ഗണിതപഠനോത്സവത്തിൽ വിദ്യാർഥികളുടെ സാമൂഹിക പ്രതിബദ്ധത തെളിയിച്ച് 'കുട്ടീസ് പലഹാരക്കട' ശ്രദ്ധേയമാകുന്നു

ചങ്ങരംകുളം: നന്നമുക്ക് ജി.എസ്.എ.എൽ.പി. സ്കൂളിൽ സംഘടിപ്പിച്ച ഗണിതപഠനോത്സവം അക്കാദമിക മികവിന് പുറമെ സാമൂഹിക പ്രതിബദ്ധതയുടെ ഉദാത്ത മാതൃകയായി മാറി. ഗണിതപഠനത്തിന് പ്രായോഗിക സമീപനം നൽകുക എന്ന ലക്ഷ്യത്തോടെ ആരംഭിച്ച 'കുട്ടീസ് പലഹാരക്കട' വിദ്യാർഥികൾക്കും രക്ഷിതാക്കൾക്കും ഒരുപോലെ പ്രയോജനപ്രദമായി.ലാഭ-നഷ്ട കണക്കുകൾ, വിലനിർണയം, ലാഭവിഹിതം എന്നിവ കുട്ടികൾക്ക് നേരിട്ട് മനസ്സിലാക്കാൻ ഈ സംരംഭം അവസരം നൽകി.അനുഭവത്തിലൂടെയുള്ള പഠനത്തിന് പ്രാധാന്യം നൽകി സ്കൂൾ അധ്യാപകർ നേതൃത്വം നൽകിയ ഈ പ്രവർത്തനം കുട്ടികളുടെ പങ്കാളിത്തവും അവബോധവും വർധിപ്പിച്ചു.പലഹാരക്കടയിലൂടെ ലഭിച്ച വരുമാനം പൂർണമായും നാട്ടിൽ ചികിത്സാസഹായം ആവശ്യമുള്ള ഫളലു റഹ്മാന്റെ ചികിത്സയ്ക്കായി സംഭാവന ചെയ്തു. വിദ്യാർഥികളുടെ ഈ ഉദാരമനസ്കത സമൂഹത്തിന് പ്രചോദനമായി.വിദ്യാഭ്യാസം പാഠപുസ്തകങ്ങളിൽ ഒതുങ്ങാതെ സമൂഹത്തിന് പ്രയോജനകരമായ രീതിയിൽ ഉപയോഗിക്കാമെന്നും കുട്ടികൾ മാനുഷിക മൂല്യങ്ങൾ ഉൾക്കൊള്ളുന്നതിൽ മാതൃകയാണെന്നും ഈ പരിപാടി തെളിയിച്ചു. സ്കൂൾ അധികൃതരും രക്ഷിതാക്കളും ഈ സംരംഭത്തെ പ്രശംസിച്ചു.