കാട്ടാന ആക്രമണം: ഏപ്രില്‍ ഫൂളും വിനയായി, പലരും വിശ്വസിച്ചത് ബിജു മരിച്ചുകിടക്കുന്ന ചിത്രം അയച്ചശേഷം

റാന്നി : കാട്ടാന ആക്രമണത്തില്‍ പമ്പാവാലി പി.ആർ.സി. മലയില്‍ ബിജു കൊല്ലപ്പെട്ടത് ഏപ്രില്‍ ഒന്നിന് പുലർച്ചെ ഒന്നരയോടെയായിരുന്നു.

അയല്‍വാസികളായ കുന്നുംപുറത്ത് ഷാജിയും ലിസിയും ഈ വിവരം അറിയിക്കാനായി നാട്ടുകാരില്‍ പലരെയും ഫോണില്‍ ബന്ധപ്പെടാൻ ശ്രമിച്ചെങ്കിലും പലരും കോള്‍ എടുക്കുകയുണ്ടായില്ല. ബാക്കിയുള്ളവരാകട്ടെ ഏപ്രില്‍ ഫൂളാക്കേണ്ട എന്നറിയിച്ച്‌ കോള്‍ കട്ട് ചെയ്യുകയായിരുന്നു.

ഇത്തരം അനുഭവങ്ങളാണ് ഭൂരിഭാഗം പേരില്‍ നിന്നുമുണ്ടായതെന്ന് ലിസി വെളിപ്പെടുത്തി. ഭീതിയോടെയും സങ്കടത്തോടെയുമാണ് ബിജുവിൻ്റെ മൃതദേഹത്തിനു സമീപം നിന്ന് ഓരോ കോളും ചെയ്‌തിരുന്നത്‌. അവസാനം ചിത്രം അയച്ചുകൊടുത്തതിന് ശേഷമാണ്  സംഭവത്തിൻ്റെ ഗൗരവം മനസ്സിലായി പലരും എത്തിത്തുടങ്ങിയത്.