തുടർച്ചയായ വെളിപ്പെടുത്തലുകൾക്ക് പിന്നാലെ തനിക്കും കുടുംബത്തിനും ഭീഷണി; പോലീസ് സംരക്ഷണം ആവശ്യപ്പെട്ട് ഡി ജി പിക്ക് കത്ത് നൽകി പി വി അൻവർ

മലപ്പുറം: പൊലീസ് സംരക്ഷണം തേടി നിലമ്പൂർ പി വി അൻവർ.

തുടർച്ചയായ വെളിപ്പെടുത്തലുകൾക്ക് പിന്നാലെ തനിക്കും കുടുംബത്തിനും ഭീഷണിയുണ്ടെന്ന് പി വി അൻവർ പറഞ്ഞു. പൊലീസ് സംരക്ഷണം ആവശ്യപ്പെട്ട് ഡിജിപിക്ക് കത്ത് നൽകി. തന്നെ കൊല്ലാനും കുടുംബത്തെ അപായപ്പെടുത്താനും സാധുതയുണ്ട്. കുടുബത്തിനും വീടിനും സ്വത്തിനും സംരക്ഷണത്തിനായി പൊലീസ് ഉദ്യോഗസ്ഥരെ നിയോഗിക്കണമെന്നാണ് അവരുടെ ആവശ്യം.  

അതിനിടെ, പി വി അൻവറിൻ്റെ ആരോപണത്തിൽ ഡിജിപി എഡിജിപി എം ആർ അജിത് കുമാറിൻ്റെ മൊഴി രേഖപ്പെടുത്തി. മൂന്നര മണിക്കൂർ നീണ്ട മൊഴി എടുപ്പ് വീഡിയോ റിക്കോർഡ് ചെയ്തു. ഐജി സ്പർജൻ കുമാറും മൊഴിയെടുക്കുമ്പോഴുണ്ടായിരുന്നു. അൻവറിൻ്റെ ആരോപണത്തിന് പുറമെ ആർഎസ്എസ് നേതാക്കളുമായുള്ള കൂടിക്കാഴ്ചയെ കുറിച്ച് എഡിജിപി നൽകിയ മൊഴി എന്ത് എന്നതിൽ ആകാംക്ഷയുണ്ട്. 

സ്വകാര്യ സന്ദർശനമെന്നായിരുന്നു അജിത് കുമാർ നേരത്തെ മുഖ്യമന്ത്രിക്ക് നൽകിയ വിശദീകരണം. നിരന്തരം ആരോപണം ഉന്നയിക്കുന്ന അൻവറിനെതിരെ എന്തെങ്കിലും തെളിവ് നൽകിയോ എന്നുള്ളതും പ്രധാനമാണ്. ആരോപണത്തിന് പിന്നിൽ ഗൂഢാലോചനയുണ്ടെന്ന് തെളിവ് സഹിതം നൽകിയാൽ അതും അന്വേഷിക്കേണ്ടിവരും.   

ഇതിനിടെ അജിത് കുമാറിനെതിരായ അനധികൃത സ്വത്ത് സമ്പാദനമടക്കമുള്ള പരാതിയിൽ ഡിജിപി വിജിലൻസ് അന്വേഷണത്തിന് ശുപാർശ ചെയ്തു. എം ആർ അജിത് കുമാർ ക്രമസമാധാന ചുമതല നിർവ്വഹിക്കുന്നതിനാൽ തെളിവുകൾ മുന്നോട്ട് വരുന്നില്ലെന്ന് ഡിജിപിയെ കണ്ടശേഷം പി വി അൻവർ പറഞ്ഞു.