പൊടിക്കാറ്റ് ഭീഷണി; സൗദിയുടെ വിവിധ പ്രദേശങ്ങളിൽ കാലാവസ്ഥാ മുന്നറിയിപ്പ്

റിയാദ്: സൗദി അറേബ്യയുടെ വിവിധ ഭാഗങ്ങളിൽ ഇന്ന് ശക്തമായ പൊടിക്കാറ്റിനും മഴയ്ക്കും സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം മുന്നറിയിപ്പ് നൽകി.

മക്ക, മദീന, റിയാദ് കിഴക്കൻ പ്രവിശ്യ, ഖസീം, ഹായിൽ, തബൂക്ക്, എന്നിവിടങ്ങളിലെ തീരദേശ പ്രദേശങ്ങളിൽ പൊടിപടലങ്ങൾ ഉയരാനും തിരശ്ചീന ദൃശ്യപരത കുറയാനും സാധ്യതയുണ്ട്.

ജിദ്ദ, റാബിഗ്, അൽ-ലിത്, ബഹ്‌റ (അൽ-ഷുയിബ) ഗവർണറേറ്റുകളിൽ മണിക്കൂറിൽ 40-49 കിലോമീറ്റർ വരെ വേഗതയിൽ ശക്തമായ കാറ്റ് വീശാൻ സാധ്യതയുണ്ട്. ഇത് തിരശ്ചീന ദൃശ്യപരത കുറയുന്നതിനും ചെങ്കടലിൽ ഉയർന്ന തിരമാലകൾ രൂപപ്പെടുന്നതിനും കാരണമാകും. ഈ അവസ്ഥയും വൈകുന്നേരം വരെ തുടരുമെന്ന് കാലാവസ്ഥാ കേന്ദ്രം അറിയിച്ചു.

തബൂക്ക് മേഖലയിലെ അൽ-ബിദ്, ഹഖ്ൽ, ദുബ, നിയോം ശർമ്മ, അൽ-വാജ്, ഉംലുജ് എന്നിവിടങ്ങളിൽ ഇന്ന് ശക്തമായ കാറ്റ് വീശുമെന്ന് പ്രാദേശിക കാലാവസ്ഥാ കേന്ദ്രം പ്രത്യേകം മുന്നറിയിപ്പ് നൽകിയിട്ടുണ്ട്. ഇവിടെ മണിക്കൂറിൽ 40-49 കിലോമീറ്റർ വരെ വേഗതയിൽ കാറ്റ് വീശാനും തിരശ്ചീന ദൃശ്യപരത കുറയാനും ഉയർന്ന തിരമാലകൾ രൂപപ്പെടാനും സാധ്യതയുണ്ട്.

നജ്‌റാൻ നഗരത്തിലും ബദർ അൽ ജനൂബ്, ഥാർ, യദാമ, ഖബ്ബാസ്, ഹബൂന എന്നീ ഗവർണറേറ്റുകളിലും പൊടിക്കാറ്റ് വീശാൻ സാധ്യതയുണ്ടെന്നും ഇത് തിരശ്ചീന ദൃശ്യപരത 3-5 കിലോമീറ്ററായി കുറയ്ക്കുമെന്നും കേന്ദ്രം അറിയിച്ചു.രാജ്യത്തിന്റെ തെക്കുപടിഞ്ഞാറൻ ഭാഗങ്ങളിലെ ഉയർന്ന പ്രദേശങ്ങളിൽ ഇടിമിന്നലോട് കൂടിയ മഴയ്ക്കും കാറ്റിനും സാധ്യതയുണ്ടെന്നും കാലാവസ്ഥാ റിപ്പോർട്ടിൽ പറയുന്നു.

ചെങ്കടലിൽ, വടക്ക്, മധ്യ ഭാഗങ്ങളിൽ വടക്ക് പടിഞ്ഞാറ് മുതൽ വടക്കുകിഴക്ക് ദിശയിൽ മണിക്കൂറിൽ 20-40 കിലോമീറ്റർ വേഗതയിലും, തെക്ക് ഭാഗത്ത് പടിഞ്ഞാറ് മുതൽ വടക്ക് പടിഞ്ഞാറ് ദിശയിൽ മണിക്കൂറിൽ 15-30 കിലോമീറ്റർ വേഗതയിലുമായിരിക്കും ഉപരിതല കാറ്റിന്റെ ചലനം.അറേബ്യൻ ഗൾഫിൽ, വടക്ക് പടിഞ്ഞാറ് ദിശയിൽ മണിക്കൂറിൽ 28-45 കിലോമീറ്റർ വേഗതയിൽ കാറ്റ് വീശാനും തിരമാലകളുടെ ഉയരം ഒന്നര മുതൽ രണ്ടര മീറ്റർ വരെ ഉയരാനും സാധ്യതയുണ്ട്.

പൊടിക്കാറ്റും ശക്തമായ കാറ്റും വീശാൻ സാധ്യതയുള്ള പ്രദേശങ്ങളിലെ താമസക്കാർ ജാഗ്രത പാലിക്കണമെന്നും അധികൃതരുടെ നിർദ്ദേശങ്ങൾ അനുസരിക്കണമെന്നും ദേശീയ കാലാവസ്ഥാ കേന്ദ്രം അഭ്യർത്ഥിച്ചു. ദൂരയാത്രകൾ ഒഴിവാക്കാനും, വാഹനങ്ങൾ ശ്രദ്ധയോടെ ഓടിക്കാനും, ശ്വാസകോശ സംബന്ധമായ അസുഖങ്ങളുള്ളവർ പ്രത്യേക ശ്രദ്ധ ചെലുത്താനും നിർദ്ദേശമുണ്ട്