കോവിഡ് വകഭേദങ്ങൾ വളരെ വേഗത്തിൽ കേരളത്തിൽ പടരുന്നു,ആരോഗ്യ പ്രശ്നങ്ങൾ ഉള്ളവർ കർശന ജാഗ്രത പുലർത്തണമെന്ന് നിർദ്ദേശം

തിരുവനന്തപുരം: വീട്ടിൽ നിന്ന് പുറത്ത് പോകുമ്പോൾ ഇനി മാസ്ക് ധരിക്കാൻ മറക്കേണ്ട. സിംഗപൂർ, തായ്ലൻഡ്, ചൈന തുടങ്ങിയ തെക്കുകിഴക്കൻ ഏഷ്യൻ രാജ്യങ്ങൾ പോലെ കേരളത്തിലും കോവിഡ് കേസുകൾ വർധിച്ചു വരുന്നുവെന്നാണ് റിപ്പോര്‍ട്ട്.

ഒമിക്രോൺ ജെഎൻ1 സബ്-വകഭേദങ്ങളായ എൽഎഫ്.7, എൻബി1 എന്നിവയാണ് ഇപ്പോഴത്തെ വ്യാപനത്തിന് പിന്നിൽ. ഈ വകഭേദങ്ങൾ വളരെ വേഗത്തിൽ പടരുന്നുവെങ്കിലും, ഗുരുതരമായ ആരോഗ്യ പ്രശ്നങ്ങൾ ഉണ്ടാക്കുന്നില്ലെന്ന് വിദഗ്ധർ പറയുന്നു.

ഇന്ത്യയിലും കേസുകൾ ക്രമാനുഗതമായി വർധിച്ചുവരികയാണ്. കേരളം ഏറ്റവും കൂടുതൽ കേസുകൾ റിപ്പോർട്ട് ചെയ്യുന്ന സംസ്ഥാനമാണ്. തൊട്ടുപിന്നിൽ‌ മഹാരാഷ്ട്രയും തമിഴ്‌നാടും. മെയ് മാസത്തിൽ ഇതുവരെ കേരളത്തിൽ 182 കേസുകൾ റിപ്പോർട്ട് ചെയ്തിട്ടുണ്ട്. കോട്ടയം (57), എറണാകുളം (34), തിരുവനന്തപുരം (30) എന്നിവിടങ്ങളിലാണു കൂടുതലായി കേസുകൾ റിപ്പോർട്ട് ചെയ്തത്.

'നിലവിൽ രോഗികൾക്ക് നേരിയ ലക്ഷണങ്ങൾ മാത്രമാണ് കാണിക്കുന്നത്. സാധാരണയായി ആശുപത്രിവാസം ആവശ്യമില്ല, ചിലർക്ക് ക്ഷീണവും ശരീരവേദനയും അനുഭവപ്പെടാം. എന്നാൽ, രണ്ടോ മൂന്നോ ദിവസത്തിനുള്ളിൽ അവർ സുഖം പ്രാപിക്കുന്നു,' ഐഎംഎ ഗവേഷണ സെൽ കൺവീനർ ഡോ. രാജീവ് ജയദേവൻ പറഞ്ഞു.സംസ്ഥാനത്ത് പനി കേസുകൾ കൂടുതലായതിനാൽ തിരക്കേറിയ സ്ഥലങ്ങൾ ഒഴിവാക്കണമെന്നും, മാസ്ക് ധരിക്കണമെന്നും, മുൻകരുതലുകൾ എടുക്കണമെന്നും വിദഗ്ധർ അഭിപ്രായപ്പെടുന്നു. 'കോവിഡ് ഒരു ചാക്രിക വൈറൽ രോഗമാണ്, സീസണൽ അല്ല,' ഡോ. രാജീവ് വിശദീകരിക്കുന്നു. സീസണൽ രോഗങ്ങൾ ഒരു പ്രത്യേക സീസണിൽ മാത്രമേ കാണപ്പെടൂ.

വാക്സിനുകളും ജീവിതശൈലി മാറ്റങ്ങളും ഉപയോഗിച്ച് നിയന്ത്രിക്കപ്പെട്ടാൽ എല്ലാ മഹാമാരികളും എൻഡമിക് ആയി മാറുമെന്ന് പൊതുജനാരോഗ്യ വിദഗ്ധനായ ഡോ. ബി ഇക്ബാൽ പറയുന്നു. 'പുതിയ വകഭേദങ്ങൾ രൂപപ്പെട്ടുവന്നാലും മിക്കവാറും തീവ്രത കുറവായിരിക്കും,' അദ്ദേഹം പറഞ്ഞു.എന്നിരുന്നാലും, ദുർബലരായ രോഗികൾക്ക് കോവിഡ് പിടിപെട്ടാൽ ഫലം ഗുരുതരമായേക്കാം, അതിനാൽ അവർ കൂടുതൽ മുൻകരുതലുകൾ എടുക്കണമെന്ന് ഡോ. രാജീവ് കൂട്ടിച്ചേർത്തു. 'വൈറസ് ബാധിച്ച ഒരാളുമായി നിങ്ങൾ സമ്പർക്കം പുലർത്തുകയാണെങ്കിൽ, അത് എളുപ്പത്തിൽ നിങ്ങളിലേക്ക് എത്തിച്ചേരും.

അതിനാൽ സാമൂഹിക അകലം പാലിക്കുകയും, തിരക്കേറിയ സ്ഥലങ്ങളിൽ മാസ്ക് ധരിക്കുകയും ചെയ്യുക. നിങ്ങൾക്ക് പനി ഉണ്ടെങ്കിൽ, വീട്ടിൽ തന്നെ തുടരാനും മറ്റുള്ളവരുമായി ഇടപഴകുന്നത് ഒഴിവാക്കാനും ശുപാർശ ചെയ്യുന്നു. ആശുപത്രികളിലെ സന്ദർശനങ്ങൾ ഒഴിവാക്കുക, ഇതും വ്യാപനത്തിന് കാരണമാകും,' ഡോ. രാജീവ് മുന്നറിയിപ്പ് നൽകുന്നു.