വാഹനം ഓടിക്കുന്നതിനിടെ മസ്തിഷ്കാഘാതം: അപകടത്തിൽ പ്രവാസി മലയാളി സൗദിയിൽ മരിച്ചു

ജിദ്ദ: ട്രെയിലർ ഓടിക്കുന്നതിനിടെ മസ്തിഷ്കാഘാതം.

അപകടത്തിൽപ്പെട്ട് ഗുരുതര പരുക്കേറ്റ് അബോധാവസ്ഥയിൽ ചികിത്സയിലിരുന്ന പ്രവാസി മലയാളി ദമാമിൽ മരിച്ചു. പെരുമ്പാവൂർ, വെങ്ങോല, അലഞ്ഞിക്കാട്ടിൽ ഷെമീർ അബൂബക്കർ (43) ആണ് മരിച്ചത്. ജൂലൈ 17 നായിരുന്നു  റിയാദ്  ഹൈവേയിലുള്ള ദമാം ചെക്പോയിന്റിനു സമീപം അപകടം നടന്നത്. ഓടിച്ചു കൊണ്ടിരുന്ന വണ്ടിക്കുള്ളിൽ വച്ച്  മസ്തിഷ്ഘാതം ഉണ്ടായതിനെ തുടർന്ന് നിയന്ത്രണം നഷ്ടമായി വാഹനം അപകടത്തിലാവുകയായിരുന്നു. വിവരമറിഞ്ഞെത്തിയ രക്ഷാപ്രവർത്തകർ അപകടസ്ഥലത്തിനടുത്തുള്ള സൗദി ജർമൻ ആശുപത്രിയിൽ അത്യാഹിതവിഭാഗത്തിലെത്തിച്ചു.

മൂന്നോളം ശസ്ത്രക്രിയ നടത്തിയെങ്കിലും കഴിഞ്ഞ 26 ദിവസമായി അബോധാവസ്ഥയിൽ വെന്റിലേറ്ററിന്റെ സഹായത്തിൽ ജീവൻ നിലനിർത്തി ആശുപത്രിയിൽ തുടരുന്നതിനിടെ മരിച്ചു. അപകട വിവരമറിഞ്ഞ് കഴിഞ്ഞ വെള്ളിയാഴ്ച നാട്ടിൽ നിന്നും എത്തിയ ഭാര്യ ഷഹാന, മുതിർന്ന സഹോദരൻ എന്നിവർ ആശുപത്രിയിൽ ഒപ്പം ഉണ്ടായിരുന്നു. മക്കൾ: ഷിഫാന, ഷിഫാസ് (സ്കൂൾ വിദ്യാർഥികൾ). മൃതദേഹം നാട്ടിലെത്തിക്കുന്നതിനുള്ള നിയമനടപടികൾക്ക് ലോകകേരളാസഭാംഗവും ജീവകാരുണ്യപ്രവർത്തകനുമായ നാസ് വക്കം നേതൃത്വം നൽകുന്നു. സംസ്കാരം പിന്നീട് നാട്ടിൽ.