സൗദി അറേബ്യയിലുടനീളം കനത്ത മഴക്കും വെള്ളപ്പൊക്കത്തിനും സാധ്യത; ആവശ്യമായ മുൻകരുതലുകൾ എടുക്കാൻ നിർദേശം

റിയാദ്: മക്കയിലും റിയാദിലും മഴയ്ക്കും വെള്ളം കയറുന്നതിനും സാധ്യതയുണ്ടെന്ന് സിവിൽ ഡിഫൻസ് വകുപ്പ്.

ചൊവ്വാഴ്ച വരെ രാജ്യത്തിന്റെ പല ഭാഗത്തും കനത്ത മഴയ്ക്കും വെള്ളപ്പൊക്കത്തിനും സാധ്യതയുണ്ടെന്ന് സൗദി അറേബ്യയുടെ സിവിൽ ഡിഫൻസ് മുന്നറിയിപ്പ് നൽകി.

സൗദി പ്രസ് ഏജൻസി നടത്തിയ റിപ്പോർട്ട് പ്രകാരം മക്കയിൽ മിതമായതോ കനത്തതോ ആയ മഴക്കൊപ്പം ആലിപ്പഴ വർഷവും ശക്തമായ കാറ്റും ഉണ്ടാകാൻ സാധ്യതയുണ്ടെന്ന് ഡയറക്ടറേറ്റ് അറിയിച്ചു. റിയാദിൽ മിതമായതോ കനത്തതോ ആയ മഴയും തെക്കുപടിഞ്ഞാറൻ നജ്‌റാനിൽ നേരിയ മഴയും ഉണ്ടാകുമെന്ന് പ്രതീക്ഷിക്കുന്നു. മദീന, അൽ-ബഹ, അസീർ, ജിസാൻ, സെൻട്രൽ ഖസീം, ഹായിൽ, വടക്കൻ അതിർത്തികൾ, കിഴക്കൻ പ്രവിശ്യ എന്നിവയുടെ പടിഞ്ഞാറൻ പ്രദേശങ്ങളിലും മഴയ്ക്ക് സാധ്യതയുണ്ട്.

ആവശ്യമായ മുൻകരുതലുകൾ എടുക്കാനും വെള്ളപ്പൊക്ക സാധ്യതയുള്ള പ്രദേശങ്ങളിൽനിന്നു മാറിനിൽക്കുവാനും വിവിധ മാധ്യമ ചാനലുകൾ വഴി പങ്കിടുന്ന സുരക്ഷാ മാർഗ്ഗനിർദ്ദേശങ്ങൾ പാലിക്കാനും സൗദികളും പ്രവാസികളും അടക്കം രാജ്യത്തു താമസിക്കുന്ന എല്ലാവരോടും നിർദ്ദേശിക്കുന്നതായി സിവിൽ ഡിഫൻസ് അധികൃതർ പറഞ്ഞു.