ഡൽഹിയിൽ കനത്ത മഴ: യമുനാ നദി കരകവിഞ്ഞു; താഴ്ന്ന പ്രദേശങ്ങളിൽ വെള്ളം കയറി ദുരിതത്തിൽ

ന്യൂഡൽഹി:  കനത്ത മഴ തുടരുന്ന ഡൽഹിയിൽ യമുനാ നദി കരകവിഞ്ഞു.

താഴ്ന്ന പ്രദേശങ്ങളിൽ വെള്ളം കയറിയതോടെ ആളുകളെ സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചു. ഈ വർഷം ആദ്യമായാണ് യമുന അപകടനില കവിഞ്ഞൊഴുകുന്നത്. വാസിറാബാദ്, ഹഥ്നികുണ്ട് അണക്കെട്ടുകൾ തുറന്നതോടെ നദിയിൽ നീരൊഴുക്ക് വർധിക്കുകയായിരുന്നു.

ഡൽഹി മുഖ്യമന്ത്രി രേഖ ഗുപ്ത പ്രളയ മുന്നൊരുക്കങ്ങൾ വിലയിരുത്തി. ദുരിതാശ്വാസ ക്യാംപിൽ കഴിയുന്ന കുടുംബങ്ങളെയും മുഖ്യമന്ത്രി സന്ദർശിച്ചു. സർക്കാർ വേണ്ട നടപടികൾ സ്വീകരിക്കുന്നുണ്ടെന്നും ജനങ്ങൾ പരിഭ്രാന്തരാകേണ്ടതില്ലെന്നും മുഖ്യമന്ത്രി പറഞ്ഞു.

വെള്ളപ്പൊക്കത്തെ തുടർന്ന് ഡൽഹി പൊലീസ് ഗതാഗത മുന്നറിയിപ്പ് പുറപ്പെടുവിച്ചു. മയൂർ വിഹാർ, യമുനാ ബസാർ, നിഗംബോധ് ഘട്ട്, ഗാന്ധി നഗർ, ശാസ്ത്രി പാർക്ക് എന്നിവിടങ്ങളിലെ വീടുകളിലാണ് വെള്ളം കയറിയത്. ഇതേത്തുടർന്ന് ഓൾഡ് റെയിൽവേ (ലോഹ) പാലം പൊലീസ് അടച്ചു. ഇതുവഴി പോകേണ്ട വാഹനങ്ങൾ ഹനുമാൻ സേതു, രാജാ റാം കോഹ്‌ലി മാർഗ്, ഗീത കോളനി റോഡ് എന്നിവിടങ്ങളിലൂടെ വഴി തിരിച്ചു വിട്ടിട്ടുണ്ട്.