എസ്‌സിഒ ഉച്ചകോടിയിൽ പ്രധാനമന്ത്രി നരേന്ദ്ര മോദി പങ്കെടുക്കുമെന്ന് ദേശീയ സുരക്ഷാ ഉപദേഷ്ടാവ് അജിത് ഡോവൽ

ന്യൂഡൽഹി : ഇന്ത്യ– ചൈന അതിർത്തി ശാന്തമെന്ന് ദേശീയ സുരക്ഷാ ഉപദേഷ്ടാവ് അജിത് ഡോവൽ. ചൈനീസ് വിദേശകാര്യമന്ത്രി വാങ് യിയുമായുള്ള എസ്ആർ ടോക്സ് എന്ന ചർച്ചയ്ക്കുശേഷം സംസാരിക്കുകയായിരുന്നു അദ്ദേഹം.

ഓഗസ്റ്റ് 31നും സെപ്റ്റംബർ ഒന്നിനുമായി ചൈനയിലെ ടിയാൻജിനിൽ നടക്കുന്ന ഷാങ്ഹായി കോർപറേഷൻ ഓർഗനൈസേഷൻ (എസ്‌സിഒ) ഉച്ചകോടിയിൽ പ്രധാനമന്ത്രി നരേന്ദ്ര മോദി പങ്കെടുക്കുമെന്നും അദ്ദേഹം അറിയിച്ചു. ടിവിയിലൂടെയായിരുന്നു അദ്ദേഹത്തിന്റെ പ്രതികരണം. ഇരുരാജ്യങ്ങളും തമ്മിലുള്ള ബന്ധം ദൃഢമാണ്. ബന്ധത്തിൽ പുതിയ ഊർജം ഉണ്ട്. പല മേഖലയിലും മുന്നോട്ടുപോകാൻ കഴിഞ്ഞുവെന്നും അദ്ദേഹം പറഞ്ഞു.

ഇന്ത്യ – ചൈന ബന്ധത്തിലുണ്ടായിരിക്കുന്ന തിരിച്ചടികൾ ഇരുരാജ്യങ്ങളിലെയും ജനങ്ങളുടെ താൽപര്യമായിരുന്നില്ലെന്ന് വാങ് യി പറഞ്ഞു. 2024ലെ മോദി – ഷി ചർച്ചയാണ് അതിർത്തി പ്രശ്നങ്ങൾ അവസാനിപ്പിക്കുന്നതിനു സഹായിച്ചതെന്നും അദ്ദേഹം പറഞ്ഞു. സഹകരണം മെച്ചപ്പെടുത്തുന്നതിന് ആവശ്യമായ പോസിറ്റീവ് ട്രെൻഡ് ആണ് ഉള്ളതെന്നു നേരത്തേ വിദേശകാര്യമന്ത്രി എസ്. ജയശങ്കറുമായുള്ള കൂടിക്കാഴ്ചയിൽ വാങ് യി പറഞ്ഞിരുന്നു.