രക്തദാനം കാന്‍സര്‍ വരാനുള്ള സാധ്യത കുറയ്ക്കാൻ സഹായിക്കും; ശുഭസൂചന നല്‍കി പുതിയ പഠനങ്ങൾ

രക്തദാനം ജീവിതത്തിലെ ഏറ്റവും മഹത്തായ ദാനമാണെന്ന് എല്ലാവര്‍ക്കും അറിയാം.

ജീവന്‍ രക്ഷിക്കുന്നതില്‍ ഓരോ തുള്ളി രക്തത്തിനും അമൂല്യമായ പങ്കുണ്ട്. ജീവന്‍ രക്ഷാ പ്രവര്‍ത്തനങ്ങളിലെ അവിഭാജ്യ ഘടകമാണ് രക്തദാനം. എന്നാല്‍ ഭയം മൂലം ആരോഗ്യമുള്ള വ്യക്തികള്‍ പോലും രക്തം കൊടുക്കാന്‍ മടിക്കാറുണ്ട്. രക്തം ദാനം ചെയ്യുന്നത് സംബന്ധിച്ച് നിരവധി തെറ്റിദ്ധാരണകളും സമൂഹത്തിലുണ്ട്. എന്നാല്‍ ഇത്തരക്കാര്‍ക്ക് ഒരു സന്തോഷ വാര്‍ത്തയാണ് വരുന്നത്. ലണ്ടനിലെ ഫ്രാന്‍സിസ് ക്രിക്ക് ഇന്‍സ്റ്റിറ്റ്യൂട്ട് നടത്തിയ പഠനത്തിലാണ് രക്തദാനം കൊണ്ട് ദാതാവിനും നിരവധി ഗുണങ്ങളുണ്ടെന്ന് തെളിഞ്ഞത്.

മാരകമായ രോഗങ്ങളുമായി പൊരുതുന്നവരെ സഹായിക്കുന്നതിന് ഒപ്പം ദാതാവിന്റെ ദീര്‍ഘായുസിനും പ്രയോജനം ചെയ്യുന്ന ചില കണ്ടൈത്തലുകളാണ് പഠനത്തില്‍ ഉരുത്തിരിഞ്ഞു വന്നത്. രക്തം ദാനം ചെയ്യുന്നത് കാന്‍സര്‍ സാധ്യത കുറയ്ക്കുമെന്ന നിര്‍ണായകമായ സൂചനകളാണ് ലഭിച്ചത്. പ്രായമാകുമ്പോള്‍ നമ്മുടെ രക്തത്തിലെ മൂലകോശങ്ങളില്‍ മ്യൂട്ടേഷനുകള്‍ സംഭവിക്കുന്നു. ഈ മ്യൂട്ടേഷനുകളില്‍ ചിലത് രക്താര്‍ബുദത്തിനും മറ്റ് രക്തസംബന്ധമായ വൈകല്യങ്ങള്‍ക്കുമുള്ള സാധ്യത വര്‍ധിപ്പിക്കും.

60 വയസുള്ള ആരോഗ്യമുള്ള പുരുഷന്മാരുടെ രണ്ട് ഗ്രൂപ്പുകളാണ് പഠനത്തിന് വിധേയമാക്കിയത്. അതില്‍ ഒരു ഗ്രൂപ്പ് വര്‍ഷത്തില്‍ മൂന്ന് തവണ വീതം 40 വര്‍ഷം രക്തം ദാനം ചെയ്തു. മറ്റേ ഗ്രൂപ്പ് ജീവിതത്തില്‍ ആകെ അഞ്ച് തവണ മാത്രമേ രക്തം ദാനം ചെയ്തിട്ടുള്ളൂ. രണ്ട് ഗ്രൂപ്പുകളും താരതമ്യം ചെയ്തതിന്റെ റിപ്പോര്‍ട്ട് ഗവേഷകരെ അമ്പരിപ്പിച്ചു.

പതിവായി രക്തദാനം ചെയ്യുന്നത് ശരീരത്തിലെ ഇരുമ്പിന്റെ അളവ് കുറയ്ക്കാന്‍ സഹായിക്കുമെന്ന് കണ്ടെത്തി. അതിലൂടെ ഹൃദ്രോഗ സാധ്യതയും ചിലതരം കാന്‍സറുകള്‍ക്കുള്ള സാധ്യതയും കുറഞ്ഞു. രക്തം ദാനം ചെയ്യുന്നത് പുതിയ രക്തകോശങ്ങളുടെ ഉത്പാദനത്തെ ഉത്തേജിപ്പിക്കുകയും അതിലൂടെ പ്രതിരോധശേഷി വര്‍ധിക്കുകയും ചെയ്യുന്നു. ഈ വിഷയത്തില്‍ കൂടുതല്‍ ഗവേഷണം ആവശ്യമാണെങ്കിലും ഈ കണ്ടെത്തലുകള്‍ ശുഭസൂചനയാണ് നല്‍കുന്നതെന്ന് ഗവേഷകര്‍ പറയുന്നു.

കൃത്യമായ ഇടവേളകളിലുള്ള രക്തദാനം പക്ഷാഘാതത്തിന്റെ സാധ്യത കുറയ്ക്കുന്നതായി നേരത്തെ കണ്ടെത്തിയിട്ടുണ്ട്. ശരീരത്തിലെ കൊഴുപ്പും കൊളസ്‌ട്രോളും രക്തസമ്മര്‍ദത്തിന്റെ സാധ്യതയും കുറയ്ക്കാന്‍ രക്തദാനം സഹായിക്കും. പ്രത്യേകിച്ച് ഹൈപ്പര്‍ടെന്‍ഷന്‍ ഉള്ളവരില്‍. രക്തം ദാനം ചെയ്യുന്നതിലൂടെ ഹൃദയത്തിന്റെ പമ്പിങ് സുഗമമാകുന്നു. ഹൃദയ സംബന്ധമായ സങ്കീര്‍ണതകള്‍ക്കുള്ള സാധ്യത കുറയുന്നു. രക്തദാനം ടൈപ്പ് 2 പ്രമേഹ സാധ്യത കുറയ്ക്കുന്നത് സംബന്ധിച്ച പഠനങ്ങളും നടന്നുകൊണ്ടിരിക്കുകയാണ്.

രക്തം ദാനം ചെയ്യുന്നതിന് മുന്നോടിയായി സൗജന്യ ആരോഗ്യ പരിശോധന ലഭിക്കുന്നത് ദാതാവിന് ഗുണകരമാണെന്ന് ഡോക്ടര്‍മാര്‍ ചൂണ്ടിക്കാട്ടുന്നു. ദാതാവിന്റെ രക്തസമ്മര്‍ദം, ഹീമോഗ്ലോബിന്റെ അളവ്, പള്‍സ് എന്നിവ പരിശോധിക്കും. ഈ പതിവ് മെഡിക്കല്‍ പരിശോധനകള്‍ ദാതാവ് അറിയാതെ പോകുന്ന ഏതെങ്കിലും രോഗത്തെക്കുറിച്ചുള്ള മുന്നറിയിപ്പും നല്‍കുന്നു.