പാകിസ്ഥാനിൽ 'അജ്ഞാതന്റെ' വിളയാട്ടം : ഐ.എസ്.ഐ സഹായി ബലൂചിസ്ഥാനിൽ വെടിയേറ്റു മരിച്ചു

തീവ്രവാദ പ്രവർത്തനങ്ങളിലും മനുഷ്യക്കടത്തിലും പങ്കുണ്ടെന്ന് ആരോപിക്കപ്പെടുന്ന പാകിസ്ഥാൻ പൗരനും മതപുരോഹിതനുമായ മുഫ്തി ഷാ മിർ ബലൂചിസ്ഥാനിൽ വെടിയേറ്റ് മരിച്ചു. ഇദ്ദേഹം പാകിസ്ഥാൻ്റെ രഹസ്യാന്വേഷണ ഏജൻസിയായ ഐ.എസ്.ഐയുമായി അടുത്ത ബന്ധം പുലർത്തിയിരുന്നു. ഇറാനിൽ നിന്നും മുൻ ഇന്ത്യൻ നാവിക ഉദ്യോഗസ്ഥൻ കുൽഭൂഷൺ ജാദവിനെ തട്ടിക്കൊണ്ട് വരുന്നതിന് ഐ.എസ്.ഐയെ സഹായിച്ചത് ഇദ്ദേഹമാണെന്ന് പറയപ്പെടുന്നു.

മുൻപും രണ്ട് തവണ ഇദ്ദേഹത്തെ വധിക്കാൻ ശ്രമം നടന്നിട്ടുണ്ട്. ജാമിയത്ത് ഉലമ-ഇ-ഇസ്ലാം (ജെയുഐ) എന്ന മത സംഘടനയിലെ അംഗമായ ഇദ്ദേഹം മതപുരോഹിതൻ്റെ വേഷത്തിൽ ആയുധ-മനുഷ്യക്കടത്ത് കച്ചവടങ്ങൾ നടത്തിയിരുന്നു.

തുർബത്തിലെ ഒരു പള്ളിയിൽ നിന്നും പ്രാർത്ഥന കഴിഞ്ഞ് മടങ്ങവേ അജ്ഞാതരായ തോക്കുധാരികളാണ് മിറിനെ ആക്രമിച്ചത്. തോക്കുധാരികൾ വളരെ അടുത്ത ദൂരത്തുനിന്ന് നിരവധി തവണ വെടിയുതിർത്തു.

ആശുപത്രിയിൽ എത്തിച്ചെങ്കിലും അദ്ദേഹത്തിൻ്റെ ജീവൻ രക്ഷിക്കാനായില്ല. പാകിസ്ഥാനിലെ തീവ്രവാദ ക്യാമ്പുകൾ ഇദ്ദേഹം സ്ഥിരമായി സന്ദർശിക്കുകയും അതിർത്തി കടന്ന് ഇന്ത്യയിലേക്ക് നുഴഞ്ഞുകയറാൻ തീവ്രവാദികളെ സഹായിക്കുകയും ചെയ്തിരുന്നു.

പാകിസ്ഥാനിൽ അടുത്ത കാലത്തായി നിരവധി തീവ്രവാദികൾ കൊല്ലപ്പെട്ടിരുന്നു. ഇതിന് പിന്നിൽ പ്രവർത്തിച്ചത് ഇതേ തോക്കുധാരികളാണെന്നാണ് റിപ്പോർട്ടുകൾ സൂചിപ്പിക്കുന്നത്.

എന്തായിരുന്നു കുൽഭൂഷൺ ജാദവ് കേസ്

ഇന്ത്യൻ പൗരനും മുൻ നാവികസേനാ ഉദ്യോഗസ്ഥനുമായ കുൽഭൂഷൺ ജാദവിനെ പാകിസ്താൻ ചാരനെന്ന് ആരോപിച്ച് തടവിലാക്കുകയും വധശിക്ഷ വിധിക്കുകയും ചെയ്ത സംഭവമാണ്. 2016 മാർച്ച് 3-ന് ബലൂചിസ്ഥാനിൽ വെച്ച് പാകിസ്താൻ സുരക്ഷാ സേന ജാദവിനെ അറസ്റ്റ് ചെയ്തു. 

ഇന്ത്യൻ ചാര സംഘടനയായ 'റോ'യുടെ ചാരനാണ് ജാദവ് എന്നായിരുന്നു പാകിസ്ഥാൻ്റെ ആരോപണം. 2017 ഏപ്രിൽ 10-ന് പാകിസ്താൻ മിലിട്ടറി കോടതി ജാദവിന് വധശിക്ഷ വിധിച്ചു. ഇന്ത്യയുടെ ശക്തമായ പ്രതിഷേധത്തെ തുടർന്ന് അന്താരാഷ്ട്ര നീതിന്യായ കോടതി (ICJ) കേസിൽ ഇടപെടുകയും വധശിക്ഷ സ്റ്റേ ചെയ്യുകയും ചെയ്തു. കോൺസുലാർ ബന്ധങ്ങൾ സംബന്ധിച്ച വിയന്ന കരാർ പ്രകാരം ജാദവിന് കോൺസുലാർ സഹായം നൽകണമെന്ന് അന്താരാഷ്ട്ര നീതിന്യായ കോടതി പാകിസ്താനോട് ആവശ്യപ്പെട്ടു. 2019 ജൂലൈ 17-ന് അന്താരാഷ്ട്ര നീതിന്യായ കോടതി കുൽഭൂഷൺ ജാദവിൻ്റെ വധശിക്ഷ പുനഃപരിശോധിക്കാനും കോൺസുലാർ സഹായം നൽകാനും പാകിസ്താനോട് ആവശ്യപ്പെട്ടു. 

ഇന്ത്യയുടെ നിരന്തരമായ നയതന്ത്ര ഇടപെടലുകളിലൂടെ അന്താരാഷ്ട്ര തലത്തിൽ ഈ വിഷയം ശ്രദ്ധിക്കപ്പെട്ടു. 2022 മെയ് മാസത്തിൽ, കുൽഭൂഷൺ ജാദവിൻ്റെ കേസിൽ ഇന്ത്യയുടെ നിലപാട് അറിയിക്കാൻ പാകിസ്താൻ ഇന്ത്യക്ക് അവസരം നൽകി. ഈ കേസ് ഇപ്പോഴും അന്താരാഷ്ട്ര തലത്തിൽ ചർച്ച ചെയ്യപ്പെടുന്നു.