ഊട്ടിയിൽനിന്ന് മോഷ്ടിച്ച കാർ കടത്തിയെന്ന സംശയം: കണ്ടെയ്‌നർ ലോറി കൊച്ചിയിൽ പിടിയിൽ; പ്രതികളിലൊരാൾ ശുചിമുറിയിൽനിന്ന് ചാടിപ്പോയി

കൊച്ചി: ഊട്ടിയിൽനിന്ന് മോഷ്ടിച്ച കാർ കടത്തിക്കൊണ്ടു വരുന്നുവെന്ന രഹസ്യവിവരത്തിൻ്റെ അടിസ്ഥാനത്തിൽ രാജസ്ഥാൻ രജിസ്ട്രേഷനുള്ള ഒരു കണ്ടെയ്‌നർ ലോറി പനങ്ങാട് പോലീസ് പിടികൂടി. ലോറിയിലുണ്ടായിരുന്ന മൂന്ന് രാജസ്ഥാൻ സ്വദേശികളെ കസ്റ്റഡിയിലെടുത്തെങ്കിലും, ചോദ്യം ചെയ്യലിനിടെ ഒരാൾ പോലീസ് സ്റ്റേഷനിലെ ശുചിമുറിയിൽനിന്ന് ചാടിപ്പോയത് പോലീസിന് തലവേദനയായി.

നെട്ടൂരിൽ വെച്ചാണ് പോലീസ് ലോറി തടഞ്ഞത്. മോഷ്ടിച്ച കാറുമായി ലോറി വരുന്നുവെന്ന് നമ്പർ സഹിതം പോലീസിന് രഹസ്യവിവരം ലഭിച്ചിരുന്നു. ലോറി പരിശോധിച്ചപ്പോൾ തുടക്കത്തിൽ എസിയും അനുബന്ധ ഉപകരണങ്ങളുമാണ് കണ്ടെത്തിയത്. എന്നാൽ, കൂടുതൽ വിശദമായ പരിശോധനയിൽ ലോറിയിൽനിന്ന് ഒരു ഗ്യാസ് കട്ടർ കണ്ടെടുക്കുകയായിരുന്നു. ഒരു കാറാണോ അതോ ഒന്നിലധികം കാറുകളാണോ കടത്തിയത് എന്ന കാര്യത്തിൽ നിലവിൽ വ്യക്തതയില്ല. കടത്തിക്കൊണ്ടു വന്ന കാർ മറ്റെവിടെയെങ്കിലും ഇറക്കിയോ എന്നതടക്കമുള്ള വിവരങ്ങൾ അറിയാൻ പോലീസ് കസ്റ്റഡിയിലുള്ള മറ്റ് പ്രതികളെ വിശദമായി ചോദ്യം ചെയ്തുകൊണ്ടിരിക്കുകയാണ്.

ലോറിയിലുണ്ടായിരുന്ന മൂന്ന് രാജസ്ഥാൻ സ്വദേശികളെയാണ് പനങ്ങാട് സ്റ്റേഷനിലെത്തിച്ച് ചോദ്യം ചെയ്യാൻ ആരംഭിച്ചത്. ഇതിനിടെ, കൂട്ടത്തിലൊരാൾ ശുചിമുറിയിൽ പോവുകയും അവിടുത്തെ ജനാല ഇളക്കി പുറത്തേക്ക് ചാടി രക്ഷപ്പെടുകയും ചെയ്തതായാണ് വിവരം. ഇക്കാര്യത്തിൽ പോലീസ് കൂടുതൽ വിവരങ്ങൾ ഔദ്യോഗികമായി പുറത്തുവിട്ടിട്ടില്ല. രക്ഷപ്പെട്ട പ്രതിയെക്കുറിച്ചും കസ്റ്റഡിയിലുള്ളവരെക്കുറിച്ചും കൂടുതൽ വിവരങ്ങൾ ലഭ്യമാക്കുന്നതിനായി രാജസ്ഥാൻ പോലീസുമായി ബന്ധപ്പെട്ട് അന്വേഷണം നടന്നുവരികയാണെന്ന് അധികൃതർ അറിയിച്ചു.