ഗതാ​ഗത നിയമലംഘനകൾ വർധിച്ചുവരുന്നു; ഫൈനുകൾ വർധിപ്പിക്കേണ്ട സാഹചര്യം;കെ.ബി. ​ഗണേഷ് കുമാർ

തിരുവനന്തപുരം: പത്തനംതിട്ട മുറിഞ്ഞകല്ലിൽ മിനി ബസും കാറും കൂട്ടിയിടിച്ച് നവദമ്പതിമാരടക്കം നാലുപേർ മരിച്ച സംഭവം ഡ്രൈവർ ഉറങ്ങിപ്പോയതായിരിക്കാമെന്ന് ​ഗതാ​ഗത മന്ത്രി കെ.ബി. ​ഗണേഷ് കുമാർ. റോഡിന് എന്തെങ്കിലും പ്രശ്നമുള്ളതായി ശ്രദ്ധയിൽപ്പെട്ടിട്ടില്ല.​ഗതാ​ഗത നിയമലംഘനകൾ വർധിച്ചുവരികയാണ്. ഫൈനുകൾ വർധിപ്പിക്കേണ്ട സാഹചര്യമാണുള്ളത്. റോഡുപയോ​ഗിക്കുന്നവരെല്ലാം ശ്രദ്ധാലുക്കളാകുക എന്നതുമാത്രമേ ചെയ്യാനുള്ളൂ എന്നും അദ്ദേഹം പറഞ്ഞു.

ഒരപകടത്തിൽ ഒരു മരണം എന്നത് ഒരു കുടുംബത്തിന്റെ അവസ്ഥയിലുണ്ടാവുന്ന ദുഃഖകരമായ മാറിമറിയൽ ആണെന്ന് മന്ത്രി കെ.ബി.​ഗണേഷ് കുമാർ പറഞ്ഞു. അതുകൊണ്ടുതന്നെ റോഡപകടങ്ങളും മരണങ്ങളും കുറയേണ്ടത് നമ്മൽ ഓരോരുത്തരുടേയും ആവശ്യമാണ്. ഇതിനൊരു പരിഹാരം കാണണമെന്ന് എല്ലാവരും തീരുമാനമെടുക്കണം. വാഹനമോടിക്കുന്നവരും അല്ലാത്തവരും റോഡുപയോ​ഗിക്കുമ്പോൾ വളരെ ശ്രദ്ധാലുക്കളായിരിക്കുകയല്ലാതെ വേറെ മാർ​ഗമില്ലെന്നും അദ്ദേഹം പറഞ്ഞു.

"1999-ൽ സ്ഥലമേറ്റെടുത്തിട്ടതാണ് ഇപ്പോൾ അപകടമുണ്ടായ ഈ റോഡ്. ലോക ബാങ്ക് ഉപേക്ഷിച്ച റോഡായിരുന്നു. ഒന്നാം പിണറായി സർക്കാരിന്റെ കാലത്ത് മന്ത്രി ജി.സുധാകരനുമേൽ വളരെയധികം സമ്മർദം ചെലുത്തി ഈ റോഡ് കൊണ്ടുവരാൻ ശ്രമിച്ചു. ഞാനാണ് അതിന്റെ മുൻപന്തിയിലുണ്ടായിരുന്നത്. പത്തനാപുരത്തുനിന്നാണ് റോഡിന്റെ ഉദ്ഘാടനംപോലും നടന്നത്. വളരെയധികം ഇടപെടൽ നടത്തിയ ശേഷമാണ് ലോകബാങ്കിനെ ഇതിലേക്ക് തിരിച്ചുകൊണ്ടുവന്നത്. മോട്ടോർ വെഹിക്കിൾ ഉദ്യോ​ഗസ്ഥർ പറയുന്നതുപോലെ ഈ റോഡിൽ അപകടസാധ്യതയുള്ള സ്ഥലങ്ങളില്ല. വീതി കൂടിയ, നേരെ പോകുന്ന ഒരുപാട് ഭാ​ഗങ്ങളുണ്ട്. വിദ​ഗ്ധരാണെന്ന് സ്വയം കരുതുന്ന ഡ്രൈവർ വളരെ വേ​ഗത്തിലാണ് വാഹനമോടിക്കുക, അതിൽ വേറൊന്നും ചെയ്യാനില്ല.

നമ്മൾ വണ്ടിയോടിക്കുമ്പോൾ ഒരു നായയോ പൂച്ചയെ കുറുകെ ചാടിയാൽ നല്ല രീതിയിൽ നിർത്താൻ പറ്റുമോയെന്ന് ചിന്തിക്കുക. ആ ചിന്ത ഇല്ലാതെയാണ് നമ്മൾ വണ്ടിയോടിക്കുന്നത്. നമ്മൾ സ്വന്തം കാര്യം മാത്രമേ നോക്കാറുള്ളൂ. ഡ്രൈവർ ഉറങ്ങിപ്പോയാൽ വാഹനത്തിന്റെ നിയന്ത്രണം പെട്ടന്ന് നഷ്ടപ്പെടും. ഏതെങ്കിലും ഒരു ഭാ​ഗത്തേക്ക് തിരിഞ്ഞാൽ ഇടിക്കുന്നത് വളരെ ശക്തമായിട്ടായിരിക്കും. നല്ല റോഡുകൾ ഉണ്ടാകുമ്പോൾ അപകടമുണ്ടാവും. ഇക്കാരണംകൊണ്ട് നല്ല റോഡുകൾ ഉണ്ടാക്കാതിരിക്കാൻ പറ്റുമോ?

എല്ലാ ജം​ഗ്ഷനിലും ഹംപ് വെയ്ക്കുന്നതും അപകടങ്ങൾ വിളിച്ചുവരുത്തും. ഡ്രൈവിങ്ങിൽ സ്വയം അച്ചടക്കം പുലർത്തുകയല്ലാതെ ഇതിന് അടിസ്ഥാനപരമായി ഒരു മോചനമില്ല. ​ഗതാ​ഗത നിയമലംഘനത്തിന് പിഴയീടാക്കുന്നുണ്ട്. പക്ഷേ ചിലയാളുകൾ ഇതുവല്ലാതെ ദുരുപയോ​ഗം ചെയ്യുന്നുണ്ട്. അമിതവേ​ഗത്തിൽ വാഹനമോടിച്ച് വരികയും ക്യാമറ കണ്ടാൽ ഉടൻ ചവിട്ടി, ഇതിന്റെ പരിധിക്ക് അപ്പുറം കടന്നാൽ വീണ്ടും വേ​ഗത കൂട്ടുകയും ചെയ്യും. മൂവിങ് ക്യാമറ ഉപയോ​ഗിച്ച് പ്രതീക്ഷിക്കാത്ത സ്ഥലങ്ങളിൽ വാഹനം പരിശോധിക്കുന്ന സംവിധാനം ആലോചിക്കുന്നുണ്ട്." മന്ത്രി പറഞ്ഞു.

ഡ്രൈവിം​ഗുമായി ബന്ധപ്പെട്ട് അവബോധമുണ്ടാക്കാനുള്ള കാര്യങ്ങൾ പഠിപ്പിക്കാൻ ഡ്രൈവിം​ഗ് സ്കൂളുകളോട് നിർദേശിക്കും. കെ.എസ്.ആർ.ടി.സി തുടങ്ങിയ ഡ്രൈവിം​ഗ് സ്കൂളിൽ ഇതെല്ലാം പഠിപ്പിക്കുന്നുണ്ട്. മറ്റ് 13 ഇടങ്ങളിൽ ഉടനാരംഭിക്കും. ഇവിടെ വാഹനങ്ങൾ വാങ്ങാൻ തീരുമാനമായിക്കഴിഞ്ഞു. കെ.എസ്.ആർ.ടി.സി കേന്ദ്ര സർക്കാരിനോട് ഒരു പദ്ധതി അവതരിപ്പിച്ചിട്ടുണ്ട്. ഇപ്പോൾ ഡ്രൈവിം​ഗ് അറിയുന്നവരെ ഒന്നുകൂടി കാലാനുസൃതമായ മാറ്റങ്ങൾ പഠിപ്പിക്കാൻ ഒരു സംവിധാനം കൊണ്ടുവരുന്നതാണിത്. എല്ലാ ജില്ലയിലും ഒന്ന് എന്ന നിലയിലായിരിക്കും ഇതെന്നും മന്ത്രി അറിയിച്ചു.