നാട്ടിലേക്ക് പോകാന്‍ പണമില്ല. റെയില്‍വേ പാളത്തില്‍ കല്ലു വെച്ച്‌ ട്രെയിന്‍ നിര്‍ത്താന്‍ ശ്രമം. 63-കാരന്‍ പിടിയില്‍

കോട്ടയം: റെയില്‍വേ പാളത്തില്‍ കല്ലു വെച്ച്‌ ട്രെയിന്‍ നിര്‍ത്താന്‍ ശ്രമം നടത്തിയ ഝാര്‍ഖണ്ഡ് സ്വദേശി പിടിയില്‍.

ഝാർഖണ്ഡ് സ്വദേശിയായ ശിവകുമാർ സിങ്ങിനെയാണ് പിടികൂടിയത്.

കോട്ടയം-ഏറ്റുമാനൂർ സെക്‌ഷനില്‍ നിരന്തരം ട്രാക്കുകളില്‍ കല്ലു വയ്ക്കുന്നതു കണ്ടെത്തിയതോടെ റെയില്‍വേ സുരക്ഷാസേന രഹസ്യ നിരീക്ഷണം ആരംഭിച്ചിരുന്നു.

പരിശോധനയില്‍ ഏറ്റുമാനൂരിനു സമീപം രണ്ടിടങ്ങളില്‍ പാളത്തില്‍ കല്ലെടുത്തുവച്ചതു കണ്ടെത്തി. തുടര്‍ന്ന് നടത്തിയ അന്വേഷണത്തില്‍ ശിവകുമാർ സിങ്ങാണ് പാളത്തില്‍ കല്ലുകള്‍ വെക്കുന്നതെന്ന് കണ്ടെത്തി.

മകന്റെ മർദനം സഹിക്കാനാവാതെ ട്രെയിൻ കയറി കേരളത്തില്‍ എത്തിപ്പെടുകയായിരുന്നുവെന്ന് ശിവകുമാര്‍ പറഞ്ഞു.

പിന്നീട് നാട്ടിലേക്കു മടങ്ങണമെന്നും മക്കളെ കാണണമെന്നും തോന്നിയതോടെ പാളത്തില്‍ കല്ലെടുത്തുവച്ച്‌ ട്രെയിൻ നിർത്താൻ ശ്രമിക്കുകയായിരുന്നു. മൊഴി രേഖപ്പെടുത്തിയ ശേഷം ശിവകുമാർ സിങ്ങിനെ ചികിത്സയ്ക്കായി പുനരധിവാസകേന്ദ്രത്തിലാക്കി.