എറണാകുളം: ഭാര്യമാരെ സംരക്ഷിക്കാനാകാത്ത പുരുഷന്മാര് ഒന്നിലേറെ സ്ത്രീകളെ വിവാഹം കഴിക്കുന്നത് അംഗീകരിക്കാനാകില്ലെന്ന് ഹൈക്കോടതി. ഭര്ത്താവ് ചെലവിന് നല്കാത്തതിനെതിരെ കോടതിയെ സമീപിച്ച ഒരു സ്ത്രീയുടെ ഹര്ജി പരിഗണിക്കവെയാണ് കോടതിയുടെ നിരീക്ഷണം.
കേവലം ഒരു യാചകന്, അയാള് മുസ്ലീമായത് കൊണ്ട് മാത്രം തുടര്ച്ചയായി വിവാഹം കഴിക്കുന്നത് അംഗീകരിക്കാനാകില്ല. മുസ്ലീം സമുദായത്തില് ഇത്തരത്തിലുള്ള വിവാഹങ്ങളുണ്ടാകുന്നത് വിദ്യാഭ്യാസമില്ലാത്തത് കൊണ്ടാണെന്നും കോടതി ചൂണ്ടിക്കാട്ടി.
ഖുറാന് ഏകഭാര്യത്വത്തെയാണ് പ്രോത്സാഹിപ്പിക്കുന്നതെന്നും ചില കാര്യങ്ങളില് മാത്രമാണ് ബഹുഭാര്യാത്വത്തെ അംഗീകരിക്കുന്നതെന്നും ഖുറാന് സൂക്തങ്ങള് ഉദ്ധരിച്ച് കോടതി പ്രസ്താവിച്ചു. എല്ലാ ഭാര്യമാരോടും തുല്യനീതി പുലര്ത്താനാകുന്നവര്ക്ക് മാത്രമേ ഒന്നിലധികം വിവാഹം കഴിക്കാന് പരിശുദ്ധ ഖുറാന് അനുമതി നല്കുന്നുള്ളൂവെന്നും കോടതി പറഞ്ഞു.
ഭിക്ഷാടനം ഒരു ഉപജീവനമാര്ഗമായി അംഗീകരിക്കാനാകില്ല. ആരും ഭിക്ഷാടനത്തിലേക്ക് പോകുന്നില്ലെന്ന് ഉറപ്പാക്കേണ്ടത് ഭരണകൂടത്തിന്റെയും സമൂഹത്തിന്റെയും നീതിന്യായ സംവിധാനത്തിന്റെയും ഉത്തരവാദിത്തമാണ്. ഇത്തരക്കാര്ക്ക് ഭരണകൂടം ആഹാരവും ഭക്ഷണവും ഉറപ്പാക്കണം.
ശ്രീനാരായണ ഗുരുവിന്റെ ദൈവദശകവും കോടതി പരാമര്ശിച്ചു. പള്ളിക്ക് മുന്നില് ഭിക്ഷാടനം നടത്തി ജീവിക്കുന്നൊരാള് ഒന്നിന് പിറകെ ഒന്നായി വിവാഹം കഴിക്കുന്നത് മുസ്ലീം സമുദായത്തിന്റെ മൗലിക തത്വങ്ങള് അറിയാത്തത് കൊണ്ടാണ്. ഇയാള്ക്ക് മതിയായ കൗണ്സിലിങ് നല്കണം. മുസ്ലീം സമുദായത്തില് ഇത്തരത്തില് ബഹുഭാര്യത്വത്തിന് ഇരയായി ഉപേക്ഷിക്കപ്പെട്ട സ്ത്രീകളെ സംരക്ഷിക്കേണ്ട ചുമതല സര്ക്കാരിനുണ്ടെന്നും കോടതി ചൂണ്ടിക്കാട്ടി.
കോടതി ഉത്തരവിന്റെ പകര്പ്പ് സാമൂഹ്യ ക്ഷേമ വകുപ്പിന് അനന്തര നടപടികള്ക്കായി എത്തിക്കാനും നിര്ദ്ദേശിച്ചിട്ടുണ്ട്. മത നേതാക്കളടക്കമുള്ളവരുടെയും വിദഗ്ദ്ധ കൗണ്സിലര്മാരുടെയും സേവനം ഇയാള്ക്ക് ഉറപ്പാക്കണം.
ഒരു യാചകനോട് ഭാര്യയ്ക്ക് പ്രതിമാസം ചെലവിന് നല്കണമെന്ന് ഉത്തരവിടാന് ആകില്ലെന്ന കുടുംബ കോടതിയുടെ ഉത്തരവ് ഹൈക്കോടതിയും ആവര്ത്തിച്ചു. എന്നാല് പരാതിക്കാരിക്ക് ഭക്ഷണവും വസ്ത്രവും അടക്കമുള്ളവ സര്ക്കാര് ഉറപ്പാക്കണമെന്നും കോടതി നിര്ദ്ദേശിച്ചു.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന് സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.