എടപ്പാളിൽ നിർത്തിയിട്ട കാർ പിന്നോട്ട് നീങ്ങി അപകടം; നാല് വയസ്സുകാരിക്ക് ദാരുണാന്ത്യം, മൂന്ന് പേർക്ക് പരിക്ക്

എടപ്പാൾ: എടപ്പാൾ ഗവൺമെൻ്റ് ഹയർ സെക്കൻഡറി സ്കൂളിന് സമീപം വീട്ടിൽ നിർത്തിയിട്ടിരുന്ന കാർ പിന്നോട്ടെടുത്ത് അപകടമുണ്ടായതിനെ തുടർന്ന് നാല് വയസ്സുകാരി മരിച്ചു. അപകടത്തിൽ മൂന്ന് പേർക്ക് പരിക്കേറ്റു.

കഴിഞ്ഞ ദിവസം രാത്രിയുണ്ടായ അപകടത്തിൽ മഠത്തിൽ വീട്ടിൽ ജാബിറിൻ്റെ മകൾ അംറു ബിൻത് ജാബിറാണ് മരിച്ചത്. പരിക്കേറ്റ നാലുപേരെയും ഉടൻ തന്നെ എടപ്പാളിലെ ആശുപത്രിയിൽ പ്രവേശിപ്പിച്ചെങ്കിലും അംറുവിൻ്റെ ജീവൻ രക്ഷിക്കാനായില്ല.

ഗുരുതരമായി പരിക്കേറ്റ മഠത്തിൽ വീട്ടിൽ ഷാഹിറിൻ്റെ മകൾ ആലിയയെ കോട്ടക്കലിലെ മിംസ് ആശുപത്രിയിലേക്ക് മാറ്റി. അപകടത്തിൽ പരിക്കേറ്റ സിത്താര (46), സുബൈദ (61) എന്നിവർ എടപ്പാളിലെ സ്വകാര്യ ആശുപത്രിയിൽ ചികിത്സയിലാണ്.