തിരുവനന്തപുരം : സംസ്ഥാനത്ത് മലയാളം ഔദ്യോഗിക ഭാഷയാക്കാന്‍ പത്തുവര്‍ഷമായി നടത്തുന്ന ശ്രമങ്ങള്‍ക്കാണു രാഷ്ട്രപതിയുടെ നടപടിയോടെ വിരാമമായിരിക്കുന്നത്. 2015ല്‍ സംസ്ഥാന നിയമസഭ പാസാക്കിയ മലയാള ഭാഷ (വ്യാപനവും പരിപോഷണവും) ബില്ലിന് രാഷ്ട്രപതി അംഗീകാരം നല്‍കിയില്ല. ഇതു സംബന്ധിച്ചുള്ള അറിയിപ്പു ലഭിച്ചുവെന്നും ഇതിൽ കാരണമൊന്നും അറിയിച്ചിട്ടില്ലെന്നും രാജ്ഭവന്‍ വ‌ൃത്തങ്ങൾ വ്യക്തമാക്കി.
2015ല്‍ മുഖ്യമന്ത്രി ഉമ്മന്‍ ചാണ്ടിക്കു വേണ്ടി മന്ത്രി കെ.സി.ജോസഫ് നിയമസഭയില്‍ അവതരിപ്പിച്ച ബില്‍ വിശദമായ ചര്‍ച്ചകള്‍ക്കു ശേഷമാണ് പാസാക്കിയത്. ഭാരതത്തിന്റെ ഭരണഘടനയ്ക്കു വിധേയമായി കേരള സംസ്ഥാനത്തിന്റെ ഔദ്യോഗിക ഭാഷയായി മലയാള ഭാഷയെ സ്വീകരിക്കുന്നതിനും എല്ലാ ഔദ്യോഗിക ആവശ്യങ്ങള്‍ക്കും മലയാളം ഉപയോഗിക്കുന്നതിനും കേരളത്തിന്റെ സമസ്ത മേഖലകളിലും മലയാള ഭാഷയുടെ ഉപയോഗം വ്യവസ്ഥ ചെയ്യുന്നതിനും മലയാള ഭാഷയുടെ വളര്‍ച്ചയും വ്യാപനവും പരിപോഷണവും പരിപാലനവും ഉറപ്പുവരുത്തുന്നതിനു നിയമമുണ്ടാക്കുന്നുവെന്നാണ് ബില്ലില്‍ പറഞ്ഞിരുന്നത്. സെക്രട്ടേറിയറ്റിലെ നിലവിലുള്ള ഉദ്യോഗസ്ഥ ഭരണ പരിഷ്‌കാര (ഔദ്യോഗിക ഭാഷ) വകുപ്പിനെ മലയാള ഭാഷാ വികസന വകുപ്പ് എന്നു പുനര്‍നാമകരണം ചെയ്യുന്നുവെന്നും വകുപ്പിനാണ് ബില്ലിന്റെ നിര്‍വഹണച്ചുമതലയെന്നും വ്യക്തമാക്കിയിരുന്നു. ബില്ലിനു രാഷ്ട്രപതി അംഗീകാരം നല്‍കാതിരുന്നതോടെ മലയാള ഭാഷാ വകുപ്പ് എന്ന സങ്കല്‍പ്പം തന്നെ ഇല്ലാതായി.
എന്തായിരുന്നു ബില്‍?
സംസ്ഥാന നിയമസഭയില്‍ അവതരിപ്പിക്കുന്ന ബില്ലുകള്‍, സഭ പാസാക്കുന്ന നിയമങ്ങള്‍, ഓര്‍ഡിനന്‍സുകള്‍, സര്‍ക്കാര്‍ ഉത്തരവുകള്‍, ചട്ടങ്ങള്‍ റെഗുലേഷന്‍, ബൈലോ എന്നിവയില്‍ മലയാള ഭാഷ ഉപയോഗിക്കണമെന്നും ബില്ലില്‍ പറയുന്നു. ഇംഗ്ലിഷില്‍ പ്രസിദ്ധീകരിച്ചിട്ടുള്ള പ്രധാനപ്പെട്ട കേന്ദ്ര, സംസ്ഥാന നിയമങ്ങള്‍, അവയുടെ ഭേദഗതികള്‍ എന്നിവ മലയാളത്തിലേക്കു തര്‍ജമ ചെയ്യണം. ഇംഗ്ലിഷില്‍ പ്രസിദ്ധീകരിച്ച ചട്ടങ്ങളുടെ മലയാള പരിഭാഷ വേണമെന്നും ബില്ലില്‍ വ്യക്തമാക്കി. സംസ്ഥാനത്തെ എല്ലാ ഔദ്യോഗികാവശ്യങ്ങള്‍ക്കും ഉപയോഗിക്കേണ്ടത് മലയാളഭാഷയാണെന്നു ബില്ലില്‍ വ്യക്തമായി പറഞ്ഞിരുന്നു. അതേസമയം, ഭാഷാ ന്യൂനപക്ഷ പ്രദേശങ്ങളിലെ സര്‍ക്കാര്‍ ഓഫിസുകളിലും സ്ഥാപനങ്ങളിലും മലയാളത്തോടൊപ്പം അതതിടത്തെ ന്യൂനപക്ഷ ഭാഷയും ഉപയോഗിക്കാം. സര്‍ക്കാര്‍ വകുപ്പുകള്‍ക്കുപുറമെ അര്‍ധസര്‍ക്കാര്‍ സ്ഥാപനങ്ങള്‍, പൊതുമേഖല, സ്വയംഭരണ, സഹകരണസ്ഥാപനങ്ങള്‍ എന്നിവക്കെല്ലാം ഇതു ബാധകമാകുമെന്നും ബില്ലില്‍ വ്യക്തമാക്കിയിരുന്നു.
എല്ലാ സര്‍ക്കാര്‍, എയ്ഡഡ് സ്‌കൂളുകളിലും പത്താംതരം വരെ നിര്‍ബന്ധിത ഒന്നാം ഭാഷ മലയാളം ആയിരിക്കണമെന്നും സംസ്ഥാനത്തെ എല്ലാ സ്‌കൂളുകളിലും മലയാള ഭാഷ പ്രോത്സാഹിപ്പിക്കുന്നതിനുള്ള നടപടികള്‍ സ്വീകരിക്കണമെന്നും ബില്ലില്‍ പറഞ്ഞിരുന്നു. എന്നാല്‍ ഇതരസംസ്ഥാനങ്ങളില്‍നിന്നും വിദേശരാജ്യങ്ങളിൽനിന്നും സംസ്ഥാനത്തു വന്നു പഠിക്കുന്ന മലയാളികള്‍ അല്ലാത്ത വിദ്യാര്‍ഥികളെ 9, 10 ക്ലാസുകളിലും ഹയര്‍സെക്കന്‍ഡറി തലത്തിലും മലയാളം പരീക്ഷ എഴുതുന്നതില്‍നിന്ന് ഒഴിവാക്കണം. ഏകീകൃതലിപി വിന്യാസം നിര്‍ണയിക്കപ്പെടാവുന്ന പ്രകാരം നടപ്പാക്കണമെന്നും ബില്ലില്‍ പറഞ്ഞിരുന്നു.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ 🔰Dailymalayaly യുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.