ഇന്ത്യൻ ബഹിരാകാശ ചരിത്രത്തിൽ പുതിയ അധ്യായം കുറിച്ച് ശുഭാംശു ശുക്ല തിരിച്ചെത്തി

 കാലിഫോർണിയ: ഇന്ത്യൻ വ്യോമസേന ഗ്രൂപ്പ് ക്യാപ്റ്റൻ ശുഭാംശു ശുക്ല ഉൾപ്പെടെയുള്ള ആക്സിയം 4 ദൗത്യസംഘം ഭൂമിയിൽ തിരിച്ചെത്തി. ഏറെ ആകാംഷയോടെ കാത്തിരുന്ന ക്രൂ ഡ്രാഗൺ ഗ്രേസ് പേടകം ഇന്ത്യൻ സമയം വൈകീട്ട് 3.3-ഓടെ അമേരിക്കൻ തീരത്തുള്ള തെക്കൻ കാലിഫോർണിയയിലെ പസഫിക് സമുദ്രത്തിൽ വിജയകരമായി വന്നിറങ്ങി.

ശുഭാംശു ശുക്ലയെയും സംഘത്തെയും തുടർന്ന് ഹൂസ്റ്റണിലെ ജോൺസൺ സ്‌പേസ് സെന്ററിലേക്ക് മാറ്റും. ഇവിടെ ഒരാഴ്ചയോളം മെഡിക്കൽ വിദഗ്ധരുടെ നിരീക്ഷണത്തിൽ യാത്രികർ വിശ്രമിക്കും.

ഈ ദൗത്യത്തിൽ ശുഭാംശു ശുക്ലയെ കൂടാതെ മുതിർന്ന അമേരിക്കൻ ബഹിരാകാശ സഞ്ചാരിയായ പെഗ്ഗി വിറ്റ്സൺ, പോളണ്ട് സ്വദേശി സ്ലാവോസ് ഉസ്നാൻസ്‌കി, ഹംഗറിയിൽ നിന്നുള്ള ടിബോർ കാപു എന്നിവരും അംഗങ്ങളായിരുന്നു. ഡ്രാഗൺ പേടകം വീണ്ടെടുത്ത് സ്പേസ് എക്‌സിൻ്റെ എംവി ഷാനോൺ കപ്പലാണ് കരയ്‌ക്കെത്തിച്ചത്.

രണ്ടാഴ്ചത്തെ ബഹിരാകാശ ദൗത്യത്തിനുശേഷം ഭൂമിയിലെ ഗുരുത്വാകർഷണവും മറ്റ് സാഹചര്യങ്ങളുമായി പൊരുത്തപ്പെടാൻ സഹായിക്കുന്ന പോസ്റ്റ്-ഫ്ലൈറ്റ് റീഹാബിലിറ്റേഷൻ പൂർത്തിയാക്കിയ ശേഷമാണ് ശുഭാംശു ശുക്ല ഇന്ത്യയിലേക്ക് മടങ്ങുക. നാസയുടെ ഹ്യൂമൻ ഹെൽത്ത് ആൻഡ് പെർഫോമൻസ് ടീം യാത്രികരുടെ ശാരീരികക്ഷമത, സന്തുലിതാവസ്ഥ, റിഫ്ലെക്സുകൾ, ഹൃദയസംബന്ധമായ പ്രവർത്തനങ്ങൾ, രോഗപ്രതിരോധ ശേഷി എന്നിവയുൾപ്പെടെയുള്ള നിരവധി പരിശോധനകളും വിലയിരുത്തലുകളും നടത്തും.