ഗുരുവായൂരമ്പലനടയിൽ കല്യാണ മേളം: തുടങ്ങി: ഇന്ന് നടക്കേണ്ടത് 356 വിവാഹങ്ങള്‍; ബുക്കിങ് തുടരുന്നുവെന്ന് ദേവസ്വം, ക്ഷേത്ര വഴിപാടുകളിൽ നിയന്ത്രണം,

തൃശൂർ: ഗുരുവായൂർ ശ്രീകൃഷ്ണ ക്ഷേത്രത്തില്‍ ഇന്ന് കല്യാണ മേളം. 356 വിവാഹങ്ങളാണ് ഇന്ന് ബുക്ക് ചെയ്തിട്ടുള്ളത്. രാവിലെ നാല് മണിക്ക് വിവാഹങ്ങള്‍ തുടങ്ങി.

അതേസമയം ബുക്കിങ് തുടരുന്നുവെന്നും 400 വിവാഹങ്ങള്‍ വരെ നടത്താനുള്ള ക്രമീകരണം ക്ഷേത്രത്തില്‍ ഒരുക്കിയിട്ടുണ്ടെന്നും ദേവസ്വം ബോർഡ് അധികൃതർ വ്യക്തമാക്കി. 

ചിങ്ങമാസത്തിലെ അവസാന ഞായറാഴ്ചയും ചോതി നക്ഷത്രവും ഒരുമിച്ച്‌ വന്നതിനാലാണ് ഇന്ന് ഇത്രയധികം വിവാഹങ്ങള്‍ തീരുമാനിച്ചത്. മുൻമന്ത്രി വി.എസ്.സുനില്‍ കുമാറിന്റെ സഹോദരിയുടെ മകളുടെ വിവാഹമാണ് പുലർച്ചെ നടന്ന വിവാഹങ്ങളില്‍ ഒന്ന്.

 പുലർച്ചെ ആറ് വരെ 80 ഓളം വിവാഹങ്ങള്‍ നടന്നു. ഒരോ വിവാഹ സംഘത്തിനുമൊപ്പം 4 ഫോട്ടോ-വീഡിയോഗ്രാഫർമാർ അടക്കം 24 പേർക്ക് മണ്ഡപത്തിനടുത്തേക്ക് പ്രവേശനം അനുവദിച്ചിട്ടുണ്ട്.

ക്ഷേത്രത്തില്‍ 150 ഓളം പൊലീസുകാരെയും 100 ക്ഷേത്രം ജീവനക്കാരെയും സുരക്ഷയ്ക്കായി നിയോഗിച്ചിട്ടുണ്ട്. ശയന പ്രദക്ഷിണം , അടി പ്രദക്ഷിണം എന്നിവ ഇന്ന് ഒഴിവാക്കിയിട്ടുണ്ട്. ക്ഷേത്രത്തില്‍ ആറ് മണ്ഡപങ്ങളിലായാണ് വിവാഹങ്ങള്‍ നടക്കുന്നത്.