കോട്ടയത്ത് കൊടും വളവിൽ ലോറി മറിഞ്ഞുണ്ടായ അപകടത്തിൽ മൂന്ന് പേർക്ക് പരിക്ക്

മല്ലപ്പള്ളി (കോട്ടയം): മല്ലപ്പള്ളിയിൽ സ്വകാര്യ സൂപ്പർ മാർക്കറ്റിലേക്ക് വന്ന ലോറി തോട്ടിലേക്ക് മറിഞ്ഞ് അപകടം.

പരിയാരം മല്ലപ്പള്ളി റോഡിൽ ബിഎസ്എൻഎൽ ഓഫീസിന് സമീപമുള്ള കൊടും വളവിൽ ഞായറാഴ്ച രാവിലെ പത്തുമണിക്കായിരുന്നു സംഭവം. അപകടത്തിൽ മൂന്നുപേർക്ക് പരിക്കേറ്റു.

ഇറക്കത്തിൽ നിയന്ത്രണംവിട്ട ലോറി പാലത്തിൻ്റെ സംരക്ഷണ കെട്ടും കമ്പിവേലിയും തകർത്ത് ആറ് മീറ്റർ താഴ്ചയിലേക്ക് പതിക്കുകയായിരുന്നു. പരിക്കേറ്റ ഡ്രൈവറേയും രണ്ട് ചുമട്ട് തൊഴിലാളികളെയും അടുത്തുള്ള സ്വകാര്യ ആശുപത്രിയിൽ പ്രവേശിപ്പിച്ചു. കഴിഞ്ഞ ദിവസം ഇതേ സ്ഥലത്ത് സ്കൂട്ടർ ഇടിച്ചുണ്ടായ അപകടത്തിൽ ഒരു അധ്യാപകൻ മരിച്ചിരുന്നു.