ഓണം കഴിഞ്ഞപ്പോൾ പണമില്ല; ട്രഷറി നിയന്ത്രണങ്ങള്‍ കടുപ്പിച്ച്‌ പിണറായി സര്‍ക്കാര്‍; ആനുകൂല്യങ്ങള്‍ മുടങ്ങും

തിരുവനന്തപുരം: ഓണം കഴിഞ്ഞതോടെ സാമ്പത്തിക പ്രതിസന്ധിയില്‍ കുടുങ്ങി സർക്കാർ. പണമില്ലായ്മ അതിരൂക്ഷമായതോടെ ട്രഷറി ധന വിനിമയത്തില്‍ കടുത്ത നിയന്ത്രണം ഏർപ്പെടുത്തിയിരിക്കുകയാണ് സർക്കാർ.

ഇതിനെ തുടർന്ന് അഞ്ചുലക്ഷം രൂപയില്‍ അധികമുള്ള ബില്ലുകള്‍ മാറ്റി നല്‍കേണ്ട എന്നാണ് ലഭിച്ച നിർദ്ദേശം . നേരത്തേ 25 ലക്ഷമായിരുന്നു പരിധി. തദ്ദേശസ്ഥാപനങ്ങളെയും കരാറുകാരെയും നിയന്ത്രണം ബാധിക്കും. വിവിധ വകുപ്പുകളിലെ ആനുകൂല്യങ്ങളും ഇതോടു കൂടി മുടങ്ങും.

ബില്ലുകള്‍ മാറുന്നതിന് അഞ്ചുലക്ഷം എന്ന പരിധി തദ്ദേശസ്ഥാപനങ്ങള്‍ക്കും ബാധകമാണെന്ന് പ്രത്യേകം വ്യക്തമാക്കിയിട്ടുണ്ട്. 

സാമ്പത്തിക  വർഷത്തിന്റെ രണ്ടാം പകുതിയിലാണ് തദ്ദേശസ്ഥാപനങ്ങളുടെ പദ്ധതി പ്രവർത്തനങ്ങള്‍ പൊതുവെ തുടങ്ങുന്നത്. ഈ ഘട്ടത്തില്‍ നിയന്ത്രണം വരുന്നതോടെ ജനോപകാര പ്രദമാകുന്ന പദ്ധതികള്‍ പലതും ഒഴിവാക്കേണ്ടിവരും എന്ന സാഹചര്യമാണുള്ളത്.