പാലക്കാട് സി.പി.എം ബ്രാഞ്ച് അംഗം ബി.ജെ.പിയില്‍, കൂടുതൽ പേർ പാർട്ടി വിടുമെന്ന് സൂചന,

പാലക്കാട്: സി.പി.എം ബ്രാഞ്ച് അംഗവും കുഴല്‍മന്ദം മുൻ ഓഫിസ് സെക്രട്ടറിയും ഡി.വൈ.എഫ്.ഐ, എസ്.എഫ്.ഐ മുൻ പ്രാദേശിക നേതാവുമായ എം.ലെനിൻ ബി.ജെ.പിയില്‍ ചേർന്നു.

ബി.ജെ.പി ജില്ല കാര്യാലയത്തിലെത്തി സംസ്‌ഥാന ജനറല്‍ സെക്രട്ടറി സി. കൃഷ്ണകുമാറില്‍ നിന്നാണ് അംഗത്വം സ്വീകരിച്ചത്. 

ജില്ല അധ്യക്ഷൻ കെ.എം. ഹരിദാസ്, ജില്ല ജനറല്‍ സെക്രട്ടറിമാരായ പി. വേണുഗോപാലൻ, എ.കെ. ഓമനക്കുട്ടൻ, ആലത്തൂർ മണ്ഡലം ജനറല്‍ സെക്രട്ടറി കനകദാസ് എന്നിവരും പങ്കെടുത്തു.

സി.പി.എം പ്രവർത്തകൻ മുകുന്ദനും ഇതോടൊപ്പം ബി.ജെ.പി അംഗത്വം സ്വീകരിച്ചു. തേങ്കുറുശ്ശി മഞ്ഞളൂർ പ്രദേശത്തെ സി.പി.എം പ്രാദേശിക നേതാവ് ഉള്‍പ്പെടെ ചിലർ വരും ദിവസങ്ങളില്‍ രാജിവെച്ച്‌ മറ്റ് പാർട്ടികളില്‍ ചേരുമെന്ന് സൂചനയുണ്ട്.