ഹോട്ടലില്‍ അല്‍ഫാം കഴിക്കുന്ന എലിയുടെ ദൃശ്യം മൊബൈലില്‍ പകര്‍ത്തി ഭക്ഷണം കഴിക്കാനെത്തിയ ആള്‍; തൃശൂരിലെ അല്‍ഫാം ഹോട്ടല്‍ പൂട്ടി,

തൃശൂർ: ഹോട്ടലില്‍ ഭക്ഷണം വാങ്ങാനെത്തിയ ആള്‍ കണ്ടത് അലമാരയില്‍ വില്‍പ്പനയ്‌ക്കായി തയ്യാറാക്കിവെച്ചഅല്‍ഫാം എലി കഴിക്കുന്നതാണ്.,

ഉടനെ ഈ ദൃശ്യം അയാള്‍ ക്യാമറയില്‍ പകർത്തി, അധികൃതര്‍ക്ക് എത്തിച്ചു. ഉടനെ നഗരസഭ ആരോഗ്യ വിഭാഗം ഉദ്യോഗസ്ഥരെത്തി ഹോട്ടല്‍ അടച്ചു പൂട്ടി.

തൃശൂർ കുന്നംകുളം പട്ടാമ്പി റോഡില്‍ പാറേമ്പാടത്ത് പ്രവർത്തിച്ചുവരുന്ന അറബിക് റെസ്റ്റോറന്‍റിലാണ് സംഭവം. രാത്രിയിലായിരുന്നു എലിയുടെ ഈ വിളയാട്ടം.

ഹോട്ടലില്‍ ഭക്ഷണം ഓർഡർ ചെയ്യുവാനെത്തിയ ഉപഭോക്താവാണ് ഇവിടെ തയ്യാറാക്കി വച്ചിരുന്ന അല്‍ഫാം കഴിക്കുന്ന എലിയുടെ ചിത്രം പകർത്തി, നഗരസഭ പൊതുജനാരോഗ്യ വിഭാഗം മേധാവിക്ക് വാട്ട്സ് ആപ്പ് വഴി സന്ദേശമയച്ചത്. മെസേജ് കിട്ടിയതിന് പിന്നാലെ നഗരസഭ പൊതുജനാരോഗ്യ പരിസ്ഥിതി പരിപാലന വിഭാഗം ക്ളീൻ സിറ്റി മാനേജർ ആറ്റ്ലി പി ജോണ്‍ സ്ഥലം സന്ദർശിച്ച്‌ റസ്റ്റോറന്റില്‍ പരിശോധന നടത്തി.

റസ്റ്റോറന്‍റിലുണ്ടായിരുന്ന ഏതാണ്ടെല്ലാ ഭക്ഷണ സാധനങ്ങളിലും എലികള്‍ തൊട്ടിട്ടുണ്ടെന്ന് പരിശോധനയില്‍ മനസ്സിലായി. തുടർന്ന് ആരോഗ്യവിഭാഗം അധികൃതര്‍ ഭക്ഷണ സാധനങ്ങള്‍ നശിപ്പിച്ചു. ഹോട്ടല്‍ അടച്ചുപൂട്ടുകയും ചെയ്തു.