തിരുവനന്തപുരം: കേരളത്തിന്റെ താത്പര്യങ്ങള് സംരക്ഷിക്കുന്നതിന് ഉതകുന്ന മൊമ്മോറാണ്ടം അടക്കം തയ്യാറാക്കുന്നതിനും അത് പതിനാറാം ധനകാര്യ കമ്മീഷനുമുമ്പാകെ അവതരിപ്പിക്കുന്നതിനും വിവിധ തലങ്ങളിലെ ആശയ വിനിമയങ്ങള്ക്കാണ് സംസ്ഥാന സര്ക്കാര് നേതൃത്വം നല്കുന്നതെന്ന് ധനമന്ത്രി കെ.എന്. ബാലഗോപാല്.
ധനകാര്യ വിഷയങ്ങളില് സംസ്ഥാനങ്ങളുടെ യോജിച്ച നിലപാട് രൂപവത്കരിക്കാന് ചര്ച്ചാസമ്മേളനം വിളിച്ചുചേര്ക്കാന് കേരള സര്ക്കാര് തീരുമാനിച്ചുവെന്നും തിരുവനന്തപുരത്ത് നടന്ന വാര്ത്താസമ്മേളനത്തില് അദ്ദേഹം അറിയിച്ചു.
സംസ്ഥാനങ്ങള് നേരിടുന്ന വികസന- ധനകാര്യ പ്രശ്നങ്ങള് പതിനാറാം ധനകാര്യ കമ്മീഷന് മുമ്പാകെ അവതരിപ്പിക്കുന്നത് സംബന്ധിച്ച ആശയരൂപവവത്കരണമാണ് സമ്മേളനത്തിന്റെ പ്രധാനലക്ഷ്യം.
വിവിധ സംസ്ഥാനങ്ങള്ക്കും ഇത്തരത്തില് സാമ്പത്തിക വിവേചനം നേരിടേണ്ടിവരുന്നു. ഇക്കാര്യങ്ങളെല്ലാം ചര്ച്ചയുടെ ഭാഗമാകും. പൊതുനിലപാടുകളുടെ ആവശ്യകത സംബന്ധിച്ച ധാരണകള്ക്കും സമ്മേളനം വേദിയാകുമെന്നാണ് കേരളം പ്രതീക്ഷിക്കുന്നതെന്നും ധനമന്ത്രി വ്യക്തമാക്കി.
സംസ്ഥാന ധനവകുപ്പിന്റെ ആഭിമുഖ്യത്തില് സെപ്റ്റംബര് 12-ന് തിരുവനന്തപുരത്താണ് ഏകദിന സമ്മേളനം സംഘടിപ്പിക്കുന്നത്. തമിഴ്നാട്, കര്ണാടക, തെലങ്കാന, പഞ്ചാബ് എന്നീ സംസ്ഥാനങ്ങള് ഈ സമ്മേളനത്തില് പങ്കെടുക്കും. 12-ന് രാവിലെ 10-ന് മുഖ്യമന്ത്രി പിണറായി വിജയന് സമ്മേളനം ഉദ്ഘാടനം ചെയ്യും.
ധനമന്ത്രി കെ.എന്. ബാലഗോപാല് അധ്യക്ഷനാകും. തെലങ്കാന ഉപമുഖ്യമന്ത്രിയും ധനമന്ത്രിയുമായ ഭട്ടി വിക്രമാര്ക്ക മല്ലു, കര്ണാടക റവന്യു മന്ത്രി കൃഷ്ണ ബൈരെ ഗൗഡ, പഞ്ചാബ് ധനമന്ത്രി ഹര്പാല് സിങ് ചീമ, തമിഴ്നാട് ധനമന്ത്രി തങ്കം തെന്നരസു, പ്രതിപക്ഷ നേതാവ് വി.ഡി. സതീശന് എന്നിവര് സംസാരിക്കും. അഞ്ച് സംസ്ഥാനങ്ങളിലെയും ധനകാര്യ സെക്രട്ടറിമാര് ഉള്പ്പെടെ ഉദ്യോഗസ്ഥരും പങ്കെടുക്കും.
കേന്ദ്ര സര്ക്കാരിന്റെ മുന് സാമ്പത്തിക ഉപദേഷ്ടാവ് ഡോ. അരവിന്ദ് സുബ്രഹ്മണ്യന്, കേരള സംസ്ഥാന ആസൂത്രണ കമീഷന് വൈസ് ചെയര്മാന് പ്രൊഫ. വി.കെ. രാമചന്ദ്രന്, മുന്ധനമന്ത്രി ടി.എം. തോമസ് ഐസക്, മുന് കേന്ദ്ര കാബിനറ്റ് സെക്രട്ടറി കെ.എം. ചന്ദ്രശേഖരന്, മുഖ്യമന്ത്രിയുടെ പ്രിന്സിപ്പല് ചീഫ് സെക്രട്ടറി ഡോ. കെ.എം. എബ്രഹാം,
നാലാം സംസ്ഥാന ധനകമ്മീഷന് ചെയര്മാന് ഡോ. എം.എ. ഉമ്മന്, പന്ത്രണ്ടാം ധനകാര്യ കമ്മീഷന് അംഗം ഡോ. ഡി.കെ. ശ്രീവാസ്തവ, സാമ്പത്തിക വിദഗ്ധന്മാരായ ഡോ. പ്രഭാത് പട്നായിക്, പതിനാറാം ധനകാര്യ കമ്മീഷനുമുമ്പാകെ കേരളം സമര്പ്പിക്കുന്ന നിവേദനത്തിന്റെ കരട് തയ്യാറാക്കാനായി നിയോഗിച്ച സമിതിയുടെ അധ്യക്ഷന് ഡോ. സി.പി. ചന്ദ്രശേഖര്,
ഡോ. ജയതി ഘോഷ്, ഡോ. സുശീല് ഖന്ന, ഡോ. എം. ഗോവിന്ദ റാവു, ഡോ. പിനാകി ചക്രവര്ത്തി, പ്രൊഫ. കെ.എന്. ഹരിലാല്, റിട്ട. ഐ.ആര്.എസ്. ഉദ്യോഗസ്ഥന് ആര്. മോഹന്, സി.ഡി.എസ്. ഡയറക്ടര് ഡോ. സി.വി. വീരമണി, ഗിഫ്റ്റ് ഡയറക്ടര് ഡോ. കെ.ജെ. ജോസഫ്, എന്.ഐ.പി.എഫ്.പിയിലെ പ്രൊഫസര് ലേഖ ചക്രബര്ത്തി,
കേരള കാര്ഷിക സര്വകലാശാലയിലെ മുന് പ്രൊഫസര് ഡോ. പി. ഷഹീന, കൊച്ചിയിലെ സെന്റര് ഫോര് സോഷ്യോ-ഏക്കണോമിക് ആന്ഡ് എന്വയോണ്മെന്റല് സ്റ്റഡീസിലെ കെ.കെ. കൃഷ്ണകുമാര് തുടങ്ങിയവര് പങ്കെടുക്കും.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന് സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.