പത്തനംതിട്ടയിൽ മുഖംമൂടി സംഘം വീടുകയറി ആക്രമിച്ചു; കാർ തല്ലിത്തകർത്തു,സിസിടിവി ക്യാമറയും നശിപ്പിക്കാൻ ശ്രമം,

പത്തനംതിട്ട: മുഖംമൂടി സംഘം വീടുകയറി ആക്രമിച്ചതായി പരാതി. സംഭവത്തിൽ പൊലീസ് കേസെടുത്ത് അന്വേഷണം ആരംഭിച്ചു. മെഴുവേലിയിലാണ് ആക്രമണം. ആലക്കോട് പ്രിൻസിന്റെ വീടിനു നേരെയാണ് ആക്രമണം ഉണ്ടായത്. വീട്ടിലുണ്ടായിരുന്ന കാർ സംഘം അടിച്ചു തകർത്തു.

ഇന്നലെ പുലർച്ചെയാണ് ആക്രമണം. വീടിന്റെ ജനാലകൾ തകർത്ത സംഘം മുറ്റത്ത് നിർത്തിയിട്ട കാറും അടിച്ചു തകർത്തു. സിസിടിവി ക്യാമറയും സംഘം നശിപ്പിക്കാൻ ശ്രമിച്ചു.

സംഭവത്തിനു പിന്നിൽ ആറം​ഗ സംഘമാണെന്നു പൊലീസ് എഫ്ഐആർ. അടിമുടി ദുരൂഹതയുണ്ടെന്നും പൊലീസ് പറയുന്നു. ചില നിർണായക വിവരങ്ങൾ ലഭിച്ചതായും പ്രതികളെ ഉടൻ തന്നെ പിടികൂടുമെന്നും പൊലീസ് വ്യക്തമാക്കി.