മുനമ്പം വഖഫ് ഭൂമി പ്രശ്നം; മുഖ്യമന്ത്രി ഉന്നതതല യോഗം വിളിച്ചു

തിരുവനന്തപുരം: മുനമ്പം വഖഫ് ഭൂമി പ്രശ്നത്തിൽ ഇടപെട്ട് മുഖ്യമന്ത്രി ഉന്നതതല യോഗം വിളിച്ചു. ഉപതിരഞ്ഞെടുപ്പ് കഴിഞ്ഞതിന് ശേഷം 16 നാണ് മുഖ്യമന്ത്രി ഓൺലൈനായി യോഗം വിളിച്ചിരിക്കുന്നത്. മുഖ്യമന്ത്രിക്ക് പുറമെ നിയമ റവന്യു മന്ത്രിമാരും വഖഫ് ചുമതലയുള്ള മന്ത്രി വി.അബ്ദുറഹ്മാനും വഖഫ് ബോർഡ്‌ ചെയർമാനും യോഗത്തിൽ പങ്കെടുക്കും.

കോടതിയിൽ നിലവിലുള്ള കേസുകളും യോ​ഗത്തില്‍ ചർച്ച ചെയ്യുമെന്നാണ് റിപ്പോർട്ടുകൾ. മുനമ്പത്തെ 614 കുടുംബങ്ങളുടെ റവന്യു ആവശ്യങ്ങൾ പുനസ്ഥാപിക്കുന്നതിലും ചർച്ചയുണ്ടാകും. അതേസമയം മുനമ്പം-വഖഫ് പ്രശ്ന പരിഹാരത്തിന് സർവകക്ഷി യോഗം വിളിക്കണം എന്നാണ് പ്രതിപക്ഷ നേതാവ് വി.ഡി സതീശൻ ആവശ്യപെടുന്നത്.

അതേസമയം, ഇക്കാര്യം അറിയിച്ച് വി.ഡി സതീശൻ ഇന്ന് മുഖ്യമന്ത്രിക്ക് കത്ത് നൽകും. മുനമ്പം പ്രശ്നം പാർലമെന്റിൽ ഉന്നയിച്ചിട്ടുണ്ടെന്ന് കേന്ദ്രസഹമന്ത്രി സുരേഷ് ഗോപി കഴിഞ്ഞ ദിവസം പറഞ്ഞിരുന്നു. ജനങ്ങളുടെ വിഷയത്തിൽ ഇടപെടാത്തവരോട് രാജി വെച്ച് പോകാൻ പറയണമെന്നും സുരേഷ് ​ഗോപി പ്രതികരിച്ചിരുന്നു.