പന്ത്രണ്ട് മണിക്കൂറോളം നീണ്ടുനിന്ന ആഘോഷം.. ചരിത്രത്തിൽ ഇടം നേടി അയർലണ്ടിലെ IFA ഓണാഘോഷം....

ദ്രോഗ്ഡ: പന്ത്രണ്ട് മണിക്കൂറോളം നീണ്ടുനിന്ന ആഘോഷം..  ചരിത്രത്തിൽ ഇടം നേടി അയർലണ്ടിലെ IFA  ഓണാഘോഷം....   

ദ്രോഗ്ഡയിലെ പ്രവാസി ഇന്ത്യൻ കൂട്ടായ്മയായ ഇന്ത്യൻ ഫാമിലി അസോസിയേഷൻ (IFA) സെപ്റ്റംബർ ഏഴാം തീയതി ശനിയാഴ്ച GAA Termonfeckin ഓഡിറ്റോറിയത്തിൽ സംഘടിപ്പിച്ച ‘പൊന്നോണം 24’ ജനബാഹുല്യവും, സംഘാടന മികവും, പ്രോഗ്രാമുകളുടെ നിലവാരവും കൊണ്ട് ചരിത്ര സംഭവം ആയി മാറി. 

800 ൽ പരം ആളുകൾ പങ്കെടുത്ത ഓണാഘോഷം ദ്രോഗ്ടയിൽ എന്നല്ല അയർലണ്ടിലെ മറ്റേതൊരു കൗണ്ടിയിലും അപൂർവത തന്നെ ആണ്. IFA യുടെ ഭാരവാഹികൾക്കൊപ്പം കൗൺസിലർ Ejiro O’Hare Stratton ഓണാഘോഷങ്ങൾക്ക് തിരികൊളുത്തി.

ഇതുവരെ അനുഭവിക്കാത്ത അവിസ്മരണീയ ഓണാഘോഷത്തിനാണ് ദ്രോഗ്ട സാക്ഷ്യം വഹിച്ചത്. പന്ത്രണ്ട് മണിക്കൂറോളം നീണ്ടുനിന്ന ആഘോഷം രാവിലെ 10 മണിക്ക് വിവിധയിനം ഗെയിമുകളോടെ ആരംഭിച്ച് വൈകിട്ട് 10 മണിക്ക് ആവേശത്തിന്റെ പരകോടിയിൽ എത്തിച്ച DJ യിൽ അവസാനിക്കുമ്പോൾ ആദ്യാന്ത്യം അഭൂതപൂർവമായ നിറഞ്ഞ സദസ് ആനന്ദഘോഷത്തിൽ ആയിരുന്നു.

ചെണ്ടമേളം, പുലികളി, മെഗാ തിരുവാതിര, വടം വലി തുടങ്ങിയ വിവിധങ്ങളായ കലാ കായിക പരിപടികൾ ആഘോഷകരമായ ദിവസത്തിന് വർണ്ണാവേശം പകർന്നത് ദ്രോഗ്ട ഇന്ത്യൻ സമൂഹത്തിനു ഹൃദ്യമായ അനുഭവമായി. വിവിധ കലാ മേഖലകളിൽ കഴിവ് തെളിയിച്ച ദ്രോഗ്ടയുടെ സ്വന്തം കലാകാരന്മാരും കലാകാരികളും ക്ലാസിക്കൽ ഡാൻസ്, സിനിമാറ്റിക് ഡാൻസ്, ഇൻസ്ട്രമെന്റൽ മ്യൂസിക്, ഗാനാലാപനം തുടങ്ങിയ വിവിധങ്ങളായ കലാപരിപാടികളുമായി അനുസ്യൂതം IFA യുടെ സ്റ്റേജിൽ നിറഞ്ഞാടി.

 

ഹാസ്യ തമ്പുരാക്കന്മാരായ കലാഭവൻ ജോഷി, പ്രശാന്ത് കാഞ്ഞിരമറ്റം,  ബൈജു ജോസ്, ഷിനോ പോൾ, ശ്രീലക്ഷ്മി എന്നിവർ ചേർന്നൊരിക്കിയ മെഗാ ഷോയും, ദ്രോഗ്ടയുടെ സ്വന്തം DJ റയാൻ മാത്യു (DJ Velocity) ഒരുക്കിയ DJ കൂടി ആയപ്പോൾ ആഘോഷം ഉച്ചസ്ഥായിയിൽ ആയി . ഓണാഘോഷ പരിപാടികൾക്ക് ഒത്തുകൂടിയ എല്ലാവർക്കും  രുചികരവും വിഭവ സമൃദ്ധവുമായ ഓണസദ്യയും, വൈകുന്നേരം കപ്പ ബിരിയാണിയും, റിഫ്രഷ്മെന്റും IFA ഒരുക്കിയിരുന്നു. 

സ്മാർട്ട്‌ TV, മൊബൈൽ ഫോൺ, സൈക്കിൾ, ഹോം തിയേറ്റർ, എയർ ഫ്രൈർ തുടങ്ങിയ നിരവധിയായ സമ്മാനങ്ങൾ IFA പൊന്നോണം 2024 റാഫിൽ ടിക്കറ്റ് വിജയികൾക്ക് സമ്മാനിച്ചു. 

വൻ ജന പങ്കാളിത്തത്തിന് IFA ഏവർക്കും നന്ദി അറിയിക്കുന്നതിനോടൊപ്പം ഓണാശംസകളും നേരുന്നു കൂടെ എല്ലാ സ്പോൺസഴ്സിനും IFA യുടെ ഹൃദയം നിറഞ്ഞ നന്ദിയും അറിയിക്കുന്നു.