സമഗ്ര കൃഷിയിലൂടെ മാതൃക സൃഷ്ടിക്കുന്ന എടപ്പാളിലെ ബിന്ദുചന്ദ്രൻ

എടപ്പാൾ:എടപ്പാൾ പഞ്ചായത്ത് 15ാം വാർഡിലെ വല്യാട് സ്വദേശിയായ കുടിയാട്ടിൽ ബിന്ദുചന്ദ്രൻ, കഴിഞ്ഞ 20 വർഷത്തിലേറെയായി കാർഷികമേഖലയിലെ സമർപ്പിത പ്രവർത്തകയാണ്. 5 ഏക്കറിൽ നെൽകൃഷിയോടെ ആരംഭിച്ച ബിന്ദു, വിവിധയിനം പച്ചക്കറികളിൽ കൂടി തന്റെ കൃഷിപ്രവർത്തനം വിപുലീകരിച്ചിരിക്കുകയാണ്. പയർ, വഴുതന, വെള്ളരി, തക്കാളി, കൈപ്പക്ക, ചീര, വെണ്ട, കപ്പകൃഷി, ചക്കരക്കിഴങ്ങ് തുടങ്ങിയവ അടങ്ങിയ പച്ചക്കറി തോട്ടം, ബിന്ദുവിന്റെ അക്ഷീണ പരിശ്രമത്താൽ വിളകളാൽ സമൃദ്ധമാണ് .

കാർഷിക മേഖലയിൽ സജീവമായി പ്രവർത്തിക്കുന്ന ബിന്ദു, തോട്ടം പരിപാലനവും നനക്കലും ഒറ്റയ്ക്ക് തന്നെ നിർവഹിക്കുന്നു. കൂടാതെ, കന്നുകാലി പരിപാലനത്തിലും ബിന്ദു അതീവ ശ്രദ്ധ ചെലുത്തുന്നു. വീടുകളിലേക്കും സൊസൈറ്റിയിലേക്കും ദിവസേന 15 ലിറ്റർ പാൽ വിതരണം ചെയ്യുന്നതിനൊപ്പം, കടകളിലേക്ക് 15 കിലോയിൽ അധികം പയർ വിതരണം ചെയ്യുന്നതും കുടുംബത്തിന്റെ പ്രധാന വരുമാന മാർഗ്ഗങ്ങളിലൊന്നായി മാറിയിരിക്കുന്നു.പശുവളർത്തൽ, ആട്, കോഴിവളർത്തൽ എന്നിവയിലേക്കും ബിന്ദുവിന്റെ കാർഷിക താൽപ്പര്യം വിപുലമായിരിക്കുകയാണ് . നാലു പശുക്കളും അതിന്റെ കിടാങ്ങളും , വിവിധയിത്തിൽ ഉള്ള 8 ആടുകൾ, കോഴികൾ എന്നിവയോടെ ബിന്ദുവിന്റെ ഫാം സമ്പന്നമാണ്. രാവിലെ മുതൽ ആരംഭിക്കുന്ന ഈ പ്രവർത്തനങ്ങളിൽ മക്കളായ തേജസും അക്ഷയലക്ഷ്മിയും അമ്മയെ സഹായിക്കുന്നു.

പച്ചക്കറിവിത്തിടലിനായി തൊഴിലുറപ്പ് തൊഴിലാളികളുടെ സഹായം ലഭ്യമായിരുന്നുവെങ്കിലും ഇപ്പോൾ മുഴുവൻ പ്രവർത്തനവും ബിന്ദു തന്നെ കൈകാര്യം ചെയ്യുന്നു. ഭർത്താവ് ചന്ദ്രൻ ലോട്ടറി തൊഴിലാളിയായതിനാൽ, ഏറെ സമയം കാർഷിക മേഖലയിൽ ചെലവഴിക്കാൻ കഴിയാത്തെങ്കിലും, ഇടയ്ക്കിടെ ഭാര്യയെ സഹായിക്കാൻ അവൻ മുൻപന്തിയിലാകും. മകൻ തേജസ് സ്കൂൾ കഴിഞ്ഞ് മടങ്ങിയാലും അമ്മയുടെ കൂടെയായിരിക്കും. തേജസ്, വീട്ടിലെ പശുക്കൾ, ആടുകൾ, കോഴികൾ, ഓരോന്നിനും പേരിട്ടിരിക്കുകയാണ്.

വാർത്ത തയ്യാറാക്കുന്നതിനിടെ, രണ്ടു ആടുകൾ പ്രസവിച്ചു നാലു കുഞ്ഞുങ്ങൾ , ആടുകൾ പ്രസവിച്ച സന്തോഷത്തിലാണ് തേജസും അമ്മ ബിന്ദുചന്ദ്രനും കുടുംബവും. കാർഷികമേഖലയിലും കന്നുകാലി പരിപാലനത്തിലും മാതൃക സൃഷ്ടിക്കുന്ന ബിന്ദുചന്ദ്രൻ, പുതുതായി കാർഷിക മേഖലകലയിലേക്ക് പ്രവേശിക്കുന്ന വനിതകൾക്ക് പ്രചോദനമാണ്.