പാലം തകർന്ന് വീണ് പശുക്കളെ മേയ്ക്കാൻ പോയ കർഷകന് ദാരുണാന്ത്യം, പശുവിനും ഗുരുതര പരിക്ക്,,

തിരുവനന്തപുരം: വിതുരയിൽ പശുക്കളെ മേയ്ക്കാൻ പോയ കർഷകൻ വഴിയിലെ തോടിനു കുറുകേയുള്ള പാലം തകർന്നുവീണു മരിച്ചു. മരുതാമല അടിപ്പറമ്പ് ജെഴ്സി ഫാമിനു സമീപം അരുണ്‍ ഭവനില്‍ കനകരാജ്(61) ആണ് മരിച്ചത്. ഇന്നലെ രാവിലെ എട്ടേമുക്കാലോടെ ജെഴ്സിഫാമിനു സമീപത്തെ പാലം തകർന്നായിരുന്നു അപകടം.

രണ്ടു പശുക്കളെയും ഒരു കിടാവിനെയും തീറ്റാൻ പോകവേയാണ് പാലം പൊളിഞ്ഞത്. ഒരു പശുവും കിടാവും പാലം കയറിപ്പോയി. തുടർന്ന് കനകരാജും രണ്ടാമത്തെ പശുവും കയറുമ്പോഴാണ് സ്ലാബ് പൊളിഞ്ഞുവീണതെന്ന് കണ്ടുനിന്നവർ പറഞ്ഞു. പൊളിഞ്ഞുമാറിയ പാലത്തിന്റെ ഒരു ഭാഗം കനകരാജിന്റെയും പശുവിന്റെയും പുറത്തു വീഴുകയായിരുന്നു. 

കനകരാജിന്റെ നെഞ്ചില്‍ കോണ്‍ക്രീറ്റ് പതിച്ചു. ഇയാളുടെ കാലും ഇതിനിടയില്‍ കുരുങ്ങിപ്പോയി. അഗ്നിരക്ഷാസേനയെത്തി കോണ്‍ക്രീറ്റ് പാളി മുറിച്ചുമാറ്റി വിതുര താലൂക്ക് ആശുപത്രിയിലും മെഡിക്കല്‍ കോളേജ് ആശുപത്രിയിലും എത്തിച്ചെങ്കിലും ജീവൻ രക്ഷിക്കാനായില്ല.

വീഴ്ചയുടെ ആഘാതത്തില്‍ പശുവിന്റെ കൊമ്പ് ഒടിഞ്ഞു. പുറത്ത് ഗുരുതര പരിക്കുമുണ്ട്. അടിപ്പറമ്പ് ജെഴ്സി ഫാമിലെ തൊഴിലാളിയായ സുജകുമാരിയാണ് ഭാര്യ. മക്കള്‍: അഞ്ജുരാജ്, അരുണ്‍രാജ്, ആൻസിരാജ്. മരുമകള്‍: സോഫി.