അലഹബാദ് ഹൈക്കോടതി വിധിക്കെതിരെ സുപ്രീം കോടതിയുടെ രൂക്ഷ വിമർശനം

ന്യൂഡൽഹി: സ്ത്രീയുടെ മാറിടത്തിൽ സ്പർശിക്കുകയും പൈജാമയുടെ ചരട് വലിക്കുകയും ചെയ്തത് ബലാത്സംഗമായി കണക്കാക്കാനാവില്ലെന്ന അലഹബാദ് ഹൈക്കോടതിയുടെ വിവാദ വിധിക്കെതിരെ സുപ്രീം കോടതിയുടെ രൂക്ഷ വിമർശനം. ജസ്റ്റിസ് ബി.ആർ. ഗവായ്, ജസ്റ്റിസ് അഗസ്റ്റിൻ ജോർജ് മസിഹ് എന്നിവരടങ്ങിയ ബെഞ്ചാണ് ഹൈക്കോടതിയുടെ സമീപനത്തെ കഠിനമായി വിമർശിച്ചത്.

ഈ വിധി അങ്ങേയറ്റം "അസംവേദനക്ഷമവും ഗൗരവതരവുമാണെന്ന്" ജസ്റ്റിസ് ഗവായ് പറഞ്ഞു. "ഇത് സമൻസ് അയയ്‌ക്കേണ്ട ഘട്ടത്തിലാണ്. ജഡ്ജിയുടെ ഭാഗത്തുനിന്നുണ്ടായത് പൂർണമായും അസംവേദനക്ഷമമായ സമീപനമാണ്. ഇങ്ങനെ പറയേണ്ടിവരുന്നതിൽ ഖേദമുണ്ട്" അദ്ദേഹം കൂട്ടിച്ചേർത്തു. ഡൽഹി ഹൈക്കോടതി ചീഫ് ജസ്റ്റിസ് വിഷയത്തിൽ ഉചിതമായ നടപടി സ്വീകരിക്കണമെന്ന് സുപ്രീം കോടതി നിർദേശിച്ചു.

നിയമ വിദഗ്ധരും അലഹബാദ് ഹൈക്കോടതിയുടെ ഈ നിലപാടിനെതിരെ ശക്തമായ വിമർശനം ഉന്നയിച്ചു. വിധികൾ പുറപ്പെടുവിക്കുമ്പോൾ ജഡ്ജിമാർ കൂടുതൽ ജാഗ്രത പുലർത്തേണ്ടതുണ്ടെന്നും ഇത്തരം പ്രസ്താവനകൾ പൊതുജനങ്ങളിൽ ജുഡീഷ്യറിയോടുള്ള വിശ്വാസം നഷ്ടപ്പെടുത്തുമെന്നും അവർ അഭിപ്രായപ്പെട്ടു.

മാർച്ച് 17-ന് അലഹബാദ് ഹൈക്കോടതി പുറപ്പെടുവിച്ച വിധിയിൽ, സ്ത്രീയുടെ മാറിടത്തിൽ സ്പർശിക്കുകയും പൈജാമയുടെ ചരട് വലിക്കുകയും ചെയ്താൽ അത് ബലാത്സംഗമായി കണക്കാക്കാൻ കഴിയില്ലെന്നും, സ്ത്രീയെ നഗ്നയാക്കുക എന്ന ഉദ്ദേശ്യത്തോടെയുള്ള ആക്രമണമായി മാത്രമേ കണക്കാക്കാൻ സാധിക്കൂ എന്നും വ്യക്തമാക്കിയിരുന്നു. കാസ്ഗഞ്ച് പ്രത്യേക കോടതി, ഇന്ത്യൻ ശിക്ഷാ നിയമത്തിലെ (ഐപിസി) 376 ഉൾപ്പെടെയുള്ള വകുപ്പുകൾ പ്രകാരം പ്രതികളെ വിളിപ്പിച്ചതിനെതിരെയുള്ള ഹർജി പരിഗണിച്ചപ്പോഴായിരുന്നു ഹൈക്കോടതിയുടെ ഈ വിവാദ വിധി.

2021 നവംബർ 10-ന് വൈകുന്നേരം അഞ്ച് മണിയോടെ പരാതിക്കാരി മകളോടൊപ്പം ഭർത്താവിന്റെ സഹോദരിയുടെ വീട്ടിൽ നിന്ന് മടങ്ങുമ്പോഴായിരുന്നു സംഭവം. പ്രതികളായ പവൻ, ആകാശ്, അശോക് എന്നിവർ അവരെ തടഞ്ഞുനിർത്തി എങ്ങോട്ടാണ് പോകുന്നതെന്ന് ചോദിച്ചു. ഭർത്താവിന്റെ സഹോദരിയുടെ വീട്ടിൽനിന്ന് വരികയാണെന്ന് പറഞ്ഞപ്പോൾ, പവൻ കുട്ടിയെ വീട്ടിൽ കൊണ്ടുപോകാമെന്ന് ഉറപ്പുനൽകി. പവന്റെ ഉറപ്പിൽ വിശ്വസിച്ച് പരാതിക്കാരി മകളെ അവനോടൊപ്പം അയച്ചു.

തുടർന്ന്, പ്രതികൾ മൺറോഡിൽ വെച്ച് കുട്ടിയുടെ മാറിടത്തിൽ സ്പർശിക്കുകയും, ആകാശ് അവളെ പാലത്തിനടിയിലേക്ക് വലിച്ചിഴക്കുകയും, പൈജാമയുടെ ചരട് വലിക്കുകയും ചെയ്തു. എന്നാൽ, ഇത് ബലാത്സംഗ ശ്രമമായി കണക്കാക്കാനാവില്ലെന്നാണ് ഹൈക്കോടതിയുടെ വാദം.

"പ്രതികളായ പവനും ആകാശും കുട്ടിയുടെ മാറിടത്തിൽ സ്പർശിക്കുകയും ആകാശ് അവളെ പാലത്തിനടിയിലേക്ക് വലിച്ചിഴക്കുകയും ചെയ്തു എന്നത് ശരിയാണ്. എന്നാൽ ഇത് ബലാത്സംഗം ചെയ്യാൻ ശ്രമിച്ചതിന് തെളിവായി കണക്കാക്കാനാവില്ല," ഹൈക്കോടതി വിധിയിൽ പറയുന്നു. "പ്രതി ആകാശ് കുട്ടിയെ വലിച്ചിഴക്കുകയും പൈജാമയുടെ ചരട് വലിക്കുകയും ചെയ്തു എന്നത് ശരിയാണ്. എന്നാൽ ഇതിന് ശേഷം പെൺകുട്ടി നഗ്നയായതായി സാക്ഷികൾ മൊഴി നൽകിയിട്ടില്ല" എന്നും കോടതി നിരീക്ഷിച്ചു.

"പ്രതികൾ പെൺകുട്ടിക്കെതിരെ ശാരീരിക അതിക്രമം നടത്തി എന്നത് ശരിയാണ്. എന്നാൽ ഇത് ബലാത്സംഗ ശ്രമമായി കണക്കാക്കാനാവില്ല. ബലാത്സംഗ ശ്രമം തെളിയിക്കാൻ, പ്രതികൾ അതിനുള്ള തയ്യാറെടുപ്പ് നടത്തിയതായി തെളിയിക്കണം" കോടതി വ്യക്തമാക്കി. "കേസിലെ സാഹചര്യങ്ങൾ അനുസരിച്ച്, പ്രതികൾക്കെതിരെ ബലാത്സംഗ ശ്രമം ചുമത്താനാവില്ല. പകരം, ഐപിസി 354(ബി) പ്രകാരമുള്ള സ്ത്രീയെ നഗ്നയാക്കാനോ അപമാനിക്കാനോ ശ്രമിച്ചതിനും, പോക്‌സോ നിയമത്തിലെ 9-ാം വകുപ്പ് പ്രകാരമുള്ള കുട്ടികൾക്കെതിരായ ലൈംഗികാതിക്രമത്തിനും കേസെടുക്കാവുന്നതാണ്," കോടതി കൂട്ടിച്ചേർത്തു.