ബംഗളൂരുവിൽ ആറുനില കെട്ടിടം തകർന്നു 3 മരണം; നിരവധി പേർ കുടുങ്ങി കിടക്കുന്നതായി റിപ്പോർട്ട്

ബംഗളൂരു: ബംഗളൂരുവിൽ കെട്ടിടം തകർന്നുവീണ അപകടത്തിൽ 3 മരണം.

15 പേർ കുടുങ്ങിക്കിടക്കുന്നതായും മാധ്യമങ്ങൾ റിപ്പോർട്ട് ചെയ്തു. കിഴക്കൻ ബംഗളൂരുവിലെ ഹോറമാവ് അഗാര ഏരിയയിലാണ് സംഭവം. സ്ഥലത്ത് രക്ഷാപ്രവർത്തനം പുരോഗമിക്കുകയാണ്.

കെട്ടിടം പൂർണമായി തകർന്നു വീണു. കനത്ത മഴയെത്തുടർന്നാണ് കെട്ടിടം തകർന്നുവീണതെന്നാണ് വിവരം. ദേശീയ ദുരന്ത നിവാരണ സേനയും എസ്ഡിആർഎഫ് സംഘങ്ങളും സ്ഥലത്തുണ്ട്. 3 പേരെ രക്ഷപ്പെടുത്തിയതായാണ് വിവരം. 

ആറുനില കെട്ടിടമാണ് തകർന്നുവീണത്. കെട്ടിടം തകർന്നുവീഴുന്നതിൻറെ സിസിടിവി ദൃശ്യങ്ങൾ പുറത്തുവന്നിട്ടുണ്ട്. പ്രദേശത്ത് ദിവസങ്ങളായി ശക്തമായ മഴ തുടരുകയാണ്.