ഷിബു ഇനിയില്ലന്ന് ഉൾക്കൊള്ളാനാകാതെ റോസി.. കോട്ടയത്തെയും കണ്ണീരണിയിച്ച് ദുരന്തം

കോട്ടയം : രാത്രി ഒൻപതരയ്ക്ക് പതിവായെത്തുന്ന ഷിബുവിന്റെ ഫോൺവിളി ബുധനാഴ്ചയും റിയ (റോസി) കാത്തിരുന്നു... പക്ഷേ, പ്രിയതമന്റെ ആ വിളി എന്നന്നേക്കുമായി നിലച്ചുവെന്ന വിവരം വെള്ളിയാഴ്ച രാവിലെയാണ് അറിഞ്ഞത്. 

നെഞ്ചുപിളർത്തിയ ആ ദുഃഖവാർത്ത ഉൾക്കൊള്ളാനാകാതെ കരഞ്ഞുതളർന്ന റിയ ബന്ധുക്കൾക്കും നാട്ടുകാർക്കും നൊമ്പരമായി.

വിവരമറിഞ്ഞെത്തിയവരും ദുഃഖം താങ്ങാനാകാതെ വിതുമ്പി. മൂന്നുവയസ്സായ ഏകമകൻ എയ്ഡനെ കാണാൻ ഷിബു പതിവായി രാത്രി വീഡിയോകോളിൽ വിളിക്കും. മകന്റെ കളിചിരികളുമായി ഏറെനേരം സംസാരിച്ചരിക്കും.

ചെത്തിപ്പുഴ ആശുപത്രിയിലെ നഴ്സായ റിയ ജോലിസൗകര്യത്തിനായി തൃക്കൊടിത്താനത്തുള്ള സ്വന്തം വീട്ടിലായിരുന്നു താമസം. ബുധനാഴ്ച വൈകീട്ട് ജോലികഴിഞ്ഞെത്തിയപ്പോൾ വീട്ടുകാരുടെ മുഖത്തെ മാറ്റം ശ്രദ്ധിച്ചിരുന്നു. എങ്കിലും ഒന്നും ചോദിച്ചില്ല. 

ജോലിക്കിടെത്തന്നെ അപകടവിവരം അറിഞ്ഞെങ്കിലും, അതിൽ ഉൾപ്പെടരുതേയെന്ന പ്രാർഥനയിലായിരുന്നു. പതിവായുള്ള ഫോൺവിളി എത്താഞ്ഞതോടെ സംശയം തോന്നിയെങ്കിലും ഉള്ളിലൊതുക്കി.