ട്രെയിനിന്റെ വാതിലുകള്‍ അകത്തുനിന്നും അടച്ചിട്ട നിലയില്‍, അങ്ങോട്ടുമിങ്ങോട്ടുമോടി വലഞ്ഞ് യാത്രക്കാര്‍, ഒടുവില്‍ പ്രതിഷേധം

ബീഹാർ: ഇന്ത്യയിലെ ട്രെയിനുകളുമായും റെയില്‍വേ സംവിധാനങ്ങളുമായും ബന്ധപ്പെട്ട നിരവധി വീഡിയോകള്‍ സോഷ്യല്‍ മീഡിയയില്‍ വൈറലായി മാറാറുണ്ട്.

പലപ്പോഴും സൗകര്യങ്ങളില്ലാത്തതിന്റെയും തിരക്കിന്റെയും ഒക്കെ പേരില്‍ ആളുകള്‍ തങ്ങളുടെ വിമർശനങ്ങള്‍ പങ്കുവയ്ക്കാറുണ്ട്. അതുപോലെ തന്നെ, വിവിധങ്ങളായ ചിത്രങ്ങളും വീഡിയോകളും നമ്മള്‍ കണ്ടിട്ടുമുണ്ടാവും. ഏതായാലും, അതുപോലെ ഒരു വീഡിയോയാണ് ഇപ്പോള്‍ സോഷ്യല്‍ മീഡിയയില്‍ വൈറലായി കൊണ്ടിരിക്കുന്നത്.

ബിഹാറിലെ ഗയയില്‍ നിന്നാണ് വീഡിയോ പകർത്തിയിരിക്കുന്നത് എന്നാണ് കരുതുന്നത്. വീഡിയോ ഇൻസ്റ്റഗ്രാമില്‍ ഷെയർ ചെയ്തിരിക്കുന്നത് pintudevraj എന്ന യൂസറാണ്. 

വീഡിയോയില്‍ കാണുന്നത് ഒരു കൂട്ടം യാത്രക്കാർ ഒരു ട്രെയിനിന്റെ മുന്നില്‍ നിന്നുകൊണ്ട് പ്രതിഷേധം അറിയിക്കുന്നതാണ്. ട്രെയിനില്‍ കയറാൻ ചെന്നപ്പോള്‍ അതിന്റെ വാതിലുകളെല്ലാം ഉള്ളില്‍ നിന്നും അടച്ചിട്ടിരിക്കുകയായിരുന്നു. അതാണ് യാത്രക്കാരെ പ്രകോപിപ്പിച്ചതും പ്രതിഷേധത്തിലേക്ക് നയിച്ചതും എന്നാണ് കരുതുന്നത്.

വീഡിയോയില്‍ റെയില്‍വേ സ്റ്റേഷനില്‍ ഒരു ട്രെയിൻ നിർത്തിയിട്ടിരിക്കുന്നതാണ് ആദ്യം കാണുന്നത്. യാത്രക്കാർ അങ്ങോട്ടും ഇങ്ങോട്ടും നടക്കുന്നതും കാണാം. ആകെ ആശങ്കയോടെയാണ് ആളുകള്‍ അങ്ങോട്ടും ഇങ്ങോട്ടും നടക്കുന്നത്. വാതില്‍ തുറന്നിട്ടുണ്ടോ എന്ന് യാത്രക്കാർ പരിശോധിക്കുകയും ചെയ്തിരുന്നു.

പിന്നെ കാണുന്നത് ആളുകള്‍ നേരെ ട്രെയിനിന്റെ മുന്നിലേക്ക് പോകുന്നതാണ്. അവിടെ വേറെയും ആളുകളുണ്ട്. ആളുകള്‍ സഞ്ചികളും മറ്റുമായി ട്രെയിനിന്റെ മുന്നില്‍ നില്‍ക്കുന്നത് കാണാം. അവിടെ നിന്നും ആളുകള്‍ പ്രതിഷേധിക്കുന്നതും കാണാം. ആളുകള്‍ കയർക്കുന്നുണ്ട്.

ട്രെയിനില്‍ തിരക്കായതുകൊണ്ട് കൂടുതല്‍ ആളുകള്‍ കേറാതിരിക്കാനായിട്ടാണ് ട്രെയിനിന്റെ അകത്തുണ്ടായിരുന്ന യാത്രക്കാർ ഡോറുകള്‍ അടച്ചിട്ടിരിക്കുന്നത് എന്നാണ് പറയുന്നത്.

മഹാകുംഭമേളയോടനുബന്ധിച്ചടക്കം ടിക്കറ്റില്ലാത്ത നിരവധി യാത്രക്കാർ ട്രെയിനില്‍ കയറുന്നുണ്ട് എന്നും റിപ്പോർട്ടുകള്‍ പറയുന്നു. എന്തായാലും, വീഡിയോ പെട്ടെന്നാണ് ശ്രദ്ധിക്കപ്പെട്ടത്. നിരവധിപ്പേർ വീഡിയോയ്ക്ക് കമന്റുകളുമായും എത്തി.