ഐ.എച്ച്.ആർ.ഡിയുടെ 'സ്നേഹത്തോൺ' പരിപാടി മലപ്പുറം ജില്ലയിൽ വിപുലമായ രീതിയിൽ സംഘടിപ്പിക്കുന്നു

എടപ്പാൾ : "ലഹരിയല്ല, ജീവിതമാണ് ഹരം" എന്ന ആശയം മുൻനിർത്തി ഐ.എച്ച്.ആർ.ഡി സംസ്ഥാനത്തുടനീളം സംഘടിപ്പിക്കുന്ന "സ്നേഹത്തോൺ" പരിപാടിയുടെ ഭാഗമായി മലപ്പുറം ജില്ലയിലെ വട്ടംകുളം, എടപ്പാൾ, പെരിന്തൽമണ്ണ, വാഴക്കാട്, മുതുവല്ലൂർ എന്നിവിടങ്ങളിൽ വിവിധ പരിപാടികൾ സംഘടിപ്പിക്കുന്നു. കൂട്ടയോട്ടം, സ്നേഹമതിൽ, സ്നേഹസംഗമം തുടങ്ങിയവയാണ് പ്രധാന പരിപാടികൾ. യുവജനങ്ങൾക്കിടയിൽ വർദ്ധിച്ചുവരുന്ന അക്രമവാസനയ്‌ക്കെതിരെ സ്നേഹത്തിന്റെയും സമാധാനത്തിന്റെയും സന്ദേശം പ്രചരിപ്പിക്കുക എന്നതാണ് ഈ പരിപാടിയുടെ ലക്ഷ്യം.

പരിപാടികളുടെ വിശദാംശങ്ങൾ താഴെ നൽകുന്നു:

വട്ടംകുളം: വട്ടംകുളം ടെക്നിക്കൽ ഹയർ സെക്കൻഡറി സ്കൂളിന്റെ നേതൃത്വത്തിൽ ശുകപുരം സഫാരി ഗ്രൗണ്ടിൽ നിന്ന് ആരംഭിക്കുന്ന കൂട്ടയോട്ടം എടപ്പാൾ ടൗണിൽ അവസാനിക്കും. തുടർന്ന് സ്നേഹമതിലും സ്നേഹസംഗമവും നടക്കും. വട്ടംകുളം ഗ്രാമപഞ്ചായത്ത് പ്രസിഡന്റ് എം.എ. നജീബ് പരിപാടി ഉദ്ഘാടനം ചെയ്യും. വട്ടംകുളം കോളേജ് ഓഫ് അപ്ലൈഡ് സയൻസിന്റെ നേതൃത്വത്തിൽ ഗ്രാമപഞ്ചായത്ത് ഓഫീസ് പരിസരത്തുനിന്നും കൂട്ടയോട്ടം ആരംഭിക്കും. തുടർന്ന് ബോധവൽക്കരണം, സ്നേഹമതിൽ, സ്നേഹസംഗമം എന്നിവയും നടക്കും.

പെരിന്തൽമണ്ണ: പെരിന്തൽമണ്ണ ഐ.എച്ച്.ആർ.ഡി ടെക്നിക്കൽ ഹയർ സെക്കൻഡറി സ്കൂളിന്റെ നേതൃത്വത്തിൽ പെരിന്തൽമണ്ണ ട്രാഫിക് ജംഗ്ഷനിൽ ജനകീയ ലഹരി വിരുദ്ധ കാമ്പയിൻ സംഘടിപ്പിക്കും. പെരിന്തൽമണ്ണ മുനിസിപ്പൽ ഹൈടെക് ഷോപ്പിംഗ് കോംപ്ലക്സിൽ കാമ്പയിന്റെ ഉദ്ഘാടനം നടക്കും. തുടർന്ന് അഷറഫ് മുന്നയുടെ "അരുത്" എന്ന ലഹരിവിരുദ്ധ ഏകാംഗ നാടകവും കൂട്ടയോട്ടവും ഉണ്ടാകും. ഐ.എച്ച്.ആർ.ഡി സ്കൂൾ അധ്യാപകർ, ജീവനക്കാർ, വിദ്യാർത്ഥികൾ, വിവിധ സാമൂഹിക സാംസ്കാരിക പ്രവർത്തകർ എന്നിവർ കൂട്ടയോട്ടത്തിൽ പങ്കെടുക്കും.

വാഴക്കാട് : വാഴക്കാട് കോളേജ് ഓഫ് അപ്ലൈഡ് സയൻസിന്റെ നേതൃത്വത്തിൽ ചീനി ബസാറിൽ നിന്ന് വാഴക്കാട് ബസ്റ്റാൻഡിലേക്ക് കൂട്ടയോട്ടം സംഘടിപ്പിക്കും. തുടർന്ന് നടക്കുന്ന സ്നേഹസംഗമത്തിൽ കൊണ്ടോട്ടി ഡിവൈഎസ്പി സന്തോഷ് കുമാർ ലഹരി വിരുദ്ധ പ്രതിജ്ഞ ചൊല്ലിക്കൊടുക്കും.

സിവിൽ എക്സൈസ് ഓഫീസർ പി.എസ്. സില്ല ക്ലാസെടുക്കും. കൂടാതെ വാഴക്കാട് ടെക്നിക്കൽ ഹയർ സെക്കൻഡറി സ്കൂളിൻ്റെ ആഭിമുഖ്യത്തിലുള്ള കൂട്ടയോട്ടം വാഴക്കാട് സർവീസ് സഹകരണ ബാങ്കിന് മുന്നിൽ നിന്ന് ഫ്ലാഗ് ഓഫ് ചെയ്യും. വാഴക്കാട് ബസ്റ്റാൻഡ് പരിസരത്ത് സമാപനവും സ്നേഹമതിൽ തീർക്കലും നടക്കും. ഗ്രാമപഞ്ചായത്ത് പ്രസിഡണ്ട് അഡ്വ. എം കെ നൗഷാദ് ഉദ്ഘാടനം ചെയ്യും.

മുതുവല്ലൂർ : മുതുവല്ലൂർ കോളേജ് ഓഫ് അപ്ലൈഡ് സയൻസിന്റെ നേതൃത്വത്തിലുള്ള കൂട്ടയോട്ടം മുതുവല്ലൂരിൽ ഗ്രാമപഞ്ചായത്ത് പ്രസിഡന്റ് പി.കെ. ബാബുരാജ് ഫ്ലാഗ് ഓഫ് ചെയ്യും. ഇത് കൊണ്ടോട്ടിയിൽ സമാപിക്കും.

എല്ലാ കേന്ദ്രങ്ങളിലും വെള്ളിയാഴ്ച രാവിലെ 7:30-ന് പരിപാടികൾ ആരംഭിക്കും.

പ്രോഗ്രാം കോ-ഓർഡിനേറ്റർമാരായ വട്ടംകുളം കോളേജ് പ്രിൻസിപ്പാൾ പി. അബ്ദുസമദ്, വട്ടംകുളം ടെക്നിക്കൽ ഹയർ സെക്കൻഡറി സ്കൂൾ പ്രിൻസിപ്പാൾ എം.എസ്. ജിഷ തങ്കച്ചി എന്നിവരാണ് പരിപാടികളുടെ വിശദാംശങ്ങൾ അറിയിച്ചത്.