നാരായണീയ പുണ്യം നുകർന്ന് ജപ്പാൻ സ്വദേശിനി മിഷ കോട്ടയത്ത്

കോട്ടയം ; നാരായണീയ ദിനത്തിൽ സമ്പൂർണ നാരായണീയ പാരായണത്തിന് അവസരം ലഭിച്ചതിന്റെ സന്തോഷത്തിലാണു ജപ്പാനിൽനിന്നുള്ള മിഷ. ചിന്മയ രാജ്യാന്തര കേന്ദ്രത്തിന്റെ വെബിനാറുകളിലൂടെ ഭാരതീയ സംസ്കാര പഠനത്തിൽ ആകൃഷ്ടയായ മിഷ അറിവന്വേഷണത്തിന്റെ ഭാഗമായാണ് വെളിയനാട് ചിന്മയ കേന്ദ്രത്തിൽ എത്തിയത്.

ചിന്മയ രാജ്യാന്തര കേന്ദ്രവും ചിന്മയ വിശ്വ വിദ്യാപീഠവും സംയുക്തമായി നടത്തുന്ന വേദാന്ത സാധക കോഴ്സിലെ വിദ്യാർഥിനിയാണ്.  നാരായണീയ ദിനത്തിൽ വെളിയനാട് ചിന്മയ കേന്ദ്രവും കോട്ടയം ചിന്മയ മിഷനും ചേർന്ന് പാലമുറി ചിന്മയ ആശ്രമത്തിൽ നടത്തുന്ന സമ്പൂർണ നാരായണീയ പാരായണത്തിൽ മിഷ പങ്കെടുക്കും. ഇന്ത്യയിൽ എത്തുന്നതിനു മുൻപ് തന്നെ നാരായണീയവും ഭഗവദ്ഗീതയും പാരായണം ചെയ്യാൻ മിഷ പഠിച്ചിരുന്നു. യോഗാചാര്യയുമാണ്. 

മണർകാട് ചിന്മയ ആശ്രമത്തിൽ 13ന് സമ്പൂർണ നാരായണീയ പാരായണ യജ്ഞം മിഷ ഉദ്ഘാടനം ചെയ്യും. ദേവകി ചൈതന്യ ആചാര്യയാകും. കോട്ടയം ചിന്മയ മിഷൻ ഭാരവാഹികളായ എൻ.രാജഗോപാൽ, എ.എസ്.മണി, യജ്ഞം കൺവീനർ ഡി.പാർവതിയമ്മ തുടങ്ങിയവർ നേതൃത്വം നൽകും.