മാല ധരിച്ചുകൊണ്ട് എംആർഐ സ്കാനിങ് മുറിയിൽ കയറിയ വയോധികൻ മരിച്ച ഞെട്ടിപ്പിക്കുന്ന സംഭവം, എംആർഐ സ്കാനിങ് എന്ന ഭീകരനെ അറിയാതെ പോകരുത്

എംആർഐ സ്കാനിങ് മുറിയിൽ അനുമതിയില്ലാതെ പ്രവേശിച്ച മധ്യവയസ്കൻ ദാരുണമായി മരിച്ച, ന്യൂയോർക്കിൽ അടുത്തിടെ ഉണ്ടായ ആ സംഭവം എംആർഐ സുരക്ഷയുടെ പ്രാധാന്യം ഒരിക്കൽ കൂടി ഓർമിപ്പിക്കുന്നു. കഴുത്തിൽ ലോഹനിർമിതമായ മാല ധരിച്ചതുകൊണ്ടാണ് ഇദ്ദേഹത്തെ ശക്തമായ കാന്തികശക്തിയുള്ള എംആർഐ മെഷീൻ ഉള്ളിലേക്ക് വലിച്ചെടുത്തത്.

ഈ അപകടത്തെത്തുടർന്ന്, എംആർഐ സ്കാൻ ചെയ്യുന്നതിന് മുൻപ് സ്വീകരിക്കേണ്ട മുൻകരുതലുകൾ സംബന്ധിച്ച് വിദഗ്ധർ വ്യക്തമായ മുന്നറിയിപ്പുകൾ നൽകുന്നു.നമ്മുടെ ശരീരത്തിന്റെ ആന്തരികാവയവങ്ങളെയും ഘടനകളെയും കുറിച്ച് വിശദമായ ചിത്രങ്ങൾ എടുക്കാൻ സഹായിക്കുന്ന അത്യാധുനിക രോഗനിർണയ മാർഗമാണ് എംആർഐ സ്കാൻ (Magnetic Resonance Imaging). പേര് സൂചിപ്പിക്കുന്നത് പോലെ, അതിശക്തമായ കാന്തിക മണ്ഡലങ്ങളും റേഡിയോ തരംഗങ്ങളും ഉപയോഗിച്ചാണ് എംആർഐ പ്രവർത്തിക്കുന്നത്. 

ഭൂമിയുടെ കാന്തിക മണ്ഡലത്തേക്കാൾ 30,000 മുതൽ 60,000 മടങ്ങ് വരെ ശക്തിയുള്ളതാണ് എംആർഐ യന്ത്രത്തിലെ കാന്തങ്ങൾ. ഈ തീവ്രമായ കാന്തിക മണ്ഡലത്തിലേക്ക് ലോഹവസ്തുക്കൾ പ്രവേശിച്ചാൽ അത് ഗുരുതരമായ അപകടങ്ങൾക്ക് കാരണമാകും. എംആർഐ സ്കാനിങ്: എങ്ങനെ പ്രവർത്തിക്കുന്നു? എംആർഐ യന്ത്രത്തിലെ ശക്തമായ കാന്തിക മണ്ഡലം ശരീരത്തിലെ ഹൈഡ്രജൻ ആറ്റങ്ങളിലെ പ്രോട്ടോണുകൾക്ക് ചലന വ്യതിയാനം ഉണ്ടാക്കുന്നു. ഈ വ്യതിയാനങ്ങളെ അടിസ്ഥാനമാക്കിയാണ് ശരീരത്തിന്റെ വിശദമായ ചിത്രങ്ങൾ ലഭ്യമാകുന്നത്. തലച്ചോറ്, സുഷുമ്നാ നാഡി, സന്ധികൾ, മൃദുകലകൾ, രക്തക്കുഴലുകൾ തുടങ്ങിയവയിലെ പ്രശ്നങ്ങൾ കണ്ടെത്താൻ എംആർഐ സ്കാൻ ഉപയോഗിക്കുന്നു. 

എക്സ്-റേ അല്ലെങ്കിൽ സിടി സ്കാൻ പോലെ അയോണൈസിംഗ് വികിരണം (ionizing radiation) ഉപയോഗിക്കാത്തതിനാൽ ഇത് താരതമ്യേന സുരക്ഷിതമാണ്.ലോഹവസ്തുക്കൾ നീക്കം ചെയ്യുക: എംആർഐ റൂമിലേക്ക് പ്രവേശിക്കുന്നതിന് മുൻപ് ശരീരത്തിലുള്ള എല്ലാ ലോഹവസ്തുക്കളും (ആഭരണങ്ങൾ, വാച്ച്, ക്രെഡിറ്റ് കാർഡ്, കീ ചെയിൻ, ഹെയർ പിൻ, ഡെന്റൽ ബ്രേസസ്, ശ്രവണസഹായി, മൊബൈൽ ഫോൺ തുടങ്ങിയവ) നിർബന്ധമായും നീക്കം ചെയ്യുക. ഇവയെ ശക്തമായ കാന്തികക്ഷേത്രം ആകർഷിക്കാനും അപകടകരമായ രീതിയിൽ വലിച്ചെടുക്കാനും സാധ്യതയുണ്ട്.

ശരീരത്തിനുള്ളിലെ ലോഹ ഇംപ്ലാന്റുകൾ: പേസ്മേക്കർ, ഇൻസുലിൻ പമ്പ്, കോക്ലിയർ ഇംപ്ലാൻ്റുകൾ, സ്റ്റെൻ്റുകൾ, കൃത്രിമ സന്ധികൾ തുടങ്ങിയ ലോഹവസ്തുക്കൾ ശരീരത്തിനുള്ളിലുണ്ടെങ്കിൽ അത് ഡോക്ടറെയും റേഡിയോഗ്രാഫറെയും നിർബന്ധമായും അറിയിക്കണം. ഇത്തരം വസ്തുക്കളെ കാന്തികമണ്ഡലം ആകർഷിക്കുകയോ പ്രവർത്തനരഹിതമാക്കുകയോ ചെയ്യാം. ഗർഭിണികളും മുലയൂട്ടുന്ന അമ്മമാരും: ഗർഭിണികൾ എംആർഐ സ്കാനിങ്ങിന് മുൻപ് ഡോക്ടറെ വിവരമറിയിക്കണം. സാധാരണയായി ഗർഭകാലത്ത് എംആർഐ സുരക്ഷിതമാണെങ്കിലും, ആദ്യ മൂന്ന് മാസങ്ങളിൽ ഇത് ഒഴിവാക്കാൻ നിർദേശിക്കാറുണ്ട്.