മൂക്കുതലയിൽ അഴിഞ്ഞാടി ലഹരി സംഘം; വിദ്യാർത്ഥിയടക്കം രണ്ടുപേർക്ക് ഗുരുതര പരിക്ക്

ചങ്ങരംകുളം: മൂക്കുതലയിൽ ലഹരി സംഘം നടത്തിയ ആക്രമണത്തിൽ പത്താം ക്ലാസ് വിദ്യാർത്ഥിയടക്കം രണ്ടുപേർക്ക് ഗുരുതര പരിക്ക്. ബുധനാഴ്ച രാത്രി പത്ത് മണിയോടെ മൂക്കുതല മനപ്പടിയിൽ വെച്ചായിരുന്നു സംഭവം. കക്കിടിപ്പുറം മുത്തേടത്ത് വളപ്പിൽ മുഹമ്മദ് റാഷിദ് (23) ഉം കൂടെ യാത്ര ചെയ്തിരുന്ന പത്താം ക്ലാസ് വിദ്യാർത്ഥിയുമാണ് ആക്രമണത്തിന് ഇരയായത്.

മുഹമ്മദ് റാഷിദ് മാതാവിൻ്റെ വീട്ടിൽ പോയി മടങ്ങുന്നതിനിടെ റോഡരികിൽ നിന്ന ലഹരി സംഘം യാതൊരു പ്രകോപനവുമില്ലാതെ കാർ തടഞ്ഞ് നിർത്തി ആക്രമിക്കുകയായിരുന്നു. കാർ അടിച്ചു തകർക്കുകയും രണ്ടുപേരുടെയും മൊബൈൽ ഫോണുകൾ നശിപ്പിക്കുകയും ചെയ്തു.

ഗുരുതരമായി പരിക്കേറ്റ ഇരുവരും പോലീസ് സ്റ്റേഷനിൽ എത്തി പോലീസിൻ്റെ സഹായത്തോടെ ചങ്ങരംകുളത്തെ സ്വകാര്യ ആശുപത്രിയിൽ ചികിത്സ തേടി.സംഭവസ്ഥലം സന്ദർശിച്ച പോലീസ് പ്രതികളെ പിടികൂടാനുള്ള ശ്രമങ്ങൾ ഊർജ്ജിതമാക്കിയിട്ടുണ്ട്. ചങ്ങരംകുളം പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.