പി ജി മെഡിക്കൽ കോഴ്‌സുകളിലെ സ്റ്റേറ്റ് ക്വാട്ട സീറ്റുകളിലേക്കു നടത്തുന്ന അലോട്‌മെന്റിന്റെ മൂന്നാംഘട്ടത്തിലേക്ക് പുതിയ ഓപ്ഷനുകൾ ക്ഷണിച്ചു

തിരുവനന്തപുരം:കേരള പ്രവേശനപരീക്ഷാ കമ്മിഷണർ, പോസ്റ്റ് ഗ്രാജ്വേറ്റ് (പി.ജി.) മെഡിക്കൽ കോഴ്‌സുകളിലെ സ്റ്റേറ്റ് ക്വാട്ട സീറ്റുകളിലേക്കു നടത്തുന്ന അലോട്‌മെന്റിന്റെ മൂന്നാംഘട്ടത്തിലേക്ക് പുതിയ ഓപ്ഷനുകൾ ക്ഷണിച്ചു.

ഒഴിവുകൾ: രണ്ടാംഘട്ടത്തിനുശേഷമുള്ള ഒഴിവുകളാണ് മുഖ്യമായും ഈ ഘട്ടത്തിൽ നികത്തുക. ഒഴിവുകളുടെ പട്ടിക www.cee.kerala.gov.in -ൽ പ്രസിദ്ധപ്പെടുത്തിയിട്ടുണ്ട്.

കൂടാതെ, കോഴിക്കോട് കെ.എം.സി.ടി. മെഡിക്കൽ കോളേജ്, പാലക്കാട് പി.കെ. ദാസ് മെഡിക്കൽ കോളേജ് എന്നിവയിൽ അനുവദിച്ച അധിക സീറ്റുകൾ, ഒഴിവുള്ള കാറ്റഗറി സീറ്റുകൾ വ്യവസ്ഥകൾപ്രകാരം പരിവർത്തനം ചെയ്യുമ്പോൾ വരുന്ന ഒഴിവുകൾ, കൗൺസലിങ് പ്രക്രിയയിൽ ഉണ്ടായേക്കാവുന്ന ഒഴിവുകൾ എന്നിവയും ഈ ഘട്ടത്തിൽ നികത്തും. അതിനാൽ, നിലവിലെ വേക്കൻസികൾ മാത്രം പരിഗണിക്കാതെ, അലോട്‌മെന്റ് ലഭിച്ചാൽ സ്വീകരിക്കുമെന്ന് ഉറപ്പുള്ള സീറ്റുകൾകൂടി പരിഗണിച്ച് ഓപ്ഷൻ രജിസ്റ്റർചെയ്യാൻ ശ്രദ്ധിക്കണം.

പുതിയ ഓപ്ഷൻ നിർബന്ധം: മൂന്നാംഘട്ടത്തിൽ പങ്കെടുക്കുന്നവരെല്ലാം പുതിയ ഓപ്ഷനുകൾ രജിസ്റ്റർചെയ്യണം. മുൻഘട്ടങ്ങളിലേക്ക് രജിസ്റ്റർചെയ്ത ഓപ്ഷനുകൾ, മൂന്നാംഘട്ടത്തിലേക്ക് പരിഗണിക്കുന്നതല്ല.

അർഹത: പ്രവേശനപരീക്ഷാ കമ്മിഷണർ 16.11.2024-ന് പ്രസിദ്ധപ്പെടുത്തിയ പി.ജി. മെഡിക്കൽ 2024 കേരള മെറിറ്റ് പട്ടികയിൽ ഉൾപ്പെട്ടവർ (അർഹതയ്ക്കു വിധേയമായി), 05.01.2025, 07.01.2025 എന്നീ തീയതികളിലെ വിജ്ഞാപനപ്രകാരം പുതുതായി അപേക്ഷ നൽകിയവർ എന്നിവർക്ക് www.cee.kerala.gov.in വഴി ജനുവരി 13-ന് വൈകീട്ട് മൂന്നുവരെ പുതിയ ഓപ്ഷനുകൾ രജിസ്റ്റർചെയ്യാം.പുതുതായി അപേക്ഷിച്ചവരുടെ അപേക്ഷ, അവർ സംവരണത്തിനായി അപ്‌ലോഡ് ചെയ്ത രേഖകൾ എന്നിവയുടെ പരിശോധന പൂർത്തിയാക്കി അർഹത ലഭിച്ചാൽമാത്രമേ നൽകിയ ഓപ്ഷനുകൾ അലോട്‌മെന്റിനായി പരിഗണിക്കൂ.

പുതുതായി അപേക്ഷ നൽകിയ ഇൻ-സർവീസ് അപേക്ഷകർക്ക്, അവരുടെ ഇൻസർവീസ് ക്വാട്ട അർഹത മെഡിക്കൽ വിദ്യാഭ്യാസ ഡയറക്ടർ അംഗീകരിച്ച ശേഷമേ ഓപ്ഷനുകൾ രജിസ്റ്റർചെയ്യാൻ കഴിയൂ.ഇൻ-സർവീസ് അപേക്ഷകരുടെ പുതുക്കിയ സ്റ്റേറ്റ്-അധിഷ്ഠിത റാങ്ക്, എൻ.ബി.ഇ.എം.എസ്. ലഭ്യമാക്കിയതിനുശേഷമേ അവരുടെ ഓപ്ഷനുകൾ അലോട്മെന്റിനായി പരിഗണിക്കൂ.

രജിസ്‌ട്രേഷൻ ഫീ: ആദ്യഘട്ടത്തിൽ രജിസ്റ്റർചെയ്യാത്തവർക്ക് ഈ ഘട്ടത്തിൽ പങ്കെടുക്കാൻ താത്പര്യമുണ്ടെങ്കിൽ പുതുതായി ഓപ്ഷൻ രജിസ്‌ട്രേഷൻ ഫീ അടച്ച് രജിസ്റ്റർ ചെയ്യണം. രണ്ടാംഘട്ടത്തിൽ അലോട്‌മെന്റ് ലഭിച്ച് പ്രവേശനം നേടാത്തവർ, പ്രവേശനം നേടി സീറ്റ് ഉപേക്ഷിച്ചവർ എന്നിവരും മൂന്നാം റൗണ്ടിൽ പങ്കെടുക്കാൻ വീണ്ടും രജിസ്‌ട്രേഷൻ ഫീസ് അടയ്ക്കണം. തുകയുടെ വിശദാംശങ്ങൾ വിജ്ഞാപനത്തിലുണ്ട്.