ഡ്രൈവറുടെ കാലിലെ മസില്‍ വലിഞ്ഞു; സ്വകാര്യ ബസിന്റെ നിയന്ത്രണം വിട്ട് മതിലില്‍ ഇടിച്ചു നിന്നു, ഒഴിവായത് വൻ അപകടം,

തിരുവനന്തപുരം: നിയന്ത്രണം തെറ്റി എത്തിയ സ്വകാര്യ ബസ് വാഹനങ്ങളില്‍ ഇടിച്ച ശേഷം വീടിന്‍റെ മതിലില്‍ ഇടിച്ചു നിന്നു അപകടം.

കാട്ടു പുതുശേരി മൊട്ടമൂട് ജങ്ഷന് സമീപമായിരുന്നു സംഭവം നടന്നത്. ആയൂരില്‍ നിന്നും ആറ്റിങ്ങല്‍ ഭാഗത്തേക്ക് വന്ന സ്വകാര്യ ബസ് ആണ് അപകടത്തില്‍പ്പെട്ടത്.

ഡ്രൈവറുടെ കാലിലെ മസില്‍ വലിഞ്ഞതോടെയാണ് ബസ് നിയന്ത്രണം നഷ്ടപ്പെട്ട് വാഹനങ്ങളിലും വീടിന്‍റെ മതിലിലും ഇടിച്ചു നിന്നത്. അപകട സമയത്ത് ബസില്‍ ഇരുപതോളം യാത്രക്കാർ ഉണ്ടായിരുന്നെങ്കിലും ആർക്കും പരിക്കുകളില്ല.

മിനി പിക്കപ്പിലും പോസ്റ്റിലും ഇടിച്ച ശേഷമാണ് ബസ് റോഡില്‍ നിന്നും തെന്നിമാറി സമീപത്തെ വീടിന്‍റെ മതിലില്‍ ഇടിച്ചു നിന്നത്. 

ഇടിയുടെ ആഘാതത്തില്‍ ബസിന്‍റെ ചില്ലുകളും മുൻഭാഗവും തകർന്നു. പിക്കപ്പിനും കേടുപാടുകള്‍ സംഭവിച്ചിട്ടുണ്ട്. സ്ഥലത്ത് പോലീസെത്തി മേല്‍ നടപടികള്‍ സ്വീകരിച്ചു.