മൃതദേഹങ്ങൾ കൂട്ടത്തോടെ മറവ് ചെയ്തെന്ന വെളിപ്പെടുത്തലിൽ അന്വേഷണത്തിന് പ്രത്യേക സംഘം രൂപീകരിച്ച് കര്‍ണാടക സർക്കാർ

ബംഗ്ളൂരു: ധർമ്മസ്ഥലയിൽ മൃതദേഹങ്ങൾ കൂട്ടത്തോടെ മറവ് ചെയ്തെന്ന വെളിപ്പെടുത്തലിൽ അന്വേഷണത്തിന് പ്രത്യേക സംഘം രൂപീകരിച്ച് കര്‍ണാടക സർക്കാർ ഉത്തരവിറക്കി. ഡിജിപി പ്രണബ് മൊഹന്തി പ്രത്യേക അന്വേഷണ സംഘത്തിന് നേതൃത്വം നൽകും. ഐജി എം എൻ അനുചേത്, ഡിസിപി സൗമ്യലത, എസ് പി ജിതേന്ദ്രകുമാർ ദായം എന്നിവരാണ് അന്വേഷണ സംഘത്തിലെ അംഗങ്ങൾ.

ധർമസ്ഥലയെന്ന ക്ഷേത്ര പട്ടണത്തിൽ സ്ത്രീകളും കുട്ടികളുമായി നൂറിലധികം പേരുടെ മൃതദേഹം കുഴിച്ചുമൂടേണ്ടി വന്നെന്ന ഗുരുതരമായ വെളിപ്പെടുത്തൽ മുൻ ശുചീകരണത്തൊഴിലാളി നടത്തുമ്പോഴും പൊലീസ് സംവിധാനം നിശ്ചലമാണ്. മൃതദേഹം പലതും കുഴിച്ചുമൂടിയെന്ന് സാക്ഷി വെളിപ്പെടുത്തിയ മൂന്ന് പ്രധാന ഇടങ്ങളും പൊലീസ് അടച്ചുകെട്ടുകയോ സുരക്ഷിതമാക്കുകയോ ചെയ്തിട്ടില്ല. പൊലീസിന് ധർമസ്ഥല ക്ഷേത്രാധികാരികളെ ഭയമാണെന്നും തെളിവ് നശിപ്പിക്കാൻ മൃതദേഹം പലതും ഇവിടെ നിന്ന് മാറ്റാൻ നീക്കമുണ്ടെന്നും പ്രാദേശിക ഹിന്ദുസംഘടനാ നേതാക്കൾ പറഞ്ഞു.