ബഹ്റൈനില്‍ നിന്നുള്ള ഹജ്ജ് -ഉംറ തീര്‍ത്ഥാടകര്‍ക്ക് മെനിഞ്ജൈറ്റിസ് വാക്സിൻ നിര്‍ബന്ധം

മനാമ: ബഹ്റൈനില്‍ നിന്നുള്ള ഹജ്ജ് -ഉംറ തീർത്ഥാടകർ എടുത്തിരിക്കേണ്ട വാക്സിൻ സംബന്ധിച്ച മാർഗനിർദേശങ്ങളിറക്കി ആരോഗ്യ മന്ത്രാലയം.

ഒന്നോ അതില്‍ കൂടുതലോ പ്രായമുള്ള എല്ലാ തീർത്ഥാടകരും പുറപ്പെടുന്നതിന് പത്ത് ദിവസം മുൻപെങ്കിലും മെനിഞ്ജൈറ്റിസ് വാക്സിൻ എടുത്തിരിക്കണമെന്ന് മന്ത്രാലയം അറിയിച്ചു.  ഹജ്ജ് -ഉംറ സീസണിനോടനുബന്ധിച്ച്‌ സൗദി അറേബ്യ പുറപ്പെടുവിച്ച പുതിയ ആരോഗ്യ നിർദേശങ്ങളെതുടർന്നാണ് ഈ അറിയിപ്പ്.

രാജ്യത്തെ എല്ലാ പ്രാഥമിക ആരോഗ്യ കേന്ദ്രങ്ങളിലും വാക്സിൻ ലഭ്യമാണ്. രാവിലെ ഏഴു മണി മുതല്‍ വൈകിട്ട് ആറു മണി വരെ ഈ ആരോഗ്യ കേന്ദ്രങ്ങള്‍ സന്ദർശിച്ച്‌ വാക്സിനുകള്‍ സ്വീകരിക്കാവുന്നതാണ്.

കൂടാതെ, ബന്ധപ്പെട്ട അധികാരികളില്‍ നിന്ന് അംഗീകൃത വാക്സിനേഷൻ സർട്ടിഫിക്കറ്റ് കൈപ്പറ്റണമെന്നും അറിയിപ്പില്‍ പറയുന്നുണ്ട്. ഈ സർട്ടിഫിക്കറ്റിന് അഞ്ചു വർഷം വരെ സാധുതയുണ്ടായിരിക്കും.