ഗാസ വെടിനിർത്തൽ: ഹമാസിന് ട്രംപിന്റെ അന്ത്യശാസനം; "അനുസരിച്ചില്ലെങ്കിൽ ഉന്മൂലനം ചെയ്യും"

 വാഷിങ്ടൺ ഡി.സി.: ഗാസയിലെ താൽക്കാലിക വെടിനിർത്തൽ പാലിച്ചില്ലെങ്കിൽ ഹമാസ് കനത്ത പ്രത്യാഘാതം നേരിടേണ്ടി വരുമെന്ന് യു.എസ്. പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകി. എയർഫോഴ്‌സ് വണ്ണിൽ വെച്ച് മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. വെടിനിർത്തൽ കരാർ ലംഘിക്കപ്പെട്ടാൽ തിരിച്ചടിക്കാൻ ഇസ്രായേലിന് പൂർണ്ണ അവകാശമുണ്ട്. ഹമാസ് 'മര്യാദക്ക് പെരുമാറിയില്ലെങ്കിൽ' അവരെ 'ഉന്മൂലനം ചെയ്യുമെന്നും' ട്രംപ് കൂട്ടിച്ചേർത്തു.

വെടിനിർത്തൽ കരാറിലെ വ്യവസ്ഥകൾ ഹമാസ് ലംഘിച്ചാൽ ഇസ്രായേൽ നടത്തുന്ന സൈനിക നടപടികളെ യു.എസ്. പൂർണ്ണമായി ന്യായീകരിക്കും എന്ന് ട്രംപ് വ്യക്തമാക്കി. സൈനികരെ അയച്ച് യുദ്ധത്തിൽ നേരിട്ട് ഇടപെടാൻ അമേരിക്ക ഉദ്ദേശിക്കുന്നില്ലെങ്കിലും, ഇസ്രായേലിനും സഖ്യകക്ഷികൾക്കും പിന്തുണ നൽകുമെന്നും യു.എസ്. പ്രസിഡന്റ് ഊന്നിപ്പറഞ്ഞു. "ഹമാസ് മര്യാദക്ക് പെരുമാറണം. അവർ 'നല്ലവരായിരുന്നില്ലെങ്കിൽ' ഉന്മൂലനം ചെയ്യപ്പെടും. പ്രധാനപ്പെട്ട ബാഹ്യ പിന്തുണയെല്ലാം ഭീകര സംഘടനയ്ക്ക് നഷ്ടമായിരിക്കുന്നു," ട്രംപ് പറഞ്ഞു.

വെടിനിർത്തലിനിടെ വീണ്ടും വ്യോമാക്രമണം

യുഎസ് മധ്യസ്ഥതയിൽ നിലനിൽക്കുന്ന വെടിനിർത്തൽ കരാർ ലംഘിച്ച് ഇസ്രായേൽ ചൊവ്വാഴ്ച വ്യോമാക്രമണം നടത്തിയതായി ഗാസയിലെ സിവിൽ ഡിഫൻസ് ഏജൻസി ആരോപിച്ചു. ഇസ്രായേൽ സൈനികരെ ഹമാസ് ആക്രമിച്ചതിനെത്തുടർന്നാണ് തിരിച്ചടിച്ചതെന്ന് ഇസ്രായേൽ സൈന്യം കുറ്റപ്പെടുത്തി. "അവർ ഒരു ഇസ്രായേൽ സൈനികനെ കൊന്നു. അതുകൊണ്ട് ഇസ്രായേൽ തിരിച്ചടിച്ചു. അവർ തിരിച്ചടിക്കണം," ട്രംപ് മാധ്യമപ്രവർത്തകരോട് പറഞ്ഞു. ആക്രമണത്തിൽ ഗാസയുടെ വിവിധ ഭാഗങ്ങളിലായി കുറഞ്ഞത് 30 പേർ കൊല്ലപ്പെട്ടതായി ഹമാസിന് കീഴിൽ പ്രവർത്തിക്കുന്ന രക്ഷാസേന വക്താവ് അറിയിച്ചു.

എന്നാൽ, ചൊവ്വാഴ്ചയുണ്ടായ 'ചെറിയ ഏറ്റുമുട്ടലുകൾ'ക്കിടയിലും വെടിനിർത്തൽ കരാർ നിലനിൽക്കുന്നുണ്ടെന്ന് യു.എസ്. വൈസ് പ്രസിഡന്റ് ജെ.ഡി. വാൻസ് അഭിപ്രായപ്പെട്ടു.

ബന്ദികളുടെ മൃതദേഹങ്ങളുടെ പേരിലുള്ള തർക്കം

ബന്ദികളുടെ മൃതദേഹങ്ങൾ കൈമാറണമെന്ന ഇസ്രായേലിന്റെ ആവശ്യം അനുസരിച്ച് ചൊവ്വാഴ്ച മറ്റൊരാളുടെ മൃതദേഹം കൂടി കൈമാറുമെന്ന് ഹമാസ് പ്രഖ്യാപിച്ചിരുന്നു. 2023 ഒക്ടോബർ 7-ന് യുദ്ധത്തിന് തിരികൊളുത്തിയ ആക്രമണത്തിനിടെ ഹമാസ് 251 പേരെ ബന്ദികളാക്കിയിരുന്നു. നിലവിൽ മരിച്ച ബന്ദികളുടെ ശേഷിക്കുന്ന മൃതദേഹങ്ങളെ ചൊല്ലിയുള്ള തർക്കം വെടിനിർത്തലിന് ഭീഷണിയുയർത്തിയിട്ടുണ്ട്.

മൃതദേഹങ്ങൾ കൈമാറുന്നതിൽ നിന്ന് ഹമാസ് പിന്മാറിയെന്ന് ഇസ്രായേൽ ആരോപിക്കുന്നു, എന്നാൽ യുദ്ധം തകർത്ത ഗാസയിൽ അവശിഷ്ടങ്ങൾക്കിടയിൽ മൃതദേഹങ്ങൾ കണ്ടെത്താൻ സമയം ആവശ്യമുണ്ടെന്നാണ് പലസ്തീൻ ഇസ്ലാമിക ഗ്രൂപ്പിന്റെ വിശദീകരണം.

നേരത്തെ കണ്ടെത്തിയ ഒരു ബന്ദിയുടെ ഭാഗികമായ മൃതദേഹാവശിഷ്ടങ്ങൾ ഹമാസ് തിരികെ നൽകിയത് വെടിനിർത്തൽ കരാർ ലംഘനമാണെന്ന് ഇസ്രായേൽ ആരോപിച്ചതിനെ തുടർന്ന് ഹമാസിൻ്റെ മേൽ സമ്മർദ്ദം വർധിച്ചിരുന്നു. ഒക്ടോബർ 10-ന് നിലവിൽ വന്ന വെടിനിർത്തൽ കരാർ പ്രകാരം തിരികെ നൽകാൻ സമ്മതിച്ച 28 മൃതദേഹങ്ങളിൽ 16-ാമത്തേതാണ് ഇതെന്നാണ് ഹമാസ് പറഞ്ഞിരുന്നത്. എന്നാൽ, രണ്ട് വർഷം മുമ്പ് തന്നെ ഇസ്രായേലിൽ തിരിച്ചെത്തിച്ച ഒരു ബന്ദിയുടെ ഭാഗികമായ മൃതദേഹാവശിഷ്ടങ്ങളാണ് ഹമാസ് കൈമാറിയതെന്ന് ഇസ്രായേൽ ഫോറൻസിക് പരിശോധനയിൽ തെളിഞ്ഞതായി നെതന്യാഹുവിൻ്റെ ഓഫീസ് അറിയിച്ചു.