ഹോണ്‍ മുഴക്കിയാലും പാളത്തില്‍ നിന്ന് മാറുന്നില്ല ; ആവര്‍ത്തിച്ചാല്‍ രക്ഷിതാക്കള്‍ക്കെതിരെ നടപടി എടുക്കും: മലപ്പുറത്ത് വിദ്യാര്‍ത്ഥികള്‍ക്കെതിരെ പരാതി,

 മലപ്പുറം : സെല്‍ഫി എടുക്കാനും മറ്റുമായി പാളത്തില്‍ ഇരിക്കുന്ന കുട്ടികള്‍ക്ക് മുന്നറിയിപ്പുമായി ആർ പി എഫ്.

ഹോണ്‍ മുഴക്കി ട്രെയിൻ എത്തിയാല്‍ പോലും താനൂരിലെ സ്കൂള്‍ കുട്ടികള്‍ പാളത്തില്‍ നിന്ന് മാറുന്നില്ലെന്നാണ് ലോക്കോ പൈലറ്റുമാർ റിപ്പോർട്ട് ചെയ്തിരിക്കുന്നത് .തുടർന്ന് സ്കൂളില്‍ നേരിട്ടെത്തി മുന്നറിയിപ്പ് നല്‍കുകയായിരുന്നു ആർപിഎഫ്.

പാളത്തില്‍ അശ്രദ്ധമായി നില്‍ക്കാൻ പാടില്ലെന്നും കർശനമായ നടപടി എടുക്കുമെന്നും ആർപിഎഫ് കാട്ടിലങ്ങാടി ഗവ. ഹയർസെക്കൻഡറി സ്കൂളിലെത്തിയാണ് ആർ പി എഫ് വിദ്യാർത്ഥികളെ അറിയിച്ചത്. ഇനിയും ആവർത്തിച്ചാല്‍ രക്ഷിതാക്കള്‍ക്കെതിരെയും നടപടിയുണ്ടാകും.

പാളത്തിനു നടുവിലൂടെയുള്ള നടത്തം, പാളത്തില്‍ കയറി സെല്‍ഫിയെടുക്കല്‍, സ്റ്റേഷനില്‍ കൂട്ടംകൂടിനിന്ന് അപരിചിതരുമായുള്ള ചങ്ങാത്തംകൂടല്‍ തുടങ്ങിയ വിഷയങ്ങള്‍ പോലീസ് പ്രിൻസിപ്പലിനെ ധരിപ്പിച്ചു. 

ആറു മാസങ്ങള്‍ക്കുമുൻപ്

ഗവ. ദേവധാർ ഹയർസെക്കൻഡറി സ്കൂള്‍ വിദ്യാർഥികള്‍ പാളത്തിലൂടെ നടക്കുമ്പോള്‍ ട്രെയിനിനു മുന്നില്‍നിന്ന് തലനാരിഴയ്‌ക്ക് രക്ഷപ്പെട്ട സംഭവത്തില്‍ ലോക്കോ പൈലറ്റ് പ്രഥമാധ്യാപികയ്‌ക്ക് വാട്സാപ്പ് സന്ദേശം അയച്ചതും വാർത്തയായിരുന്നു.