ്ട്രീയ പശ്ചാത്തലവുമാണ് സ്ഥാനാർത്ഥിത്വത്തിലേക്ക് നയിച്ചത്.