ബൈരാബി-സൈറാങ് റെയിൽ പാത ഒരു എഞ്ചിനീയറിംഗ് വിമയം

 ഐസ്‌വാൾ: മിസോറാമിൻ്റെ തലസ്ഥാനമായ ഐസ്‌വാളിനെ രാജ്യത്തിൻ്റെ റെയിൽവേ ശൃംഖലയുമായി ബന്ധിപ്പിച്ചുകൊണ്ട് ചരിത്രപരമായ ബൈരാബി-സൈറാങ് റെയിൽവേ ലൈൻ പ്രധാനമന്ത്രി നരേന്ദ്ര മോദി രാഷ്ട്രത്തിന് സമർപ്പിച്ചു. 

സ്വാതന്ത്ര്യത്തിനു ശേഷം ആദ്യമായാണ് മിസോറാം ദേശീയ റെയിൽവേ ഭൂപടത്തിൽ ഇടംപിടിക്കുന്നത്. ₹8,070 കോടി ചെലവഴിച്ചു നിർമ്മിച്ച ഈ 51.38 കിലോമീറ്റർ പാത യാത്രാ സമയം ഗണ്യമായി കുറയ്ക്കുന്നതിനും, മേഖലയിലെ വാണിജ്യ-വികസന സാധ്യതകൾ വർദ്ധിപ്പിക്കുന്നതിനും വഴിതുറക്കും. കേന്ദ്രസർക്കാരിന്റെ 'ആക്ട് ഈസ്റ്റ്' നയത്തിന് വലിയ ഊർജ്ജം നൽകുന്ന ഈ പദ്ധതി, വടക്കുകിഴക്കൻ സംസ്ഥാനങ്ങളുടെ വികസനത്തിൽ ഒരു നാഴികക്കല്ലാണ്.

എൻജിനീയറിങ് വിസ്മയം;

അസം-മിസോറാം അതിർത്തിയിലെ ബൈരാബിയിൽ നിന്ന് ഐസ്‌വാളിൽ നിന്ന് 20 കിലോമീറ്റർ അകലെയുള്ള സൈറാങ് വരെ നീളുന്ന ഈ റെയിൽവേ ലൈൻ ഒരു എൻജിനീയറിങ് അത്ഭുതമാണ്. 12.8 കിലോമീറ്റർ നീളമുള്ള 48 തുരങ്കങ്ങളും, 55 വലിയ പാലങ്ങളും, 87 ചെറിയ പാലങ്ങളും, അഞ്ച് മേൽപ്പാലങ്ങളും ഈ പാതയിലുണ്ട്. ചെങ്കുത്തായ മലകളും, ആഴമേറിയ താഴ്‌വരകളും, മണ്ണിടിച്ചിൽ സാധ്യതയുമുള്ള ഇൻഡോ-ബർമ്മീസ് ഭൂപ്രദേശത്തിലൂടെയുള്ള നിർമ്മാണം ഒരു ദശാബ്ദമെടുത്തു. സൈറാങ്ങിനടുത്തുള്ള പാലം നമ്പർ 196, 114 മീറ്റർ ഉയരത്തിൽ രാജ്യത്തെ രണ്ടാമത്തെ ഉയരം കൂടിയ റെയിൽവേ പാലമായി മാറി. ഡൽഹിയിലെ ഖുതുബ് മിനാറിനേക്കാൾ ഉയരമുള്ളതാണ് ഈ പാലം.

കനത്ത മഴയും, നിർമ്മാണ സാമഗ്രികൾ മറ്റ് സംസ്ഥാനങ്ങളിൽ നിന്ന് ഇറക്കുമതി ചെയ്യേണ്ടി വന്നതും വലിയ വെല്ലുവിളിയായിരുന്നെങ്കിലും, നോർത്ത് ഈസ്റ്റ് ഫ്രോണ്ടിയർ റെയിൽവേ (NFR) ഈ പദ്ധതി പൂർത്തിയാക്കി. ഐഐടി ഗുവാഹത്തി, ഐഐടി റൂർക്കി എന്നീ സ്ഥാപനങ്ങളാണ് സുരക്ഷാ ക്രമീകരണങ്ങൾ ഉറപ്പുവരുത്തിയത്. ജൂൺ 2025-ൽ റെയിൽവേ സേഫ്റ്റി കമ്മീഷണർ അനുമതി നൽകിയതോടെയാണ് പാത പ്രവർത്തനക്ഷമമായത്.

യാത്രാ സമയം കുറയും, സാമ്പത്തിക വളർച്ച കൂടും

ബൈരാബി-സൈറാങ് പാത യാത്രാ സമയം ഗണ്യമായി കുറയ്ക്കും. റോഡ് മാർഗം 6-8 മണിക്കൂർ എടുത്തിരുന്ന ഐസ്‌വാളിൽ നിന്ന് അസമിലെ സിൽച്ചറിലേക്കുള്ള യാത്ര ഇനി ട്രെയിനിൽ 3 മണിക്കൂർ കൊണ്ട് പൂർത്തിയാക്കാം. ഗുവാഹത്തിയിലേക്കുള്ള 483 കിലോമീറ്റർ യാത്ര 18 മണിക്കൂറിൽ നിന്ന് 12 മണിക്കൂറായി കുറയും. ₹450-ൽ താഴെ മാത്രമാണ് ടിക്കറ്റ് നിരക്ക്, ഇത് വിമാനങ്ങളെയും ടാക്സികളെയും അപേക്ഷിച്ച് വളരെ ലാഭകരമാണ്.

ഹോർട്ടോക്കി, കാൺപൂയി, മുവാൽഖാങ്, സൈറാങ് എന്നീ നാല് പുതിയ സ്റ്റേഷനുകളാണ് ഈ പാതയിലുള്ളത്. ഇവയിൽ സൈറാങ് സ്റ്റേഷൻ ഐസ്‌വാളിൻ്റെ പ്രധാന റെയിൽവേ ഹബ്ബായി മാറും. 25,000 കോടി രൂപയുടെ മിസോറാം സമ്പദ്‌വ്യവസ്ഥയ്ക്ക് ഈ റെയിൽവേ ലൈൻ 2-3% വാർഷിക വളർച്ച നൽകുമെന്ന് റെയിൽവേ ഉദ്യോഗസ്ഥർ പ്രതീക്ഷിക്കുന്നു. ഇത് സംസ്ഥാനത്തിൻ്റെ മൊത്ത ആഭ്യന്തര ഉത്പാദനത്തിൽ പ്രതിവർഷം ₹500-700 കോടി രൂപയുടെ വർദ്ധനവുണ്ടാക്കും.

ടൂറിസം കുതിക്കും, ജനജീവിതം മെച്ചപ്പെടും

ഭക്ഷണം, ഇന്ധനം തുടങ്ങിയ അവശ്യവസ്തുക്കളുടെ ചരക്ക് നീക്കം എളുപ്പമാകുന്നതോടെ ഈ സാധനങ്ങളുടെ വില 10-20% വരെ കുറയും. കൂടാതെ, വരും അഞ്ചു വർഷത്തിനുള്ളിൽ ടൂറിസത്തിൽ 40-50% വർദ്ധനവ് പ്രതീക്ഷിക്കുന്നു. മിസോറാമിൻ്റെ പ്രകൃതിരമണീയമായ കുന്നുകളും മുളങ്കാടുകളും സാംസ്കാരിക കേന്ദ്രങ്ങളും പുതിയ യാത്രാമാർഗ്ഗം വഴി രാജ്യത്തെമ്പാടുമുള്ള സഞ്ചാരികളെ ആകർഷിക്കും. പുതിയ റെയിൽവേ സ്റ്റേഷനുകൾ കേന്ദ്രീകരിച്ച് പ്രാദേശിക സംരംഭങ്ങൾ വളരുമെന്നും പ്രതീക്ഷിക്കുന്നു.

നയതന്ത്രപരമായി നിർണായകം

ഈ റെയിൽവേ ലൈൻ ഇന്ത്യയുടെ 'ആക്ട് ഈസ്റ്റ്' നയത്തിന് വലിയ കരുത്ത് പകരും. മ്യാൻമറിലെ സിറ്റ്വെ തുറമുഖവുമായി ബന്ധിപ്പിക്കുന്ന കലദാൻ മൾട്ടി-മോഡൽ ട്രാൻസിറ്റ് ട്രാൻസ്‌പോർട്ട് പദ്ധതിയുടെ ചരക്ക് നീക്കത്തിന് ഈ പാത സഹായകമാകും. സൈറാങ്ങിൽ നിന്ന് ഇന്ത്യ-മ്യാൻമർ അതിർത്തിയിലെ ഹ്മാങ്ബുച്ചുവ വരെ 223 കിലോമീറ്റർ പാത നിർമ്മിക്കുന്നതിനുള്ള സർവ്വേകളും നടക്കുന്നുണ്ട്. സൈനിക നീക്കങ്ങൾ വേഗത്തിലാക്കി ദേശീയ സുരക്ഷ വർദ്ധിപ്പിക്കുന്നതിനും ഈ പാത സഹായകമാകും.

ഗുവാഹത്തി, അഗർത്തല, ഇറ്റാനഗർ എന്നീ തലസ്ഥാനങ്ങൾക്ക് ശേഷം റെയിൽവേയുമായി ബന്ധിപ്പിക്കപ്പെടുന്ന നാലാമത്തെ വടക്കുകിഴക്കൻ സംസ്ഥാന തലസ്ഥാനമാണ് മിസോറാം. 2030-ഓടെ വടക്കുകിഴക്കൻ സംസ്ഥാനങ്ങളിലെ എട്ട് തലസ്ഥാനങ്ങളെയും ദേശീയ റെയിൽ ശൃംഖലയുമായി ബന്ധിപ്പിക്കാനുള്ള ഇന്ത്യൻ റെയിൽവേയുടെ ലക്ഷ്യത്തിലേക്കുള്ള പ്രധാന ചുവടുവെപ്പാണ് ഈ നേട്ടം.