വനിതാ ദിനത്തിൽ ഡൽഹി സർക്കാരിന്റെ സുപ്രധാന തീരുമാനം; ‘മഹിളാ സമൃദ്ധി യോജന’യ്ക്ക് അംഗീകാരം

ഡൽഹി: ഡൽഹിയിലെ വനിതകൾക്ക് പ്രതിമാസം 2,500 രൂപ ധനസഹായം നൽകുന്ന ‘മഹിളാ സമൃദ്ധി യോജന’യ്ക്ക് ഭാരതീയ ജനതാ പാർട്ടി (ബി.ജെ.പി) സർക്കാർ അംഗീകാരം നൽകി. മുഖ്യമന്ത്രി രേഖ ഗുപ്തയാണ് ശനിയാഴ്ച ഇക്കാര്യം അറിയിച്ചത്. അന്താരാഷ്ട്ര വനിതാ ദിനത്തിൽ ചേർന്ന മന്ത്രിസഭായോഗത്തിലാണ് സുപ്രധാന തീരുമാനം കൈക്കൊണ്ടത്.“അന്താരാഷ്ട്ര വനിതാ ദിനത്തിൽ ചേർന്ന മന്ത്രിസഭായോഗത്തിൽ ഡൽഹി തിരഞ്ഞെടുപ്പ് വേളയിൽ നൽകിയ വാഗ്ദാനമായ 2,500 രൂപ വനിതകൾക്ക് നൽകുന്ന പദ്ധതിക്ക് അംഗീകാരം നൽകി,” മുഖ്യമന്ത്രി രേഖ ഗുപ്ത മാധ്യമങ്ങളോട് പറഞ്ഞു. മഹിളാ സമൃദ്ധി യോജന നടപ്പിലാക്കുന്നതിനായി ഡൽഹി ബജറ്റിൽ 5,100 കോടി രൂപയുടെ വിഹിതവും മന്ത്രിസഭ അംഗീകരിച്ചു. പദ്ധതി നടപ്പിലാക്കുന്നതിനായി ഡൽഹി മുഖ്യമന്ത്രിയുടെ അധ്യക്ഷതയിൽ ഒരു കമ്മിറ്റി രൂപീകരിച്ചിട്ടുണ്ടെന്നും ഉടൻ തന്നെ ഒരു പോർട്ടൽ ആരംഭിക്കുമെന്നും ഗുപ്ത കൂട്ടിച്ചേർത്തു.

മഹിളാ സമൃദ്ധി യോജനയുടെ വിശദാംശങ്ങൾ

5,100 കോടി രൂപയുടെ വാർഷിക പദ്ധതി ഡൽഹിയിലെ വനിതകൾക്ക് നേരിട്ടുള്ള സാമ്പത്തിക സഹായം നൽകുന്നതിലൂടെ സാമ്പത്തിക സ്ഥിരതയും സാമൂഹിക ഉന്നമനവും ലക്ഷ്യമിടുന്നു. പ്രത്യേകിച്ച് ദരിദ്ര കുടുംബങ്ങളിൽ നിന്നുള്ള സ്ത്രീകൾക്ക് ഇത് വലിയൊരു ആശ്വാസമാകും. രേഖ ഗുപ്ത അധ്യക്ഷയായ കമ്മിറ്റിയിൽ മന്ത്രിമാരായ പ്രവേഷ് സാഹിബ് സിംഗ്, ആശിഷ് സൂദ്, കപിൽ മിശ്ര എന്നിവരും അംഗങ്ങളാണ്. സുതാര്യതയും കാര്യക്ഷമതയും ഉറപ്പാക്കുന്നതിനായി സാങ്കേതികവിദ്യ ഉപയോഗിക്കുമെന്ന് സർക്കാർ അറിയിച്ചു.

“ഡൽഹിയിലെ വനിതകൾക്ക് നൽകിയ വാഗ്ദാനം നിറവേറ്റുന്നതിനുള്ള ചുവടുവെപ്പാണിത്. നേരിട്ടുള്ള സാമ്പത്തിക സഹായം നൽകുന്നതിലൂടെ സാമ്പത്തിക സുരക്ഷയും സ്വാതന്ത്ര്യവും ശാക്തീകരണവും ഉറപ്പാക്കുന്നു. ഇത് സാമ്പത്തിക നേട്ടം മാത്രമല്ല, ഡൽഹിയിലെ ശക്തവും സ്വയം പര്യാപ്തവുമായ വനിതാ സമൂഹത്തെ കെട്ടിപ്പടുക്കുന്നതിനുള്ള പ്രതിബദ്ധത കൂടിയാണ്,” ഔദ്യോഗിക പ്രസ്താവനയിൽ പറയുന്നു.

നേരിട്ടുള്ള ആനുകൂല്യ കൈമാറ്റം (DBT) വഴി പദ്ധതിയുടെ ആനുകൂല്യങ്ങൾ വിതരണം ചെയ്യാനാണ് രേഖ ഗുപ്തയുടെ നേതൃത്വത്തിലുള്ള സർക്കാർ പദ്ധതിയിടുന്നത്. ആധാർ അടിസ്ഥാനമാക്കിയുള്ള ഇ-കെവൈസി ഉപയോഗിച്ചാകും ഇടപാടുകൾ നടത്തുക. സർക്കാർ ജോലിയോ മറ്റ് സർക്കാർ സാമ്പത്തിക സഹായ പദ്ധതികളുടെ ആനുകൂല്യമോ ലഭിക്കാത്ത 18 നും 60 നും ഇടയിൽ പ്രായമുള്ള എല്ലാ വനിതകളും പദ്ധതിക്ക് അർഹരാണ്.

പ്രഖ്യാപനത്തിന് മണിക്കൂറുകൾക്ക് മുൻപ് പ്രതിപക്ഷ നേതാവ് അതിഷി വിഷയം ഉന്നയിക്കുകയും തിരഞ്ഞെടുപ്പ് വേളയിൽ നൽകിയ വാഗ്ദാനങ്ങൾ പ്രധാനമന്ത്രി നരേന്ദ്ര മോദി നിറവേറ്റുന്നില്ലെന്ന് ആരോപിക്കുകയും ചെയ്തിരുന്നു. “ഡൽഹിയിലെ എല്ലാ വനിതകളും ഇന്ന് ബാങ്ക് അക്കൗണ്ടുകളിൽ പണം എത്തുന്ന സന്ദേശത്തിനായി കാത്തിരിക്കുകയാണ്,” അതിഷി പറഞ്ഞു. എന്നാൽ, കഴിഞ്ഞ മാസം ഡൽഹി നിയമസഭാ തിരഞ്ഞെടുപ്പിൽ നേരിട്ട കനത്ത തോൽവിക്ക് ശേഷമുള്ള ആം ആദ്മി പാർട്ടിയുടെ രാഷ്ട്രീയ നിരാശയാണ് ഇത്തരം പ്രസ്താവനകൾക്ക് കാരണമെന്ന് ബി.ജെ.പി ഡൽഹി അധ്യക്ഷൻ വീരേന്ദ്ര സച്ച്‌ദേവ ആരോപിച്ചു. സി.എ.ജി റിപ്പോർട്ടുകളിലെ അഴിമതിയിൽ നിന്ന് ശ്രദ്ധ തിരിക്കാനാണ് എ.എ.പി ശ്രമിക്കുന്നതെന്നും അദ്ദേഹം ആരോപിച്ചു.

അന്താരാഷ്ട്ര വനിതാ ദിനമായ മാർച്ച് 8-ന് മഹിളാ സമൃദ്ധി യോജന ആരംഭിക്കുമെന്ന് ബി.ജെ.പി പ്രഖ്യാപിച്ചിരുന്നു. പുതുതായി രൂപീകരിച്ച ഡൽഹി സർക്കാരിന്റെ ആദ്യ മന്ത്രിസഭായോഗത്തിൽ പദ്ധതി ആരംഭിക്കുമെന്ന് പ്രധാനമന്ത്രി മോദി പറഞ്ഞിരുന്നു. “മോദിയുടെ ഉറപ്പ്” എന്നാണ് അദ്ദേഹം ഇതിനെ വിശേഷിപ്പിച്ചത്.