ക്ഷേത്രത്തിൽ അതിക്രമം: ബംഗ്ലാദേശ് സ്വദേശിയെന്ന് ആരോപിക്കുന്നയാൾ അറസ്റ്റിൽ

 ബെംഗളൂരു: ദേവരാബിസനഹള്ളി ഗ്രാമത്തിലെ ക്ഷേത്രത്തിൽ അതിക്രമം കാണിക്കുകയും വിഗ്രഹം ചെരിപ്പുകൊണ്ട് ചവിട്ടുകയും ചെയ്തു എന്നാരോപിക്കപ്പെടുന്ന ബംഗ്ലാദേശ് അനധികൃത കുടിയേറ്റക്കാരനെന്ന് കരുതുന്ന യുവാവ് അറസ്റ്റിൽ. ഇയാളുടെ അതിരുവിട്ട പെരുമാറ്റമാണ് അറസ്റ്റിൽ കലാശിച്ചത്.

ക്ഷേത്ര വളപ്പിലേക്ക് അതിക്രമിച്ച് കടന്ന ഇയാൾ കല്ലെറിയുകയും, പ്രതിഷ്ഠയുടെ വിഗ്രഹത്തെ ചെരിപ്പുകൊണ്ട് ചവിട്ടുകയും ചെയ്തുവെന്നാണ് നാട്ടുകാരുടെയും ഭക്തരുടെയും ആരോപണം. ക്ഷേത്രത്തിലെ സി.സി.ടി.വി. കാമറയിൽ പതിഞ്ഞ ഈ ദൃശ്യങ്ങൾ ഇപ്പോൾ സാമൂഹിക മാധ്യമങ്ങളിൽ പ്രചരിക്കുന്നുണ്ട്. പ്രകോപിതരായ നാട്ടുകാർ ഇയാളെ പിടികൂടി കൈകാര്യം ചെയ്യുന്ന മറ്റൊരു വീഡിയോയും ഓൺലൈനിൽ വൈറലായിട്ടുണ്ട്.

A person claiming to be from Bangladesh has pelted stones at the temple in Devarabisanahalli village, Bengaluru, and kicked the deity’s idol with slippers. The public caught the person, thrashed him, and tied him up. When will we get freedom from Bangladeshi migrants? The central… pic.twitter.com/UvEiMGY0EQ

— ಸನಾತನ (@sanatan_kannada) October 28, 2025

 

സി.സി.ടി.വി. ദൃശ്യങ്ങൾ പുറത്ത്

സാമൂഹിക മാധ്യമങ്ങളിൽ പ്രചരിക്കുന്ന സി.സി.ടി.വി. ദൃശ്യങ്ങളിൽ, നിയന്ത്രണം നഷ്ടപ്പെട്ട നിലയിൽ ക്ഷേത്രത്തിലേക്ക് പോകുന്ന യുവാവിനെ കാണാം. ഒരു ഘട്ടത്തിൽ ക്ഷേത്രത്തിന്റെ ചുമരുകൾക്ക് നേരെ ഇയാൾ കല്ലെറിയുന്നുണ്ട്. ക്ഷേത്ര കവാടത്തിന് സമീപമെത്തിയ ഉടൻ ഇയാൾ അകത്തേക്ക് ഓടിക്കയറാൻ ശ്രമിക്കുമ്പോൾ, പരിസരത്തുണ്ടായിരുന്നവർ ഓടിയെത്തി ഇയാളെ പിടികൂടാൻ ശ്രമിക്കുന്നത് ദൃശ്യങ്ങളിലുണ്ട്. വിഗ്രഹത്തെ ചെരിപ്പുകൊണ്ട് ചവിട്ടിയത് ഭക്തരുടെയും പ്രദേശവാസികളുടെയും വികാരങ്ങളെ വ്രണപ്പെടുത്തിയതായി നാട്ടുകാർ ആരോപിച്ചു.

"@sanatan_kannada" എന്ന എക്‌സ് (X) അക്കൗണ്ടാണ് ഈ വീഡിയോ പങ്കുവെച്ചത്. "ബെംഗളൂരുവിലെ ദേവരാബിസനഹള്ളി ഗ്രാമത്തിലെ ക്ഷേത്രത്തിൽ ബംഗ്ലാദേശിൽ നിന്നുള്ളയാളാണെന്ന് അവകാശപ്പെടുന്ന ഒരാൾ കല്ലെറിയുകയും വിഗ്രഹം ചെരിപ്പുകൊണ്ട് ചവിട്ടുകയും ചെയ്തു. പൊതുജനം ഇയാളെ പിടികൂടി മർദ്ദിക്കുകയും കെട്ടിയിടുകയും ചെയ്തു" എന്നായിരുന്നു വീഡിയോയുടെ അടിക്കുറിപ്പ്. അനധികൃത കുടിയേറ്റക്കാരെ കേന്ദ്ര-സംസ്ഥാന സർക്കാരുകൾ സംയുക്തമായി പുറത്താക്കണമെന്നും ഈ എക്‌സ് ഉപയോക്താവ് ആവശ്യപ്പെട്ടു.

പോലീസ് നടപടി

സംഭവം ശ്രദ്ധയിൽപ്പെട്ടതിന് പിന്നാലെ ബെംഗളൂരുവിലെ ഡിസിപി വൈറ്റ്ഫീൽഡ് (@dcpwhitefield) ട്വിറ്ററിലൂടെ പ്രതികരിച്ചു. "സംഭവവുമായി ബന്ധപ്പെട്ട് മറാഠഹള്ളി പോലീസ് സ്റ്റേഷനിൽ Cr.No: 605/2025 പ്രകാരം കേസെടുത്ത് പ്രതിയെ അറസ്റ്റ് ചെയ്തിട്ടുണ്ട്. കൂടുതൽ അന്വേഷണം നടന്നുവരുന്നു," എന്നും മറുപടിയിൽ അറിയിച്ചു.