മക്കളെ സാക്ഷിയാക്കി ധർമ്മജൻ അനൂജയ്ക്ക് താലി ചാർത്തി

കൊച്ചി: വിവാഹവാർഷികദിനത്തിൽ മക്കളെ സാക്ഷിയാക്കി ഭാര്യ അനൂജയ്ക്ക് വീണ്ടും താലി ചാർത്തി നടൻ ധർമജൻ ബോൾ​ഗാട്ടി.
തിങ്കളാഴ്ച രാവിലെ ഒമ്പതരയ്ക്കും പത്തരയ്ക്കും ഇടയിൽ കൊച്ചിയിലെ ഒരു ക്ഷേത്രത്തിൽവെച്ചായിരുന്നു ചടങ്ങ്. മക്കളായ വൈ​ഗ, വേദ എന്നിവരും അടുത്ത കുറച്ച് സുഹൃത്തുക്കളും മാത്രമായിരുന്നു ചടങ്ങിനുണ്ടായിരുന്നത്.

പതിനാറ് വർഷം മുമ്പ് ഒളിച്ചോടിയ ആളുകളാണ് തങ്ങളിരുവരും എന്നും തന്റെ നാട്ടിലെ ക്ഷേത്രത്തിൽ വച്ചാണ് വിവാഹം നടത്തിയതെന്നും ധർമജൻ പറഞ്ഞു. അന്ന് രജിസ്ട്രേഷനെക്കുറിച്ച് വലിയ ധാരണ ഉണ്ടായിരുന്നില്ല. ഇപ്പോഴാണ് അങ്ങനെയൊരു തോന്നലുണ്ടായത്. കുട്ടികൾ ഒരാൾ പത്തിലും ഒരാൾ ഒൻപതിലുമായി. അവരുടെ സാന്നിധ്യത്തിൽ കല്യാണം കഴിച്ചുവെന്നു മാത്രമല്ല രജിസ്റ്ററും ചെയ്തു. റെക്കോർഡിക്കൽ ആയി നമുക്കൊരു രേഖ ആവശ്യമാണ്. പല കാര്യങ്ങൾക്കും ചെല്ലുമ്പോൾ ഇതില്ലെങ്കിൽ പ്രശ്നമാകും. അല്ലാതെ ആളുകളുടെ മുമ്പിൽ കാണിക്കാൻ വേണ്ടി ചെയ്തതല്ല. നമ്മുടെ ഭാവിക്കും സുരക്ഷിതത്വത്തിനും വേണ്ടി ചെയ്ത കല്യാണമാണെന്ന് ധർമജൻ പിന്നീട് പ്രതികരിച്ചു.

‘‘ഒരു വർഷത്തോളാണ് ഇവളുടെ വീട്ടുകാർ അകന്നു നിന്നത്. പിന്നീട് കുട്ടികളൊക്കെ ആയപ്പോൾ അതൊക്കെ മാറി. സൗഹൃദവും സന്തോഷവുമൊക്കെയായിരുന്നു. പക്ഷേ ഇപ്പോൾ ഈ വിവാഹം നടക്കുമ്പോഴും എന്റെ അച്ഛനമ്മമാരും ഇവളുടെ അച്ഛനുമുൾപ്പെടെ വേണ്ടപ്പെട്ട ചിലരൊക്കെ ഇല്ലാത്തതിന്റെ സങ്കടമുണ്ട്. എങ്കിലും അധികം ആളുകളെ അറിയിക്കാതെയാണ് ഇതൊക്കെ പ്ലാൻ ചെയ്തത്. സാക്ഷി ഒപ്പിടാൻ പറ്റിയ ആളുകളെ മാത്രം വിളിച്ച് നടത്തിയ പരിപാടിയാണ്.

രാവിലെ ഫെയ്സ്ബുക്കിൽ ഒരു പോസ്റ്റിട്ടിരുന്നു. ഭാര്യ വിവാഹിതയാകുന്നു, വരൻ ഞാൻ തന്നെ എന്നു പറഞ്ഞ്. കല്യാണം ആയിട്ട് എന്താടാ എന്നെ വിളിക്കാത്തതെന്ന് ചോദിച്ച് രാവിലെ വിളിച്ചത് സംവിധായകൻ ബോബൻ സാമുവൽ ആണ്. പരാതികളുണ്ടാകും, പക്ഷേ ഇതൊരു പബ്ലിസിറ്റിക്കു വേണ്ടി ചെയ്ത കാര്യമല്ല. പിഷാരടി എന്നെ വിളിച്ച് ചീത്ത പറഞ്ഞു, ‘‘നീ ഇതുവരെ രജിസ്റ്റർ ചെയ്തിട്ടില്ലേ, ചത്തുപോയാൽ അവൾക്ക് ഇൻഷുറൻസ് പോലും കിട്ടില്ലെന്നു പറഞ്ഞു. അതൊക്കെ ഇതിൽ ബാധകമാണ്.’’–ധർമജൻ കൂട്ടിച്ചേർത്തു.