പറന്നുയർന്ന വിമാനം ഏതാനും മിനുട്ടുകള്‍ക്കകം റഡാറില്‍ നിന്നും അപ്രത്യക്ഷമായി: വ്യോമസേനാ വിമാനം തകര്‍ന്ന് പൈലറ്റിന് ദാരുണാന്ത്യം,

കുവൈത്ത്: കുവൈത്തില്‍ വ്യോമസേനാ വിമാനം തകർന്ന് പൈലറ്റ് മരിച്ചു. ക്യാപ്റ്റൻ മുഹമ്മദ് മഹ്മൂദ് അബ്ദുല്‍ റസൂല്‍ ആണ് വീരമൃത്യു വരിച്ചത്.

വ്യോമ സേനയുടെ F18 യുദ്ധ വിമാനമാണ് അപകടത്തില്‍ പെട്ടത്. അപകട കാരണം വിശദമായി അന്വേഷിക്കുന്നതിന് ആഭ്യന്തര മന്ത്രി ഷെയ്ഖ് ഫഹദ് അല്‍ യൂസുഫ് ഉത്തരവ് പുറപ്പെടുവിച്ചു.

രാജ്യത്തിന്റെ വടക്കൻ പ്രദേശമായ റൗദത്താനില്‍ വെച്ചാണ് ദുരന്തം സംഭവിച്ചത്. അലി സാലേം എയർ ബേസില്‍ നിന്നും പറന്നുയർന്ന വിമാനം ഏതാനും മിനുട്ടുകള്‍ക്കകം റഡാറില്‍ നിന്നും അപ്രത്യക്ഷമാകുകയായിരുന്നു. സാധാരണ പരിശീലന പറത്തല്‍ നടത്തുന്നതിനിടയിലാണ് അപകടം.

ക്യാപ്റ്റൻ പൈലറ്റ് മുഹമ്മദ് മഹ്മൂദ് അബ്ദുല്‍ റസൂലിൻ്റെ കുടുംബത്തിന് അമീർ ഷെയ്ഖ് മിഷാല്‍ അല്‍-അഹമ്മദ് അല്‍-ജാബർ അല്‍-സബാഹ് അനുശോചനം അറിയിച്ചു

കിരീടാവകാശി ഷെയ്ഖ് സബാഹ് അല്‍-ഖാലിദ്, പ്രധാനമന്ത്രി ഷെയ്ഖ് അഹമ്മദ് അബ്ദുല്ല അല്‍ അഹമ്മദ് എന്നിവരും ഫ്ലൈറ്റ് ലെഫ്റ്റനൻ്റിൻ്റെ വേർപാടില്‍ അനുശോചിച്ചു.