കൈക്കൂലി വാങ്ങുന്നതിനിടയില്‍ പണികിട്ടി; താല്‍ക്കാലിക സര്‍വേയറെ കൈയ്യോടെ പൊക്കി വിജിലൻസ്;

ഇടുക്കി: കൈക്കൂലി വാങ്ങുന്നതിനിടയില്‍ താല്‍ക്കാലിക സർവേയർ വിജിലൻസ് പിടിയില്‍. ഇടുക്കി ദേവികുളം താലൂക്കിലെ സർവേയർ എസ് നിതിനാണ് 50,000 രൂപ കൈക്കൂലി വാങ്ങുന്നതിനിടെ എറണാകുളം നേര്യമംഗലത്ത് വച്ച്‌ പിടിയിലായത്.

ബൈസണ്‍ വാലി പൊട്ടൻകാടുള്ള 146 ഏക്കർ വരുന്ന ഏലത്തോട്ടം ഡിജിറ്റല്‍ സർവേ പ്രകാരം അളന്നു തിട്ടപ്പെടുത്തി കൊടുക്കുന്നതിനാണ് നിതിൻ കൈക്കൂലി വാങ്ങിയത്. എസ്റ്റേറ്റ് മാനേജരോട് ഒരുലക്ഷം രൂപ കൈക്കൂലി ആവശ്യപ്പെട്ടെങ്കിലും അത്രയും തുക നല്‍കാൻ കഴിയില്ലെന്ന് പറഞ്ഞതിനാല്‍ 50,000 രൂപ നല്‍കാൻ നിതിൻ ആവശ്യപ്പെടുകയായിരുന്നു.

എസ്റ്റേറ്റ് മാനേജർ വിവരമറിയിച്ചതിനെ തുടർന്ന് ഇടുക്കി വിജിലൻസാണ് കൈക്കൂലി കൈമാറുന്നതിനിടെ നിതിനെ പിടികൂടിയത്. അറസ്റ്റ് ചെയ്ത പ്രതിയെ മൂവാറ്റുപുഴ വിജിലൻസ് കോടതിയില്‍ ഹാജരാക്കും.